Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

2 aCorinthien 13:1-14

13  Mbi yeke gue na ALA kâ ti fani ota ni la. “Na lege ti tënë ti yanga ti atémoin use wala ota, gere ti tënë kue aluti nzoni.”  Mbi tene kozo awe, na mbi yeke gboto mê ti ala so asara lani siokpari nga na atanga ni kue, mo bâ mo tene mbi yeke na tere ti ALA ti fani use ni awe, andâ mbi yeke na tere ti ALA pëpe, so tongana mbi kiri mbi si kâ fade mbeni zo ti kpe sengo ndo ayeke ti lo dä pëpe,  teti ALA yeke gi ti bâ mbeni ye so afa atene Christ ayeke sara tënë na lege ti mbi, Christ so awoko pëpe na yâ ti songo ti lo na ALA, me lo yeke ngangu na popo ti ALA.  Ti tâ tënë ni, a yeke ndali ti wokongo si a kanga lo lani na ndo ti keke, me na ngangu ti Nzapa lo yeke na fini. Ti tâ tënë ni nga, e woko legeoko tongana ti so lo woko lani, me fade e yeke duti na fini legeoko na lo ndali ti oko ngangu ti Nzapa so ayeke sara kua na popo ti ALA.  ALA ngbâ ti bâ tere ti ALA ti bâ wala ALA yeke na yâ ti mabe, ALA ngbâ ti bâ tere ti ALA ti bâ wala ALA wani ALA yeke tongana nyen. Christ ayeke beoko na ALA, ALA hinga tongaso pëpe? Me Christ ayeke beoko na ALA pëpe tongana a ke ALA.  Mbi yeke biani na beku so fade ALA yeke hinga so a ke e pëpe.  E sambela Nzapa si ALA lingbi ti sara mbeni ye ti sioni oko pëpe. Ye so apusu mbi ti sara tongaso ayeke pëpe ti tene a bâ e tongana azo so a yeda na ala, me ti tene ALA sara ye so ayeke nzoni mingi, atâa tongana a bâ e tongana azo so a yeda na ala pëpe.  Teti e lingbi pëpe ti sara mbeni ye ti ke tâ tënë, me e yeke sara gi ye ndali ti tâ tënë ni.  Même tongana e woko, si ALA yeke ti ALA na ngangu, e yeke lakue na ngia; na e yeke sambela ti tene ALA kiri na nzoni lege. 10  Ndani la, atâa so mbi yeke na tere ti ALA pëpe, mbi sû aye so na ALA na mbeti si tongana mbi yeke na tere ti ALA, mbi lingbi pëpe ti son na ndo ti ALA, teti Seigneur amû na mbi komandema ti leke ALA si ALA luti, me ti sara si ALA tï pëpe. 11  Ti hunzi na ni, aita, ALA ngbâ ti duti na ngia, ti zia si a kiri na ALA na nzoni lege, ti yeda si ambeni zo adë bê ti ALA, ti duti na oko bibe, ti duti na siriri; na fade Nzapa ti ndoye nga na ti siriri ayeke duti na ALA. 12  ALA bara tere na popo ti ALA na ALA su ngbangba ti mba tongana ti aita. 13  Azo kue so ayeke nzoni-kue atokua bara na ALA. 14  Zia kota nzobe ti Seigneur ti e Jésus Christ, ndoye ti Nzapa nga aye ti nzoni so e kue e wara na lege ti yingo vulu aduti na ALA kue.

Kete tënë