Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

aHébreu 12:1-29

12  Ni la, teti so e yeke na atémoin mingi mingi tongaso so angoro e tongana mbinda, zia e zi nengo ye kue e bi ni nga na siokpari so alingbi ti gbu e hio; zia e gbu ngangu, e kpe loro ti mandako so a zia na gbele e,  na ngoi so lê ti e ayeke gi na ndo ti Jésus, Kota Mokonzi ti mabe ti e na Lo so asara si mabe ti e alingbi kue. Ndali ti ngia so a zia na gbele lo, lo gbu ngangu juska lo kui na ndo ti keke ti pasi, lo bi kamene yongoro, na fadeso lo duti na tere ti trône ti Nzapa na mbage ti koli.  Biani, ALA bâ lo mbilimbili, lo so lo kanga bê ti lo na atënë so awasiokpari atene ti ke lo me so a sara sioni gi na ala wani, tongaso si ALA woko pëpe nga ngangu ahunzi na âme ti ALA kue kue kue pëpe.  Na yâ ti tiri ti ALA na siokpari so, ade ALA tiri ngangu juska na mênë pëpe,  me ALA girisa biani biani awe wango so a mû na ALA tongana ti so mbeni babâ amû wango na amolenge ti lo: “Molenge ti mbi, mo bâ sengo ndo ti Jéhovah tongana senge ye pëpe, wala tongana lo kiri na mo na nzoni lege, mo ke pëpe;  teti zo so Jéhovah aye lo, lo yeke se lo; biani, lo pika zo kue so lo yamba lo tongana molenge ti lo.”  A yeke ndali ti sengo ndo si ALA ngbâ ti gbu ngangu so. Nzapa ayeke sara ye na ALA tongana amolenge ti lo. Teti molenge wa si babâ ti lo ase lo pëpe?  Me tongana a se ALA pëpe na sengo ndo so azo kue awara, andâ ALA yeke biani amolenge ti gigi, me ALA yeke atâ molenge pëpe.  Nga, e yeke lani na ababâ so ayeke azo, na ala si ayeke se e, na e kpe mbeto ti ala. Ti tene e ngbâ na fini, a yeke ti e ti woko tere na gbe ti Babâ ti fini ti e ti yingo ahon ala so pëpe? 10  Teti ababâ so ayeke se e lani teti kete ngoi alingbi na ye so ala bâ ayeke nzoni na lê ti ala; me ti Nzapa, lo yeke se e ndali ti nzoni ti e si e sara beoko na dutingo ti lo so ayeke nzoni-kue. 11  Tâ tënë, a lingbi ti bâ sengo ndo kue na ndembe ni tongana ye so amû ngia na zo pëpe, me ye so amû vundu; ye oko, gbändâ ala so sengo ndo ni asara kua na ndo ti ala, sengo ndo ni ayeke lë lengo ti siriri, so ti tene mbilimbili. 12  Ni la, ALA yô na nduzu amaboko so ayeke gue ti tï nga na alikuni so awoko, 13  ALA ngbâ ti leke alege so ayeke nzoni ndali ti gere ti ALA, si gere so abuba azi na lê ti tere pëpe, me a sara si a ga nzoni. 14  ALA tomba peko ti dutingo na siriri na azo kue, nga ALA tomba peko ti dutingo so ayeke nzoni-kue, dutingo so tongana zo ayeke na ni pëpe lo lingbi ti bâ Seigneur pëpe; 15  ALA bâ ndo nzoni si a gbanzi mbeni zo na kota nzobe ti Nzapa pëpe; si mbeni sioni gunda ti keke asigigi na a bi wusuwusu pëpe nga si azo mingi aga sioni ndali ni pëpe; 16  si mbeni zo ti sarango lango-sioni wala mbeni zo so ayeke ne pëpe aye so ayeke nzoni-kue aduti na popo ti ALA pëpe, mbeni zo tongana Ésaü so akä adroit ti lo ti kozo molenge ndali ti sembe ti kobe oko. 17  Na ALA hinga nga so na pekoni, tongana lo hunda ti tene a iri tënë nzoni na ndo ti lo, a ke na lo, teti atâa so lo gi na ngangu nga na ngu ti lê ti tene babâ ti lo achangé yanga, lo wara ndo ndali ni pëpe. 18  Teti ALA ga nduru pëpe na tere ti ye so zo alingbi ti ndu ni na maboko, ye so wâ amû ni si a yeke gbi, vuko mbinda, bingo so avuko pitipiti nga kota pupu, 19  toto ti trompette na mbeni go so a sara tënë; na mango go ni so, azo ni avoro yanga ti tene a kiri a zia mbeni tënë na ala na ndo ni pëpe. 20  Teti ala lingbi lani pëpe ti kanga bê na yanga so a mû na ala, so atene: “Tongana mbeni nyama andu hoto ni, a lingbi a bo lo na tênë si lo kui.” 21  Nga, ye ni so asara zo mbeto mingi si Moïse atene: “Mbeto agbu mbi nga tere ti mbi ayeke dö dongo.” 22  Me ALA ga nduru na mbeni Hoto ti Sion nga na mbeni gbata ti Nzapa so ayeke na fini, so ti tene Jérusalem ti yayu; nga ALA ga nduru na a-ange saki na saki 23  so abungbi gbani; ALA ga nduru na congrégation ti akozo molenge so a zia iri ti ala na yayu; ALA ga nduru na Nzapa so ayeke Wafango ngbanga ti azo kue; ALA ga nduru na afini ti yingo ti azo so ayeke mbilimbili, azo so a sara si ala lingbi kue; 24  ALA ga nduru na Jésus walekengo-songo ti mbeni fini mbele nga ALA ga nduru na mênë so a fi ni, mênë so asara tënë nzoni mingi ahon mênë ti Abel. 25  ALA sara hange si ALA ke pëpe ti mä yanga ti zo so ayeke sara tënë. Asinga azo so ake ândö ti mä yanga ti lo so ayeke fa peko ti gbotongo mê ti Nzapa na ndo ti sese asigigi dä pëpe, si e la tongana e turnê peko ti e na lo so ayeke sara tënë na yayu, fade e sigigi dä? 26  Na ngoi ni so, toto ti go ti lo ayengi sese, me ti fadeso lo mû zendo so: “A yeke gi sese si fade mbi yeke kiri ti yengi ni pëpe, me mbi yeke yengi yayu nga.” 27  So lo tene “fade mbi yeke kiri ti”, a ye ti fa so lo yeke lungula aye so a yeke yengi ni, so ti tene aye so Nzapa la aleke ni pëpe, si aye so a yengi pëpe angbâ ti ala. 28  Tongaso, na bango so e yeke wara ande mbeni royaume so a lingbi ti yengi ni pëpe, zia e ngbâ ti duti na kota nzobe, so na lege ni e lingbi ti sara kusala so ayeke nzoni-kue na lê ti Nzapa na kpengo mbeto ti lo nga na dongo bê.  29  Teti Nzapa ti e ayeke nga mbeni wâ so ayeke gbi ye biani biani.

Kete tënë