Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

aÉphésien 2:1-22

2  A yeke ALA si Nzapa amû fini na ALA, atâa so ALA kui lani awe na yâ ti afaute nga na asiokpari ti ALA  so ALA tambela dä ândö alingbi na aye ti dunia so; a lingbi nga na mokonzi so ayeke na ndo ti komandema ti pupu so angoro e, yingo so ayeke sara kua fadeso na yâ ti amolenge ti kengo yanga.  Biani, a yeke na popo ti azo so si ândö e yeke sara ye alingbi na anzara ti mitele ti e, e yeke sara aye so mitele na bibe aye, nga ngbene ye so a dü e, e yeke amolenge so e lingbi na ngonzo ti Nzapa tongana ti atanga ni.  Me ndali ti kota ndoye so lo ndoye na e, Nzapa, so ayeke sara nzoni bê mingi na zo,  asara si e kiri na fini legeoko na Christ, atâa so e kui lani awe na yâ ti afaute ti e. A yeke ndali ti kota nzobe ti Nzapa si a sö ALA so.  Nzapa azingo e legeoko na Christ na lo zia e ti duti legeoko na Christ ni na yayu, teti e yeke azo so asara beoko na Christ Jésus,  si na yâ ti aye ti ngoi so ayeke ga, a lingbi ti fa na gigi mosoro ti kota nzobe ti lo so ayeke mingi ndali ti so lo sara nzoni bê na mbage ti e so e yeke azo so asara beoko na Christ Jésus.  Biani, na lege ti kota nzobe so, a sö ALA na lege ti mabe; ye ni so ayeke mbeni ye so alondo na ALA wani pëpe, me a yeke matabisi so Nzapa amû na ALA.  Songo ALA ni ayeke ngbanga ti akusala pëpe, si mbeni zo awara ti lo mbeni ye ti pikango kate ndali ni pëpe. 10  Teti e yeke kusala ti maboko ti Nzapa na lo sara e na lege ti beoko so e yeke na ni na Christ Jésus ti sara anzoni kusala, akusala so Nzapa afa ni ândö awe ti tene e sara ni. 11  Tongaso, ALA girisa pëpe so ândö, na lege ti mitele, ALA yeke azo ti amara; na azo so afâ ganza awe, ganza so maboko ti zo si afâ ni, ayeke iri lani ALA azo so afâ ganza pëpe. 12  ALA girisa pëpe so na ngoi ni so ALA yeke lani na Christ pëpe, ALA yeke yongoro na mara ti Israël, nga teti so ALA yeke awande, tënë ti ambele ti zendo ni abâ ALA pëpe; ALA yeke lani na beku oko pëpe nga ALA yeke na Nzapa pëpe na yâ ti dunia ni. 13  Me so fadeso ALA yeke beoko na Christ Jésus, ALA so ândö ALA yeke yongoro na Nzapa, ALA ga nduru na lo na lege ti mênë ti Christ ni. 14  Teti Christ ayeke siriri ti e, lo so asara si abungbi use so aga oko nga lo kungbi gbagba so aluti ti kangbi popo ti ala. 15  Na lege ti mitele ti lo, lo zi ye so adü kengo tere ni, so ti tene Ndia, so na yâ ni a yeke wara acommandement na ambela, si lo sara abungbi use so ti ga oko na lo na ti ga mbeni fini zo oko, nga lo sara si siriri akiri na popo ti ala; 16  nga, na lege ti keke ti pasi ti lo, lo sara si abungbi use so akiri asara songo biani biani na Nzapa na ala ga tere oko, ngbanga ti so lo fâ lani kengo tere ni na lege ti lo wani. 17  Na lo ga lo fa nzoni tënë ti siriri na ALA, ala so ayeke yongoro nga na ala so ayeke nduru, 18  ngbanga ti so na lege ti lo, e abungbi use so, e wara lege ti ga nduru na Babâ ni na lege ti yingo oko. 19  Tongaso, ALA yeke awande mbeni pëpe wala awande so aga gango si asara kodoro pëpe, me ALA yeke amolenge ti kodoro legeoko na azo so ayeke nzoni-kue nga ALA yeke azo ti da ti Nzapa, 20  na a leke ALA na ndo ti gere ti da ni so ayeke abazengele nga na aprophète, na Christ Jésus ayeke ti lo kozo tênë ti gere ti da ni. 21  Na yâ ti lo, ambage ti tere ti da ni kue atingbi oko nga a kono ti ga mbeni temple so ayeke nzoni-kue ndali ti Jéhovah. 22  Na yâ ti lo nga, a yeke leke ALA legeoko ti ga mbeni ndo so Nzapa aduti na yâ ni na lege ti yingo ti lo.

Kete tënë