Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

Philémon 1:1-25

1  Paul, zo ti kanga ndali ti iri ti Christ Jésus, legeoko na Timothée ita ti e, atokua mbeti so na mo Philémon so e ndoye mo mingi nga mba ti e wakua,  na ita ti e ti wali Apphia, na Archippe, mba ti e turugu ti Christ, nga na congrégation so ayeke na yâ ti da ti mo:  Zia kota nzobe nga na siriri so alondo na Nzapa Babâ ti e nga so alondo na Seigneur Jésus Christ aduti na ALA.  Mbi yeke kiri singila lakue na Nzapa ti mbi na ngoi so mbi yeke sara tënë ti mo na yâ ti asambela ti mbi,  teti mbi ngbâ lakue ti mä tënë ti ndoye ti mo nga na ti mabe so mo yeke na ni na mbage ti Seigneur Jésus nga so mo yeke na ni na mbage ti azo kue so ayeke nzoni-kue.  Mbi yeke kiri singila lakue na Nzapa ti tene mabe so mo yeke fa ni na mbage ti amba ti mo angbâ ti sara kusala, na lege so mo hinga so nzoni ye kue so ayeke na popo ti e ague tâ gi oko na Christ.  Mbi wara ngia mingi nga bê ti mbi adë ndali ti ndoye ti mo, ngbanga ti so yengo tere so ayeke na popo ti azo so ayeke nzoni-kue akiri akpengba ndali ti mo, ita ti mbi.  Ni la, atâa so na yâ ti Christ mbi lingbi fade ti mû yanga na mo na kamene oko pëpe ti sara ye so ayeke na lege ni,  mbi ye gi ti wa mo na lege ti ndoye, teti na bango duti ti mbi Paul so mbi duti na ni so, bâ mbi ga mbakoro awe, mbi yeke nga fadeso zo ti kanga ndali ti Christ Jésus; 10  mbi yeke wa mo na ndo ti molenge ti mbi, Onésime, lo so mbi ga babâ ti lo na ngoi so mbi yeke na yâ ti zingiri; 11  kozo lo yeke ye oko pëpe ndali ti mo, me fadeso lo yeke nzoni mingi ndali ti mbi na mo kue. 12  Mbi yeke tokua lo ti kiri na mo kâ; lo yeke zo so mbi ye lo na bê ti mbi kue. 13  Mbi ye fade ti zia lo ti ngbâ na tere ti mbi si lo ngbâ ti sara kusala na mbi na place ti mo na yâ ti zingiri so mbi yeke dä ndali ti nzoni tënë. 14  Me so mo mû yanga na mbi pëpe, mbi lingbi ti sara mbeni ye oko pëpe, si nzoni ye so mo sara aduti ye so a gbu mo gbungo na ngangu ti sara ni pëpe, me ye so mo sara na bê ti mo wani. 15  Âmanke a yeke ndali ti ye so si lo kpe teti kete ngoi, ti tene na pekoni awe si lo kiri na mo biaku biaku 16  tongana ngbâa mbeni pëpe, me tongana mbeni zo so ahon ngbâa, so ti tene mbeni ita so e ndoye lo mingi; ti mbi, mbi ndoye lo mingi, me ti mo, mo yeke ndoye lo mingi ahon mbi na yâ ti songo ti mo na lo na lege ti mitele nga na yâ ti Seigneur. 17  Ni la, tongana mo bâ mbi tongana mbeni mba ti mo, a yeke nzoni mo yamba lo na nzoni bê tongana ti so mo yeke yamba fade na mbi. 18  Nga, tongana ândö lo sara na mo mbeni ye so ayeke na lege ni pëpe wala mbeni ye ti mo ayeke na li ti lo, mo zia ni kue na li ti mbi. 19  A yeke mbi Paul si mbi yeke sû mbeti so na maboko ti mbi: Fade mbi yeke kiri na aye ni na mo; mbi de mbi tene na mo pëpe: kuda ti mbi nga ayeke na li ti mo, kuda ni ayeke fini ti mo. 20  Ti tâ tënë ni, ita ti mbi, zia mbi bâ nzoni na maboko ti mo, ngbanga ti so mbi na mo e sara beoko na yâ ti Seigneur: Mo zia si yengo tere so ayeke na popo ti mbi na mo akiri akpengba ndali ti so e sara beoko na Christ. 21  So mbi yeke sû mbeti so na mo, mbi mä na bê so mo yeke yeda na ni, na mbi hinga so mo yeke sara ni ande ahon ti so mbi tene. 22  Me na mbage, mo leke ndo ti lango ndali ti mbi, teti mbi yeke na beku so ndali ti asambela ti ALA, a yeke zi mbi ande na kanga ndali ti nzoni ti ALA. 23  Épaphras, mba ti mbi zo ti kanga ndali ti Christ Jésus, atokua bara ti lo na mo; 24  Marc, Aristarque, Démas na Luc so ayeke amba ti mbi wakua atokua nga bara ti ala na mo. 25  Zia kota nzobe ti Seigneur ti e Jésus Christ aduti na bibe so ALA yeke na ni so.

Kete tënë