Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

aHébreu 11:1-40

11  Mabe ayeke hingango biani so aye so mo yeke ku ni kungo ayeke si biani. A yeke nga fango polele na gigi ye so afa atene aye so mo bâ ni pëpe ayeke dä biani.  Teti a yeke na lege ti mabe ni so si a sara nzoni tënë ti azo ti ândö.  Na lege ti mabe, e bâ so a leke aye ti angoi nde nde na molongo ni na lege ti tënë ti yanga ti Nzapa, si aye so lê abâ ni asigigi na lege ti aye so afa tere ti ala na gigi pëpe.  Na lege ti mabe, Abel amû na Nzapa mbeni sandaga so ngere ni ayeke kota mingi ahon ti Caïn; na lege ti mabe ni, a sara nzoni tënë ti lo a tene lo yeke mbilimbili, Nzapa asara nzoni tënë ti lo ndali ti amatabisi so lo mû. Na lege ti mabe ni, atâa so lo kui awe, lo ngbâ ti sara tënë.  Na lege ti mabe, a mû Hénoc a gue na lo na mbeni ndo nde si lo bâ kuâ pëpe, na a wara lo pëpe teti Nzapa amû lo ague na lo na mbeni ndo nde; teti kozo si a gue na lo na mbeni ndo nde, a fa na lo a tene lo nzere na lê ti Nzapa.  Nga, tongana mabe ayeke dä pëpe zo alingbi ti nzere na lê ti Nzapa pëpe, teti zo so aga nduru na Nzapa a lingbi lo mä na bê so Nzapa ayeke dä na lo ga zo ti futango azo so ayeke gi lo ngangu.  Na lege ti mabe, Noé afa so lo kpe mbeto ti Nzapa na lo leke mbeni arche ti sö azo ti da ti lo; lo sara tongaso na peko ti so Nzapa awa lo na ndo ti aye so ade ti bâ ni pëpe; na lege ti mabe ti lo, lo fâ ngbanga na ndo ti dunia ni na lo ga héritier ti mbilimbili so ague oko na mabe.  Na lege ti mabe, Abraham amä yanga na peko ti so a iri lo, si lo zia kodoro ti lo, lo gue na mbeni ndo so a fa kozo awe a tene lo yeke wara ni tongana ye ti héritier; lo zia kodoro ni lo hon, atâa so lo hinga pëpe ndo so lo yeke gue dä.  Na lege ti mabe, lo sara kodoro tongana wande na yâ ti sese so a mû zendo ni na lo mo bâ mo tene a yeke kodoro-wande, na lo lango na gbe ti atente, lo na Isaac na Jacob so ala yeke ahéritier ti oko zendo ni so legeoko na lo. 10  Teti lo yeke ku lani gbata so tâ gere ni ayeke dä, so walekengo ni nga wasarango ni ayeke Nzapa. 11  Na lege ti mabe, Sara nga awara lege ti mû ngo,* atâa so lo hon ngu ti dungo ni awe, teti lo bâ lo so amû zendo ni tongana zo so ayeke be-ta-zo. 12  Ni la, na lege ti koli oko so a bâ a tene lo kui awe, a dü amolenge so ala yeke mingi mingi tongana atongoro ti yayu nga ala ga tongana mbutu ti yanga ti ngu-ingo so zo alingbi ti diko ni pëpe. 13  Azo so kue angbâ na lege ti mabe si ala kui, me ala bâ gango tâ tënë ti azendo ni pëpe; ye oko, ala bâ azendo so yongoro kâ na ala yamba ni, na ala tene polele na yanga ti ala so ala yeke awande nga azo so aga ti sara kodoro ti ninga pëpe na yâ ti kodoro ni. 14  Teti ala so atene tënë ni so, ala fa biani so ala yeke gi mbeni ndo biani ndali ti ala wani. 15  Na tongana ala ngbâ fade ti zia bê ti ala na ngbene ndo so ala zia ni si ala hon, ka ala yeke wara lege ti kiri kâ. 16  Me fadeso ala yeke gi mbeni ndo so ayeke nzoni ahon so ala zia so, so ti tene mbeni ndo so ayeke ti yayu. Ni la, kamene asara Nzapa ndali ti ala pëpe, so ala iri ndo na lo tongana Nzapa ti ala, teti lo leke mbeni gbata ndali ti ala awe. 17  Na lege ti mabe, a ngbâ kete Abraham amû Isaac na sandaga na ngoi so Nzapa atara bê ti lo, na koli so tere ti lo anzere lani ti wara azendo ni atara ti mû gi oko molenge so lo dü ti yä na sandaga, 18  atâa so a tene fade na lo a tene: “Ye so a yeke iri ni ande ‘ngongoa ti mo’ ayeke sigigi na lege ti Isaac.” 