Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

2 Pierre 1:1-21

1  Mbi Simon Pierre, ngbâa nga bazengele ti Jésus Christ, mbi tokua mbeti so na ala so ayeda na mabe so anzoni ye ti pekoni ayeke oko na ti e, na lege ti mbilimbili ti Nzapa ti e nga na Sauveur Jésus Christ:  Zia Nzapa angbâ ti mû kota nzobe nga na siriri ti lo mingi mingi na ALA na lege ti tâ hingango ye na ndo ti Nzapa nga na ndo ti Jésus Seigneur ti e,  ngbanga ti so ngangu ti lo, so ayeke ti Nzapa, amû na e senge senge aye kue so andu fini nga na gbungo tënë ti Nzapa ngangu, na lege ti tâ hingango ye na ndo ti lo so airi e na lege ti gloire nga na sarango ye so ayeke nzoni mingi.  Na lege ti aye ni so, lo mû na e senge senge azendo so ngere ni ayeke ngangu nga ayeke kota mingi, si na lege ti aye ni so ALA ga azo so awara mara ti dutingo ti Nzapa, teti ALA sigigi awe na yâ ti sarango ye ti dunia so, asarango ye so abuba awe ndali ti asioni nzara ti bê.  Ndani la, ti ALA, na sarango ngangu kue ti sara ye alingbi na aye so, ALA zia sarango ye so ayeke nzoni mingi na ndo ti mabe ti ALA; ALA zia hingango ye na ndo ti sarango ye so ayeke nzoni mingi;  ALA zia kangango nzara ti bê na ndo ti hingango ye; ALA zia gbungo ngangu na ndo ti kangango nzara ti bê; ALA zia gbungo tënë ti Nzapa ngangu na ndo ti gbungo ngangu;  ALA zia yengo tere ti aita na ndo ti gbungo tënë ti Nzapa ngangu nga ALA zia ndoye na ndo ti yengo tere ti aita.  Tongana aye so ayeke na ALA na ayeke mingi mingi, fade a yeke kanga lege na ALA ti duti gi senge senge nga a yeke mû lege na ALA ti lë lengo tongana a ndu tënë ti tâ hingango ye na ndo ti Seigneur ti e Jésus Christ.  Teti tongana aye so ayeke na mbeni zo pëpe, lo yeke waziba, lo kanga lê ti lo si lo bâ lumière pëpe, nga lo girisa so a sukula asiokpari ti lo ti ândö awe. 10  Ndani la, aita, ALA sara ngangu kue ti sara si iringo so a iri na ALA nga sorongo so a soro na ALA aduti tâ ye biani; teti tongana ALA ngbâ ti sara aye so, fade ALA yeke tï lâ oko pëpe. 11  Biani, a yeke tongaso si fade a yeke mû lege na ALA nzoni ti lï na yâ ti royaume ti Seigneur na Sauveur ti e Jésus Christ, royaume so ayeke ngbâ lakue lakue. 12  A yeke ndali ti tënë so si mbi yeke duti lakue nduru ti dabe ti ALA na aye so, atâa so ALA hinga ni awe na ALA luti ngangu na yâ ti tâ tënë so ALA hinga ni so. 13  Me, na ngoi so mbi ngbâ na yâ ti tabernacle so, mbi bâ so a yeke nzoni ti zingo ALA na lege ti atënë ti dango bê so, 14  teti mbi hinga so mbi ga nduru ti zi tabernacle ti mbi ni awe, gi tongana ti so Seigneur ti e Jésus Christ asara tënë ni lani na mbi. 15  Tongaso mbi yeke sara ngangu kue ti tene na peko ti hongo ti mbi, ALA wani awara lege ti dabe ti ALA na aye so. 16  A yeke pëpe na lege ti ambaï ti mvene so a leke pekoni na kode si e fa na ALA tënë ti ngangu ti Seigneur ti e Jésus Christ nga na ngoi so lo yeke si na lo yeke duti dä, me a yeke na lege so e ga azo so abâ gloire ti lo tâ na lê ti e. 17  Teti lo wara gonda na gloire so alondo na Nzapa Babâ ni tongana a sara tënë so na lo na lege ti gloire so ayeke pendere mingi, a tene: “So ayeke Molenge ti mbi so mbi ndoye lo mingi, lo so bê ti mbi anzere na mbage ti lo.” 18  Tâ tënë, e mä lani atënë ni so, so alondo na yayu, na ngoi so e yeke na tere ti lo na ndo ti hoto so ayeke nzoni-kue. 19  Ndani la, e yeke na tënë ti prophétie ni so akiri aga tâ ye ahon ti kozo; na ALA sara nzoni tongana ALA dengi mê ti ALA na ni mo bâ mo tene mbeni lampe so ayeke za lumière na mbeni ndo so ayeke bingo, na yâ ti bê ti ALA, juska ndo ahan na tongoro ti ndapre asigigi. 20  Teti ALA hinga ye so kozoni: mbeni prophétie ti Mbeti ti Nzapa alondo pëpe na lege ti fango peko ti ye so mbeni zo afa na li ti lo wani. 21  Teti aprophétie aga lâ oko pëpe na lege ti ye so bê ti zo aye, me azo asara tënë ti ye so alondo na Nzapa tongana yingo vulu afa lege ni na ala.

Kete tënë