Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

aHébreu 10:1-39

10  Teti so Ndia ayeke gi gbede ti anzoni ye so ayeke ga, me a yeke atâ ye ni pëpe, na lege ti a-oko sandaga so azo ayeke mû ka ngu na ngu, ala lingbi lâ oko pëpe ti sara si azo so ayeke ga nduru na Nzapa aga azo so alingbi kue.  Tongana a yeke fade tongaso, ka a zia lege ti mungo asandaga awe, teti ala so ayeke sara kusala so ayeke nzoni-kue, ndali ti so a sukula sioni ti ala gi fani oko biani biani awe, ala yeke bâ fade tere ti ala tongana azo ti siokpari mbeni pëpe.  Me na lege ti asandaga so, a yeke dabe ti ala na ndo ti asiokpari ti ala ngu na ngu,  teti mênë ti akoli-bagara na ti akoli-ngasa alingbi oko pëpe ti zi asiokpari.  Ni la, tongana lo lï na yâ ti dunia so, lo tene: “ ‘Mo ye sandaga ti anyama nga na offrande pëpe, me mo leke mbeni tere ndali ti mbi.  Mo yeda pëpe na a-offrande so a zö ni kue na wâ nga offrande so a mû ndali ti siokpari.’  Tongaso mbi tene: ‘Ô Nzapa, bâ, mbi ga ti sara ye so bê ti mo aye (a sû tënë na ndo ti mbi na yâ ti mbeni mbage ti buku ni).’ ”  Tongana lo tene kozoni, lo tene : “Mo ye pëpe nga mo yeda pëpe si a mû asandaga ti anyama, a-offrande, a-offrande so a zö ni kue na wâ nga na offrande so a mû ndali ti siokpari”, atâa so Ndia la ahunda ti mû asandaga so,  lo tene tënë so na pekoni: “Bâ, mbi ga ti sara ye so bê ti mo aye.” Lo zi ye so aga kozo, tongaso si lo zia ti use ni na sese. 10  Na lege ti ‘ye so bê ti lo aye’ so, a sara si e ga nzoni-kue na lege ti offrande ti tere ti Jésus Christ so lo mû ni gi fani oko biani biani awe. 11  Nga, prêtre oko oko ayeke gbu mbata ti kua ti lo lâ na lâ ti sara kusala ndali ti nzoni ti azo na ti mû a-oko sandaga fani mingi, teti asandaga so alingbi lâ oko pëpe ti zi asiokpari kue kue kue. 12  Me ti koli so, lo mû sandaga oko ndali ti asiokpari teti lakue lakue na lo duti na tere ti Nzapa na mbage ti maboko ti lo ti koli, 13  na ti londo na ngoi ni so, lo yeke ku juska na lango so a yeke zia awato ti lo tongana mbata ti gere ti lo. 14  Teti a yeke na lege ti offrande oko si lo mû lege na ala so a yeke sara ala ti ga nzoni-kue ti lingbi kue teti lakue lakue. 15  Na ndo ni, yingo vulu nga afa tënë ni na e, teti tongana yingo ni atene: 16  “Jéhovah atene: ‘Mbele so mbi yeke te na ala na peko ti alango ni so ayeke duti tongaso: mbi yeke zia andia ti mbi na yâ ti bê ti ala na mbi yeke sû ni na yâ ti li ti ala’ ”, 17  na pekoni yingo ni akiri atene: “Na fade mbi yeke dabe ti mbi na asiokpari ti ala mbeni pëpe nga mbi yeke dabe ti mbi mbeni pëpe na asarango ye ti ala so ague nde na ndia.” 18  Tongana a mû pardon na aye so awe, a yeke na bezoin ti mû offrande ndali ti siokpari mbeni pëpe. 19  Tongaso, aita, teti so e yeke na mbeto pëpe ti mû lege ti lingo na ndo so ayeke nzoni-kue na lege ti mênë ti Jésus, 20  lege so lo zi ndali ti e tongana mbeni fini lege so ayeke na fini so ahon na yâ ti rido