Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

2 aCorinthien 4:1-18

4  Ni la, so e wara kusala so ndali ti so Nzapa asara nzoni bê na e, e yeke kiri na peko pëpe;  me e ke awe aye so a sara na gbemingo na so a sara zo kamene, na e yeke tambela pëpe na lege ti mayele, nga e yeke ba yâ ti tënë ti Nzapa pëpe, me na sarango si tâ tënë asigigi polele, na lê ti Nzapa e yeke sara nzoni tënë ti e na gbele yingo-ti-hinga ti azo kue.  Tongana biani a yeke honde na gbe ti voile nzoni tënë so e yeke fa ni, a yeke honde ni na gbe ti voile na popo ti azo so ayeke gue ti wara futingo.  A yeke na popo ti azo so si nzapa ti aye ti ngoi so asara si bibe ti azo so amä na bê pëpe avuko, tongaso si sungo ti nzoni tënë ti gloire na ndo ti Christ, so ayeke image ti Nzapa, asu na ndo ti ala pëpe.  Teti e yeke fa tënë na ndo ti e wani pëpe, me na ndo ti Christ Jésus tongana Seigneur, na e wani tongana angbâa ti ALA ndali ti Jésus.  A yeke Nzapa si atene: “Zia lumière alondo na yâ ti bingo aza”, na lo za lumière na ndo ti bê ti e ti sara si na lege ti lê ti Christ pendere hingango ye na ndo ti Nzapa asu na ndo ni.  Ye oko, e yeke na mosoro so na yâ ti ata ti sese, si ngangu so ahon ti so zo ayeke na ni aduti ti so alondo na Nzapa, me na e wani pëpe.  A pete e mbage na mbage kue, me e lingbi lakue ti yengi tere ti e; e hinga mbeni ye ti sarango ni pëpe, me lakue e wara mbeni lege ti sigigi dä;  azo asara ye ti ngangu na e, me a dö e a zia gi tongaso pëpe; a kinda e, me a futi e pëpe; 10  Lakue nga na ndo kue, na yâ ti tere ti e, e yeke hinga apasi ti kuâ so a sara na Jésus, si a lingbi ti bâ fini ti Jésus na yâ ti tere ti e. 11  Teti e so e yeke na fini, e yeke tingbi lakue na kuâ lê na lê ndali ti Jésus, si a lingbi nga ti bâ fini ti Jésus na yâ ti tere ti e so ayeke kui kuingo. 12  Tongaso kuâ ayeke sara kusala na yâ ti e, me fini ayeke sara kusala na yâ ti ALA. 13  Teti e yeke na mabe* so ayeke oko na ti so a sû tënë ni na Mbeti ti Nzapa, a tene: “Mbi duti lani na mabe, ndani la mbi sara tënë”, e nga kue e duti na mabe, ndani la e sara tënë, 14  teti e hinga so lo so azingo lani Jésus na kuâ, lo yeke zingo e ande nga legeoko na Jésus, na lo yeke mû e na ALA kue ti gue na ni na gbele lo. 15  Teti aye kue ayeke ndali ti ALA, si kota nzobe ti Nzapa so awu mingi awe akiri aga gbani gbani ngbanga ti azo mingi so ayeke kiri singila na lo, na tongaso a yeke sara si Nzapa awara gloire mingi. 16  Tongaso e kiri na peko pëpe, me atâa zo ti e ti gigi ayeke buba bubango, zo ti e ti yâ ni angbâ ti lo ti kiri fini lâ na lâ. 17  Atâa so ye ti vundu ni ayeke ye so aninga pëpe nga ye so ayapu, a yeke sara si e wara mbeni gloire so angbâ gi ti ga kota mingi nga ayeke ti lakue lakue; 18  na oko ngoi ni e zia lê ti e pëpe na ndo ti aye so lê ayeke bâ, me na ndo ti aye so lê ayeke bâ pëpe. Teti aye so lê ayeke bâ ayeke ti kete ngoi, me aye so lê ayeke bâ pëpe ayeke ti lakue lakue.

Kete tënë

Na Grec: “yingo ti mabe.”