Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

2 aCorinthien 12:1-21

12  A lingbi mbi pika kate ti mbi. Nzoni ye ti pekoni ayeke dä pëpe; me fadeso mbi yeke sara tënë ti ambeni ye ti ndima so mbi bâ tongana suma nga na ti aye so Seigneur afa na mbi.  Mbi hinga mbeni koli so ayeke beoko na Christ. A sara ngu bale-oko na osio awe, a mû lo a hon na lo juska na ota yayu ni; wala a hon na lo na tere ti lo ti zo, mbi hinga pëpe, wala na tere ti lo ti zo pëpe, mbi hinga nga pëpe; Nzapa si ahinga ni.  Ti tâ tënë ni, mbi hinga mbeni koli tongaso so a hon na lo, wala a hon na lo na tere ti lo ti zo wala na tere ti lo ti zo pëpe, mbi hinga pëpe; Nzapa si ahinga ni.  A mû koli so a hon na lo na paradis na lo mä ambeni tënë so zo akpa ti tene pekoni pëpe, atënë so a mû lege na zo ti tene ni pëpe.  Mbi yeke pika ande kate ti mbi na ndo ti koli tongaso; mbi yeke pika kate na ndo ti mbi wani pëpe, me gi na ndo ti aye so afa so mbi woko.  Teti tongana mbeni lâ mbi ye ti pika kate ti mbi, mbi yeke ga ande pëpe zo so ayeke sara ye na lege ni pëpe, ngbanga ti so mbi yeke tene tâ tënë. Me mbi gbanzi tere ti mbi ti pika kate ti mbi si mbeni zo alingbi ti gonda mbi pëpe ahon ye so lo bâ mbi na sarango ni, wala ahon ye so lo mä mbi na tenengo ni,  gi ndali ti gbâ ti aye so Nzapa afa na mbi. Tongaso, ti tene mbi gonda tere ti mbi ahon ndo ni pëpe, a zia mbeni kî na yâ ti tere ti mbi, mbeni ange ti Satan, ti ngbâ ti pika mbi, tongaso si mbi lingbi pëpe ti gonda tere ti mbi ahon ndo ni.  Fani ota mbi voro yanga na Seigneur ti tene lo zi kî so na tere ti mbi,  me lo tene biani na mbi, lo tene: “Kota nzobe ti mbi alingbi na mo awe; teti na ngoi so mo woko, ngangu ti mbi aga ye so alingbi kue.” Ni la, mbi ye mingi ti pika ande kate ti mbi na ndo ti awokongo ti mbi, tongaso si ngangu ti Christ angbâ tongana mbeni tente na ndo ti mbi. 10  Tongaso, ndali ti Christ, mbi wara ngia na yâ ti awokongo ti mbi, na yâ ti azonga, na yâ ti angoi so aye atia mbi, na yâ ti aye ti ngangu so a sara na mbi nga na yâ ti akpale. Teti na ngoi so mbi woko, a yeke na ndembe ni so si mbi yeke na ngangu. 11  Mbi ga zo so ayeke sara ye na lege ni pëpe. Teti tongana ALA sara fade nzoni tënë ti mbi, ka a pusu mbi pëpe ti ga tongana zo so ayeke sara ye na lege ni pëpe. Même tongana mbi yeke ye oko pëpe, akota bazengele ti ALA ni ahon mbi na ye oko pëpe. 12  Biani, ALA wani ALA bâ aye so afa atene mbi yeke bazengele: gbungo ngangu mingi, afä, aye ti dongo bê nga na akusala ti ngangu. 13  Teti na lege wa si ambeni congrégation ahon ALA? Gi na lege so mbi ga mbeni nengo kungba na ndo ti ALA pëpe. ALA pardone mbi na sioni ti mbi ni so! 14  ALA bâ, a yeke ti fani ota ni la mbi leke tere ti mbi ti gue na ALA kâ, ye oko mbi yeke ga ande mbeni nengo kungba na ndo ti ALA pëpe. Teti mbi yeke gi ti mû aye ti ALA pëpe, me a yeke ALA wani si mbi yeke gi; ngbanga ti so a yeke ti amolenge ti bata ye teti kekereke ndali ti ababâ na amama ti ala pëpe, me a yeke ti ababâ na amama ti bata ye teti kekereke ndali ti amolenge ti ala. 15  Ti mbi, fade mbi yeke na ngia mingi ti mû aye ti mbi kue nga ti kä tere ti mbi kue ndali ti âme ti ALA. So mbi ndoye ALA ahon ndo ni so, ALA yeke ndoye mbi gi kete? 16  Ti tâ tënë ni, mbi ga lani kungba na ndo ti ALA pëpe. Ye oko, ALA tene mbi yeke “zo ti mayele” na mbi gbu ALA “na lege ti handango ndo.” 17  Me mbi wara go pëpe na ndo ti ALA na lege ti mbeni oko ti aita so mbi tokua na ALA kâ. Mvene la? 18  Mbi hunda mingi na Tite ti gue kâ nga mbi tokua ita ni legeoko na lo. Tite awara go oko pëpe na ndo ti ALA, ni la pëpe? E kue e tambela lani gi na oko bibe so, ni la pëpe? E kue e sara ye gi legeoko, ni la pëpe? 19  ALA bâ ti ALA atene, atënë so kue e tene so, e yeke gbu koko ti e na gbele ti ALA la? A yeke na gbele Nzapa si e ngbâ ti sara atënë so tongana azo so asara beoko na Christ. Me, aita ti mbi so mbi ndoye ALA mingi, aye kue so e sara ayeke ti kpengba ALA. 20  Teti mbeto asara mbi, si na mbeni lege, tongana mbi si kâ mbi wara ALA pëpe tongana ti so mbi ye, nga mbi duti na lê ti ALA pëpe tongana ti so ALA ye. Me mbeto asara mbi ti wara ALA na yâ ti tiri, mbanda, sarango ngonzo lakue, papa, dikongo sioni tënë na tere ti zo, dikongo atënë na gbe ti go, sarango ye na baba nga na yâ ti wusuwusu. 21  Peut-être tongana mbi kiri mbi si kâ, Nzapa ti mbi ayeke zia kamene na lê ti mbi na popo ti ALA, na mbi yeke wara vundu ndali ti mingi ti ala so asara lani siokpari me so achangé bê ti ala pëpe na sioni ye, lango-sioni nga na sarango sioni ye na kamene pëpe, aye so ala ngbâ na yâ ni.

Kete tënë