Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

2 Pierre 2:1-22

2  Ye oko, tongana ti so aprophète ti wataka ayeke lani na popo ti azo ti Israël, fade awafango ye ti wataka ayeke duti na popo ti ALA nga. Na mayele, azo so ayeke ga na asecte so ayeke ga na kuâ na zo si ala yeke lï na ni na popo ti ALA, na ala yeke gue juska ti ke wa ti ala so avo ala vongo, si ala iri futingo hio tongaso na ndo ti ala wani.  Nga, azo mingi ayeke tï na peko ti asioni ye so ala yeke sara na kamene pëpe, na ndali ti ala, azo ayeke sara sioni tënë ti lege ti tâ tënë.  Nga, na bê ti warango ye, azo so ayeke wara go na ndo ti ALA na lege ti atënë so a ba yâ ni bango. Me ti azo so, ngbanga ti ala so a dë ni ândö awe ayeke ga yeke yeke pëpe nga futingo ti ala ayeke lango pëpe.  Biani, Nzapa agbanzi lani tere ti lo pëpe ti se a-ange so asara lani siokpari, me so lo bi ala na yâ ti Tartare awe, lo zia ala na yâ ti kota dû so avuko pitipiti ti bata ala ti ku na ngbanga.  Nzapa agbanzi nga tere ti lo pëpe ti se mbeni dunia ândö, me lo bata Noé, wafango tënë ti ye so ayeke mbilimbili, lo bata lo na ambeni zo mbasambala na ngoi so lo ga na kota ngu so apika na ndo ti mbeni dunia ti azo so akpe Nzapa pëpe.  Nga, so lo sara si agbata ti Sodome na Gomorrhe aga mburu ti wâ, lo fâ ngbanga na ndo ti akodoro so, si lo zia ni tongana mbeni tapande ndali ti azo so akpe Nzapa pëpe, tapande ti aye so ayeke ga.  Me lo zi Lot so ayeke zo ti mbilimbili, lo so vundu asara lo mingi ndali ti asarango ye ti azo so ayeke buba ndia ti Nzapa si ayeke sara sioni ye na kamene pëpe  (teti na ngoi so zo ti mbilimbili so ayeke sara kodoro na popo ti ala lâ na lâ, âme ti lo so ayeke mbilimbili awu pono na lege ti ye so lo bâ nga so lo mä ndali ti sarango ye ti ala so ague nde na ndia).  Aye so kue afa so Jéhovah ahinga tongana nyen ti zi na yâ ti tara azo so agbu tënë ti lo ngangu, me lo hinga ti bata azo so ayeke mbilimbili pëpe ti ku na lâ ti ngbanga si a lungula ala, 10  mbilimbili ala so ague na peko ti mitele na nzara ti sara si mitele ni aga sioni na ala yeke bâ ala so akomande* na ndo ti ala tongana ambumbuse zo. Mbeto asara ala oko pëpe, li ti ala akpengba, ala yeke dö na mbeto pëpe na gbele azo so Nzapa amû na ala gloire, me ala yeke tene asioni tënë, 11  andâ a-ange, atâa so ala lingbi ti ala ti sara ye mingi nga ala yeke ti ala ngangu mingi, azia tënë na li ti awafango ye ti wataka so pëpe na tenengo asioni tënë; ala sara tongaso pëpe ndali ti so ala kpe mbeto ti Jéhovah. 12  Me akoli so ayeke tongana anyama so ayeke na hingango ndo pëpe, anyama so a dü ala gi ti tene a gbu ala a fâ ala, fade a yeke futi ala na yâ ti sarango ye ti ala so alingbi na futingo ndali ti aye so ala hinga ni pëpe si ala yeke sara sioni tënë ni so; 13  ala yeke sara sioni na tere ti ala wani, so ayeke futa ti asioni ti ala la. Ala bâ ti ala sarango ye alingbi na anzara ti bê ti ala na kota lâ tongana ye so ayeke ga na ala ngia. Ala yeke asaleté nga asioni ye; na nzerengo tere kue, ala yeke bi tere ti ala na yâ ti afango ye ti ala ni so ahanda zo, na oko ngoi so ala yeke sara matanga legeoko na ALA. 14  Lê ti ala asi singo na nzara ti gingo wali nde na ala zia lege ti siokpari gbä, nga ala yeke handa a-âme so gere ti ala aluti kpô pëpe. Ala yeke na mbeni bê so a fa lege na ni ti sara bê ti ye. Ala yeke amolenge so a deba ala awe. 15  Ala dö nzoni lege azia awe, si ala yeke handa tere ti ala wani. Ala mû lege ti Balaam, molenge ti Béor, lo so andoye futa ti peko ti sioni sarango ye, 16  me a suku na lo ndali ti so lo doro ye so ayeke mbilimbili. Mbeni nyama ti yongo kungba so ayeke sara ka tënë pëpe asara tënë na lo na go ti zo nga akanga lege na buba ye so prophète ni aye ti sara. 17  Azo so ayeke ali ti ngu so ngu ayeke dä pëpe, ala yeke ambinda so kota pupu ayeke hon na ni hongo, na a leke vukungo ndo ti bingo ti ku na ala. 18  Teti ala yeke tene atënë ti baba so aga na ye ti nzoni na zo pëpe, nga na lege ti anzara ti mitele na asioni sarango ye, ala handa ala so alondo ti sigigi fade fadeso na maboko ti azo so na lege ti sarango ye ti ala, ala girisa lege awe. 19  Atâa so ala mû zendo ti mû liberté na azo so, ala wani ayeke angbâa ti aye so abuba awe. Teti zo so mbeni zo ahon lo na ngangu, zo ni amû lo na ngbâa awe. 20  Tâ tënë, tongana ala sigigi awe na yâ ti asioni ye ti dunia so na lege ti tâ hingango ye na ndo ti Seigneur nga na Sauveur Jésus Christ, me ala kiri ala yôro tere ti ala na yâ ni si a mene ala kue, dutingo ti ala ti nda ni aga sioni mingi ahon ti kozoni. 21  Teti a yeke fade nzoni mingi ndali ti ala tongana ala hinga pëpe tâ lege ti mbilimbili, ahon ti tene na peko ti so ala hinga ni awe ala kiri aturnê peko na commandement so ayeke nzoni-kue so a fa ni na ala. 22  Ye ni asi na ala alingbi na tënë ti mato so: “Mbo akiri na tere ti dengo ti lo wani, na mama ti gaduru so a sukula lo awe akiri akpaka tere ti lo na yâ ti popoto.”

Kete tënë

Ge, tënë “ala so akomande” andu Nzapa na azo so lo mû komandema na ala.