19  Me lo tene na bê ti lo so Nzapa ayeke na ngangu ti zingo Isaac même na kuâ; na lo kiri lo wara Isaac tongana mbeni zo so azingo na kuâ, na ye so aduti tongana mbeni tapande ti ye. 20  Na lege ti mabe nga, Isaac airi tënë nzoni na ndo ti Jacob na Ésaü ndali ti aye so ayeke ga. 21  Na lege ti mabe, tongana Jacob aga nduru ti kui, lo iri tënë nzoni na ndo ti amolenge ti Joseph ti koli oko na oko nga lo ba na ndo ti keke ti lo, lo voro Nzapa. 22  Na lege ti mabe, tongana Joseph aga nduru ti kui, lo sara tënë ti sigingo ti amolenge ti Israël na Égypte; na lo mû yanga na ala tënë ti abio ti lo. 23  Na lege ti mabe, babâ na mama ti Moïse ahonde lo nze ota na peko ti so a dü lo, teti ala bâ so molenge ni ayeke pendere mingi na ala sara mbeto ti yanga so gbia ni amû so pëpe. 24  Na lege ti mabe, tongana Moïse akono awe, lo ke ti tene a iri lo molenge ti molenge ti Pharaon ti wali, 25  lo soro ti tene a sara pasi na lo legeoko na azo ti Nzapa ahon ti tene lo wara ngia na yâ ti siokpari teti kete ngoi, 26  teti lo bâ ti lo zonga so a zonga na Christ tongana amosoro so ahon amosoro ti Égypte; na lo zia lê ti lo gi na ndo ti futa so a yeke mû. 27  Na lege ti mabe, lo zia kodoro ti Égypte, me lo sara mbeto ti ngonzo ti gbia ni pëpe, teti lo ngbâ ti luti ngangu mo bâ mo tene lo yeke bâ Lo so lê abâ Lo pëpe. 28  Na lege ti mabe, lo sara ândö matanga ti Pâque na lo fi mênë na ndo ti yanga-da si wafutingo ye andu akozo molenge ti ala pëpe. 29  Na lege ti mabe, ala fâ kota Ngu-Bengba mo bâ mo tene ala tambela na ndo ti kuru sese, me tongana azo ti Égypte atara ti hon dä, ngu ni amene ala. 30  Na lege ti mabe, agbagba ti kodoro ti Jéricho atuku na sese na peko ti so a ngoro ni teti lango mbasambala. 31  Na lege ti mabe, Rahab so ayeke wali-ndumba akui legeoko pëpe na azo so ake ti mä yanga, ngbanga ti so lo yamba na siriri awakala so a tokua ala. 32  Mbi kiri ti tene nyen ande? Ngoi ayeke mingi pëpe ti tene mbi ngbâ ti fa tënë ti Gédéon, Barak, Samson, Jephté, David, Samuel nga na tanga ti aprophète ni, 33  ala so, na lege ti mabe ti ala, ala kinda aroyaume na yâ ti bira, ala sara ye ti mbilimbili, ala wara azendo, ala kanga yanga ti abamara, 34  ala mingo ngangu ti wâ, ala sigigi na yanga ti épée, na ngoi so ngangu ahunzi na ala a sara si ala ga ngangu mingi, ala ga angangu zo ti tiringo bira, ala zia loro na gere ti aturugu ti akodoro-wande. 35  Ambeni wali ayamba azo ti ala so akui tongana a zingo azo so na kuâ; me a sara pasi na ambeni koli ngbanga ti so ala ke ti tene a futa mbeni ngere ti zi ala; akoli so asara tongaso ti tene ala wara zingongo ti akuâ so ayeke nzoni ahon ti so asi kozo. 36  Biani, ambeni awara ti ala tara ni na lege so a he ala na a pika ala na zaza, juska a zia ala na yâ ti zingiri na a bi ala na da ti kanga. 37  A bo ala na tênë, a tara bê ti ala, a fâ yâ ti ala na scie, a fâ ala na épée, ala yü poro ti tere ti angasangbaga na ti angasa si ala tambela na ni, na oko ngoi ni ye atia ala, ala yeke na yâ ti ye ti vundu, a sara ye ti sioni na ala; 38  dunia ni akpa ti yamba azo tongaso pëpe. Ala hon kirikiri na yando, na ndo ti ahoto, na yâ ti adû ti tênë nga na yâ ti adû ti sese. 39  Azo so kue, atâa so a sara nzoni tënë ti ala na lege ti mabe ti ala, ala bâ gango tâ tënë ti zendo ni pëpe, 40  teti Nzapa abâ kozoni awe ndali ti e mbeni ye so ayeke nzoni mingi ahon atanga ni, si a lingbi pëpe ti sara si ala ga azo so alingbi kue sân e.

Kete tënë

Na Grec: “mû ngo ti mbeni ngongoa.”