Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

aÉphésien 4:1-32

4  Tongaso, mbi so mbi yeke zo ti kanga ngbanga ti Seigneur, mbi voro yanga na ALA ti tambela alingbi na iringo ndo so lani a iri na ALA,  ti sara ye lakue na tâ be-ti-molenge nga na ngangu pëpe, ti duti na kangango bê ti ku; ALA kanga bê na mba na yâ ti ndoye,  ALA sara ngangu ti bata beoko ti yingo na yâ ti kamba ti siriri so abungbi ALA oko.  Tere ayeke oko, yingo ayeke oko, gi tongana ti so beku ayeke oko na yâ ti iringo ndo so a iri na ALA, beku so lani a iri ALA ndali ni;  Seigneur ayeke oko, mabe ayeke oko, batême ayeke oko;  Nzapa ayeke oko nga lo yeke Babâ ti azo kue, lo so ayeke na ndo ti aye kue, na lege ti aye kue nga na yâ ti aye kue.  A mû kota nzobe ni na zo oko oko na popo ti e alingbi na lege so Christ ahaka matabisi ni si lo mû.  Ndani la a tene: “Tongana lo montê na nduzu, lo gue na azo so a gbu ala na ngbâa. Lo mû akoli tongana amatabisi.”  Tënë “lo montê” aye ti tene nyen? A ye ti tene so lo zu nga na ando so ayeke na gbe ni, so ti tene na sese. 10  Lo so lo zu ayeke nga gi lo si amontê na nduzu kâ yongoro na peko ti ayayu kue, ti sara si aye kue aga tâ tënë. 11  Na lo mû ambeni tongana abazengele, ambeni tongana aprophète, ambeni tongana awafango nzoni tënë, ambeni tongana aberger na awafango ye. 12  Lo mû ala tongaso ti kiri na azo so ayeke nzoni-kue na nzoni lege, ti sara kua teti azo, na ti leke tere ti Christ, 13  juska e kue e ga oko na yâ ti mabe nga na yâ ti tâ hingango ye na ndo ti Molenge ti Nzapa, ti ga tongana mbeni koli so akpengba kue awe, ti yo ti lingbi na yongo so Christ ayo na ni kue; 14  ti tene e ngbâ akete molenge mbeni pëpe, so amapo ti ngu ayengi ala na so apupu ti fango ye kue ague na ala kirikiri na lege ti handa ti azo, nga na lege ti amvene so a leke ni na mayele. 15  Me na tenengo tâ tënë, zia e kono na lege ti ndoye na yâ ti ye kue na gbe ti lo so lo yeke li ni, so ti tene Christ. 16  A yeke na lege ti lo si tere ni kue asara si tere ni amaï na akpengba tere ti lo wani na yâ ti ndoye. Ti sara tongaso, a bungbi amembre ti tere ni oko ti mä tere, na a mû lege na ala ti sara kua maboko na maboko na lege ti ando oko oko so abio atingbi dä si ayeke mû na amembre ni ye so amanke ala, a lingbi na lege so membre oko oko ayeke sara kua alingbi na ngangu ti lo. 17  Tongaso, bâ tënë so mbi tene na so mbi kiri mbi tene ni na lê ti Seigneur la: Mbi tene so ALA tambela mbeni pëpe tongana ti azo ti dunia so, so ayeke tambela na peko ti abuba ye so ayeke na yâ ti li ti ala, 18  andâ hingango ndo ti ala ayeke na yâ ti bingo, nga ala gue yongoro na fini so alondo na Nzapa, ngbanga ti so hingango ndo ayeke na ala pëpe, ngbanga ti so bê ti ala akpengba. 19  Teti so ala dö nzoni lege ti tambela kue ala zia awe, ala bi tere ti ala na yâ ti sarango sioni ye na kamene pëpe ti sara sioni ye nde nde kue na bê ti warango ye. 20  Me ALA manda lani so Christ ayeke tongaso pëpe, 21  biani, tongana ALA mä lo lani nga a fa ye na ALA na lege ti lo, a lingbi na tâ tënë so Jésus afa ni, 22  a tene a yeke nzoni ALA zi ngbene zo so alingbi na ngbene lege ti sarango ye ti tere ti ALA na so ayeke buba gi bubango alingbi na anzara ti bê ti lo so ayeke handa zo; 23  me a yeke nzoni lakue a ngbâ ti sara si ALA kiri gi fini ni na yâ ti ngangu so ayeke fa lege na bibe ti ALA, 24  na a yeke nzoni ALA ngbâ lakue ti yü fini zo so a sara lo alingbi na ye so bê ti Nzapa aye na so ague oko na tâ lege ti mbilimbili nga na tâ lege ti dutingo be-ta-zo. 25  Ndani la, so ALA ke mvene awe so, zia zo oko oko na popo ti ALA atene tâ tënë na mba ti lo, teti e yeke amembre ti tere ti mba. 26  Tongana ngonzo asara ALA, ALA sara siokpari pëpe; ALA zia lâ akui na ndo ti ALA na ngonzo na bê pëpe, 27  nga ALA zia ndo na Zabolo pëpe. 28  Zia zo ti nzi anzi ye mbeni pëpe, me ahon ti nzi ye, zia lo sara kua ngangu, lo sara nzoni kua na maboko ti lo wani tongaso si lo wara mbeni ye ti kangbi na zo so ayeke na bezoin ni. 29  ALA zia fungo tënë asigigi na yanga ti ALA pëpe, me gi atënë so ayeke nzoni ti kpengba zo tongana a yeke ngoi ni, si a lingbi ti sara ye ti nzoni na azo so ayeke mä ni. 30  Nga, ALA mû vundu na yingo vulu ti Nzapa pëpe, yingo vulu so a sara na nzoroko na tere ti ALA ti ku na lango ti zingo ALA na lege ti ngere so a futa ti zi azo. 31  ALA zi batango zo na bê, songo bê, ngonzo, dengo kongo na ndo ti zo na zonga, ALA zia ni yongoro kâ, ALA zi nga asioni ye kue. 32  Me ALA sara nzoni na mba, ALA bâ mawa ti zo mingi, ALA pardone mba na popo ti ALA na bê ti ALA kue legeoko tongana ti so Nzapa nga apardone ALA na bê ti lo kue na lege ti Christ.

Kete tënë