Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

2 aThessalonicien 1:1-12

1  Paul, Sylvain na Timothée atokua mbeti so na azo ti congrégation ti Thessalonique so asara beoko na Nzapa Babâ ti e nga na Seigneur Jésus Christ:  Zia kota nzobe nga na siriri so alondo na Nzapa Babâ ni nga so alondo na Seigneur Jésus Christ aduti na ALA.  Aita, e bâ so a yeke ngbanga ti e ti kiri singila lakue na Nzapa ndali ti ALA, na a yeke na lege ni ti sara tongaso, ngbanga ti so mabe ti ALA angbâ gi ti kono mingi nga ndoye so ALA oko oko kue ayeke na ni si ALA yeke fa na popo ti ALA angbâ gi ti maï.  Ni la, e pika kate ti e na ndo ti ALA na yâ ti acongrégation ti Nzapa ngbanga ti gbungo ngangu ti ALA nga na mabe ti ALA na yâ ti aye ti ngangu kue so a sara na ALA nga na yâ ti aye ti vundu so ALA yeke kanga bê ti ALA dä.  Aye so kue afa polele so fango ngbanga ti Nzapa ayeke mbilimbili, na a yeke sara si a diko ALA azo so alingbi na royaume ti Nzapa so biani ALA yeke bâ pasi ndali ni.  Teti biani na lê ti Nzapa a yeke na lege ni ti tene lo kiri peko ti vundu na azo so ayeke sara ye ti vundu na ALA,  me ti ALA, so ALA yeke bâ pasi na ye ti vundu ni, e na ALA e yeke wu pupu na ngoi so Seigneur Jésus ayeke sigigi* na yayu, lo na angangu ange ti lo,  na yâ ti mbeni menga-wa, tongana lo yeke futa kula na azo so ahinga Nzapa pëpe nga na azo so asara ye alingbi pëpe na nzoni tënë na ndo ti Seigneur ti e Jésus.  Ala ni so ayeke wara ande ngbanga so ayeke futingo ti biani biani, na ala yeke girisa na lê ti Seigneur nga na gbele gloire ti ngangu ti lo, 10  na ngoi so lo yeke ga ti tene a mû gloire na lo tënë ti azo ti lo so ayeke nzoni-kue, na ti tene na lango ni so azo so abâ lo, bê ti ala adö tënë ti ala kue so ayeke lani na mabe, ngbanga ti so tënë so e fa, ALA yeda na ni na mabe. 11  A yeke ndali ti atënë so si lakue e yeke sambela ndali ti ALA, ti tene Nzapa ti e adiko ALA azo so alingbi na iringo ndo so lo iri na ALA, nga ti tene na ngangu ti lo, lo sara biani ye kue ti nzoni so a nzere na lo ti sara, na lo sara si kusala so ALA sara ni na mabe ahunzi kue, 12  si a lingbi ti mû gloire na iri ti Seigneur ti e Jésus na lege ti ALA, na ALA nga a mû gloire na ALA legeoko na lo, a lingbi na kota nzobe ti Nzapa ti e nga na ti Seigneur Jésus Christ.

Kete tënë

Wala “lo fa tere ti lo na gigi.”