Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

2 aCorinthien 9:1-15

9  Âdu ti kusala so a sara ni ndali ti ala so ayeke nzoni-kue, mbi bâ so a yeke kota ye pëpe ti sû mbeti na ALA ndali ni.  Mbi hinga so bê ti ALA aye biani ti mû ye, na mbi pika kate na ndo ti ALA na lê ti aita ti Macédoine ndali ni, mbi tene so a sara ngu oko awe si aita ti sese ti Achaïe aleke tere ti ala ti mû ye, nga yapungo tere ti ALA so azia nzara ti sarango ye na bê ti mingi ti aita ti Macédoine.  Me mbi yeke tokua aita ni si, na ndo ti tënë so, pikango kate ti e na ndo ti ALA angbâ senge pëpe, me ti tene ALA leke tere ti ALA biani awe tongana ti so mbi yeke tene lani.  Tongaso pëpe, tongana a si so mbi na aita ti Macédoine e gue kâ na aita ni abâ so a de ALA leke tere ti ALA pëpe, gi ALA oko pëpe me e nga kue si e yeke duti ande na kamene ngbanga ti so e zia bê ti e kue na ndo ti ALA.  Ni la mbi bâ so a yeke nzoni ti hunda na aita ni ti si ti ala kozoni na ALA kâ, nga ti bungbi kozoni matabisi ti nzobe so ALA mû zendo awe ti mû, tongaso si ye ni alingbi ti duti nduru tongana mbeni matabisi so a mû ni na nzobe, me pëpe mbeni ye so a mû ni mungo na likisi na tïtî ALA.  Me na ndo ti tënë so mbi tene fade, zo so alu ye kete kete, fade lo ko ni kete kete nga; na zo so alu ye mingi mingi, fade lo ko ni mingi mingi nga.  Zia zo oko oko asara tongana ti so lo leke na bê ti lo ti sara, na vundu na bê pëpe wala a gbu lo gbungo na ngangu pëpe, teti Nzapa andoye zo so amû ye na ngia.  Nga, Nzapa alingbi ti sara si kota nzobe ti lo kue asi singo na ndo ti ALA, si atâa so ALA yeke na aye kue a lingbi ALA awe, ALA lingbi ti wara aye mingi ti mû lege na ALA ti sara na nzoni kusala kue.  (Legeoko tongana ti so a sû na Mbeti ti Nzapa, a tene: “Lo kangbi ye mingi mingi, lo mû ye na awayere, mbilimbili ti lo angbâ lakue lakue.” 10  Lo so amû ngongoa mingi na zo ti lungo ye nga mapa ti tengo ni, fade lo mû na ALA ngongoa ti tene ALA lu na lo sara si ngongoa ni awu nga fade lo sara si aye ti peko ti mbilimbili ti ALA awu mingi.) 11  Nzapa airi tënë nzoni na ndo ti ALA na yâ ti ye kue si na alege nde nde kue ALA lingbi ti mû ye mingi na azo, si na lege ti ye so e sara, mara ti mungo ye mingi tongaso apusu azo ti kiri singila na Nzapa, 12  teti kusala so ALA yeke sara ni ndali ti nzoni ti azo ayeke gi pëpe mungo na azo so ayeke nzoni-kue aye mingi so atia ala, me nga a yeke ti sara si a kiri singila mingi na Nzapa. 13  Ndali ti ye so kusala so asara, azo ni amû gloire na Nzapa ngbanga ti so ALA yeda na nzoni tënë na ndo ti Christ, tongana ti so ALA tene ni polele na yanga ti ALA, na ngbanga ti so ALA mû na nzoni bê matabisi mingi na azo so ayeke nzoni-kue nga na azo kue. 14  Azo so ayeke nzoni-kue avoro tere mingi na Nzapa ndali ti ALA, na ala ye mingi ti bâ ALA ngbanga ti kota nzobe ti Nzapa so ayeke na ndo ti ALA, kota nzobe so mbeni ye ti lingbi na ni ayeke dä pëpe. 15  Singila na Nzapa ndali ti matabisi ti lo so lo mû ni senge senge, so a lingbi ti fa nda ni kue pëpe.

Kete tënë