Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

2 aCorinthien 5:1-21

5  E hinga so tongana a si so da ti e so ayeke na sese, so ti tene tente so, abuba, fade e yeke wara na yayu mbeni da so alondo na Nzapa, mbeni da so maboko ti zo si asara pëpe, so angbâ lakue lakue.  E yeke dema biani na ngoi so e yeke na yâ ti da ti lango so, na e ye mingi ti yü da so ayeke ti e so ayeke ti yayu,  si na peko ti so e yü ni awe, a yeke wara ande e na tere senge pëpe.  Biani, e so e yeke na yâ ti tente so, e yeke dema, na ye ahon ndo ti e awe; teti e ye pëpe ti zi da ni so na tere ti e, me ti yü mbeni da ni so, si fini amene ye so ayeke kui kuingo.  A yeke Nzapa si aleke e ndali ti ye so, lo si amû na e mbeni ye ti fa atene ye so ayeke ga ayeke si biani, ye ni so lo mû na e ayeke yingo ti lo.  Tongaso, lakue e yeke na mbeto oko pëpe na e hinga so na ngoi so e ngbâ na yâ ti da ti e so ayeke tere ti e ti zo, e yeke yongoro na Seigneur,  teti e yeke tambela na lege ti mabe, me pëpe na lege ti ye so lê abâ.  Me e yeke na mbeto oko pëpe nga a nzere na e mingi ti duti yongoro na tere ti e ti zo na ti gue ti sara kodoro na Seigneur.  Tongaso e nga, wala a yeke na ngoi so e yeke sara kodoro na lo wala e yeke yongoro na lo, e zia na gbele e ti nzere na lê ti lo. 10  A lingbi e kue e luti na gbele ngbanga ti Christ, si zo oko oko awara futa ti aye so lo yeke sara na yâ ti tere ti lo ti zo, a lingbi na aye so lo yeke sara, wala a yeke ye ti nzoni wala a yeke ye ti sioni. 11  So e hinga kpengo mbeto ti Seigneur awe, e yeke ngbâ ti ga na azo ti yeda na tënë so e fa, me Nzapa ahinga e na asarango ye ti tere ti e nzoni mingi. Ye oko, mbi yeke na beku so yingo-ti-hinga ti ALA amû nga lege na ALA ti hinga e na asarango ye ti tere ti e nzoni mingi. 12  E kiri e yeke sara nzoni tënë ti e na ALA la pëpe, me e yeke fa na ALA mbeni ye so ayeke pusu ALA ti pika kate ti ALA ndali ti e, si ALA lingbi ti kiri tënë na azo so ayeke pika kate ti ala ndali ti ye so lê abâ, me ala yeke pika kate ti ala pëpe ndali ti ye so ayeke na yâ ti bê ti zo. 13  Teti tongana e yeke lani azo so li ti ala ayeke dä pëpe, a yeke ndali ti Nzapa; me tongana e yeke azo so abata bibe ti ala nzoni, a yeke ndali ti ALA. 14  Teti ndoye so Christ ayeke na ni apusu e ti sara ye, ngbanga ti ye so e bâ ayeke so: zo oko akui ndali ti azo kue; tongaso azo kue akui fade awe; 15  na lo kui ndali ti azo kue si ala so ayeke na fini, ala lingbi ti ngbâ na fini ndali ti ala wani mbeni pëpe, me ndali ti lo so akui ndali ti ala na so a zingo lo na kuâ. 16  Ndani la, ti fadeso, e hinga mbeni zo oko pëpe na lege ti mitele. Atâa tongana e hinga lani Christ na lege ti mitele, biani a yeke tongaso si e hinga lo fadeso mbeni pëpe. 17  Tongaso, tongana mbeni zo ayeke beoko na Christ, lo yeke mbeni fini création; angbene ye ahon awe, bâ, afini ye abâ gigi. 18  Me aye kue alondo na Nzapa, lo so asara si songo akiri na popo ti e na lo na lege ti Christ, nga lo mû na e kusala ti kiringo na songo, 19  so ti tene so, na lege ti Christ, Nzapa ayeke kiri na songo na popo ti lo na azo ti dunia; lo yeke diko afaute ti ala pëpe, na lo zia na tïtî e tokua ti kiringo na songo ni. 20  Tongaso e yeke alembe na place ti Christ, mo bâ mo tene na lege ti e Nzapa ayeke voro yanga na azo. Tongana azo so ayeke na place ti Christ, e voro azo, e tene: “ALA kiri ALA sara songo na Nzapa.” 21  Lo so lani lo sara siokpari lâ oko pëpe, Nzapa asara si lo ga siokpari ndali ti e, si na lege ti lo e ga mbilimbili na lê ti Nzapa.

Kete tënë