ni, so ti tene tere ti lo, 21  na teti so e yeke na mbeni kota prêtre so ayeke na ndo ti da ti Nzapa, 22  zia e ga nduru na Nzapa na tâ bê ti e, na kite oko pëpe nga na mabe, teti na lege ti ye so a fi ni na ndo ti bê ti e, a sukula bê ti e ni awe si e duti na sioni yingo-ti-hinga pëpe na a sukula tere ti e awe na ngu so ayeke na saleté pëpe. 23  Zia e gbu ngangu tënë ti beku ti e so e yeke sara tënë ni na lê ti azo dandara na zia e yengi pëpe, teti lo so amû zendo ni ayeke be-ta-zo. 24  Nga, zia e bi lê na ndo ti mba ti pusu mba ti duti na ndoye na ti sara apendere kusala, 25  e kpe bungbi ti e pëpe, tongana ti so ambeni zo ayeke sara ka, me e wa tere na popo ti e nga e ngbâ ti sara ni mingi ahon ti kozo, so ALA bâ lango ni ayeke pusu nduru. 26  Teti, na peko ti so e wara tâ hingango ye na ndo ti tâ tënë awe, tongana e ngbâ na yâ ti siokpari na mbana, sandaga ndali ti asiokpari ti e ayeke dä mbeni pëpe, 27  me ye so angbâ ayeke gi kungo na mbeto na bê ngbanga nga na mbanda so ayeke tongana wâ si ayeke te ande ala so ake Nzapa. 28  Zo kue so ake ti kpe ndia ti Moïse, a yeke bâ mawa ti lo pëpe, me a yeke fâ lo na peko ti tënë ti yanga ti atémoin use wala ota. 29  ALA bâ ti ALA pëpe so zo so adoro Molenge ti Nzapa na lo bâ tongana senge ye ngere ti mênë ti mbele so na lege ni a sara si lo ga nzoni-kue nga lo zonga yingo ti kota nzobe ti Nzapa sioni sioni, zo tongaso alingbi ande na mbeni sioni sengo ndo ahon so pëpe? 30  Teti e hinga zo so atene tënë so: “Futango kula ayeke ti mbi, fade mbi si mbi yeke kiri na futa na zo”; na a kiri a tene: “Fade Jéhovah ayeke fâ ngbanga ti azo ti lo.” 31  A yeke tâ ye ti mbeto mingi ti tï na maboko ti Nzapa so ayeke na fini. 32  Ye oko, zia ALA ngbâ ti dabe ti ALA na angoi ti ândö, so na peko ti so lumière ti Nzapa aza na lê ti ALA awe, ALA kanga bê ti ALA na yâ ti kota tiri na yâ ti apasi; 33  na mbeni ngoi a sigigi na ALA dandara tongana ti so a yeke sara na yâ ti mbeni da ti ngia si azo azonga ALA na asara ye ti vundu na ALA; na mbeni ngoi ALA ga azo so asara beoko na azo so mara ti aye ni so ayeke si na ala. 34  Teti ALA kangbi mawa na ala so ayeke na da ti kanga nga ALA yeda na ngia ti tene a mû aye ti ALA na ngangu, teti ALA hinga so ALA yeke na mbeni ye so ayeke nzoni ahon aye so, nga so ayeke ngbâ lakue lakue. 35  Tongaso, ALA zia pëpe lege ti sarango tënë na kamene pëpe, so futa ti pekoni ayeke kota. 36  Teti a lingbi ALA kanga bê, si na peko ti so ALA sara ye so bê ti Nzapa aye awe, ALA wara ye ti peko ti zendo ni. 37  Teti “na yâ ti kete ngoi, lo so angbâ ti ga so ayeke si na lo yeke ku kungo pëpe.” 38  “Me zo ti mbi so ayeke mbilimbili ayeke ngbâ na fini ndali ti mabe ti lo,” na “tongana lo kiri na peko, âme ti mbi ayeke duti na ngia na mbage ti lo pëpe.” 39  E yeke pëpe ti azo so ayeke kiri na peko si a futi ala, me e yeke ti azo so ayeke na mabe si a bata âme ti ala na fini.

Kete tënë