Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

2 aCorinthien 11:1-33

11  Mbi ye si ALA kanga bê ti ALA na mbi na mbeni kete ye so ayeke na lege ni pëpe so mbi yeke sara. Biani, ALA yeke kanga bê ti ALA na mbi!  Mbi sara mbanda ti ALA tongana ti Nzapa, teti mbi wani mbi mû zendo ti mû ALA na mbeni koli oko, so ayeke Christ. Na mbi ye ti mû ALA na lo tongana mbeni maseka-wali so ade ti hinga koli pëpe na so ayeke na sioni oko pëpe.  Me mbeto asara mbi, teti mbi hinga pëpe wala, legeoko tongana ti so ngbo ahanda lani Ève na lege ti mayele ti lo, mbeni ye abuba hingango ndo ti ALA si ALA gue yongoro na dutingo na vuru bê nga na dutingo na sioni oko pëpe so Christ alingbi na ni.  Teti tongana mbeni zo aga, na lo fa tënë ti mbeni Jésus nde na Jésus so e fa tënë ti lo awe, wala ALA wara mbeni yingo nde na ti so ALA wara awe, wala mbeni nzoni tënë nde na ti so ALA yeda na ni awe, ALA yeke kanga bê ti ALA hio na zo so.  Teti mbi bâ so akota bazengele ti ALA ni ahon mbi na mbeni ye oko tongaso pëpe.  Même tongana kode ti sarango tënë atia mbi, ti tâ tënë ni hingango ye atia mbi pëpe. Me, na alege kue, e fa hingango ye ni na ALA na yâ ti ye kue.  Wala so mbi sara tere ti mbi kete na mbi yeke na ngia ti fa nzoni tënë ti Nzapa na ALA senge senge si ALA ga kota so, mbi sara siokpari la?  Mbi gbu ye ti ambeni congrégation na ngangu na lege so mbi yeda ti mû aye so acongrégation ni amû na mbi ti mû maboko na mbi, si mbi sara na kusala na ALA.  Ye oko, tongana mbi yeke lani na tere ti ALA na ye atia mbi, mbi ga mbeni nengo kungba na ndo ti zo oko pëpe, ngbanga ti so aita so alondo na Macédoine si aga amû na mbi aye kue so atia mbi. Biani, na alege kue mbi bata tere ti mbi si mbi ga mbeni nengo kungba na ndo ti ALA pëpe na mbi yeke ngbâ gi ti sara tongaso. 10  Mbi yeke tene tâ tënë tongana ti so Christ ayeke tene: Na yâ ti akodoro ti Achaïe a yeke kanga ande lege na mbi pëpe ti pika kate ti mbi. 11  Mbi sara tongaso ngbanga ti nyen? Ngbanga ti so mbi ndoye ALA pëpe? Nzapa ahinga so mbi ndoye ALA. 12  Ye so mbi yeke sara so, mbi yeke ngbâ ande ti sara ni si mbi lingbi ti zi ye so ambeni zo ayeke gi ti luti na ndo ni ti tene a bâ so ala lingbi na oko kusala so e yeke na ni, so ala yeke pika kate ti ala dä. 13  Teti azo tongaso ayeke abazengele ti wataka; kua ti ala ayeke gi ti handa azo, na ala yeke gbian tere ti ala ti ga abazengele ti Christ. 14  Ye ni so adö bê ti e pëpe, ngbanga ti so Satan wani ayeke gbian tere ti lo lakue ti ga mbeni ange ti lumière. 15  Tongaso a yeke fini ye pëpe tongana awakua ti lo ayeke gbian tere ti ala nga lakue ti ga awakua ti mbilimbili. Me ye so ayeke si ande na ala na nda ni ayeke lingbi na akusala ti ala. 16  Mbi kiri mbi tene: Zia mbeni zo abâ mbi pëpe tongana zo so ayeke sara ye na lege ni pëpe. Ye oko, tongana biani ALA bâ mbi tongaso, zia ALA yeda na mbi tongana zo so ayeke sara ye na lege ni pëpe, si mbi nga mbi lingbi ti pika kate ti mbi kete. 17  Tënë so mbi yeke tene, mbi mû na peko ti tapande ti Seigneur pëpe, me mbi yeke tene ni tongana ti zo so ayeke sara ye na lege ni pëpe, tongana ti zo so lo tene lo hinga biani awe nda ti ye so lo yeke pika kate ti lo ndali ni. 18  So azo mingi ayeke pika kate ndali ti aye ti sese, mbi kue mbi yeke pika ande kate ti mbi. 19  ALA yeke azo so ayeke sara ye na lege ni, me a nzere na ALA ti kanga bê na azo so ayeke sara ye na lege ni pëpe. 20  Ti tâ tënë ni, ALA yeke kanga bê ti ALA na zo so agbu ALA na ngbâa, zo so ate aye so ALA yeke na ni, zo so anzi ye so ALA yeke na ni, zo so asara tere ti lo kota zo na ndo ti ALA, zo so apika lê ti ALA. 21  Kamene asara e ti tene tënë so, ngbanga ti so na lê ti ambeni zo mo bâ mo tene e yeke na ngangu pëpe ti sara kua na komandema ti e na lege ni. Me tongana mbeni zo ayeke na mbeto pëpe ti sara mbeni ye, mbi yeke tene tënë so tongana zo so ayeke sara ye na lege ni pëpe, mbi kue mbi yeke duti na mbeto pëpe ti sara ni. 22  Ala yeke aHébreu? Mbi nga kue. Ala yeke azo ti Israël? Mbi nga kue. Ala yeke ngongoa ti Abraham? Mbi nga kue. 23  Ala yeke awakua ti Christ? Mbi kiri tënë tongana mbeni zo so fou asara lo, mbi yeke wakua ti Christ ahon ala mingi, mbi hon ala mingi na aye so: angangu kua, akanga so mbi sara, apika so mbi wara na ti so fani mingi mbi sigigi na yanga ti kuâ. 24  Fani oku aJuif apika mbi na zaza yanga ni bale-ota na gumbaya, 25  fani ota a pika mbi na akeke, fani oko a bo mbi na tênë, fani ota mangboko atuku na mbi, mbi sara lâ oko na bï oko na yâ ti kota ngu; 26  fani mingi mbi yeke gi na yâ ti tambela, na yâ ti akpale na lê ti abale, na yâ ti akpale na maboko ti azo ti gbungo azo na ngangu ti mû ye ti ala, na yâ ti akpale na maboko ti azo ti mara ti mbi wani, na yâ ti akpale na maboko ti azo ti ambeni mara nde, mbi wara akpale na yâ ti gbata, mbi wara akpale na yando, mbi wara akpale na lê ti ngu-ingo, mbi wara akpale na maboko ti aita ti wataka. 27  na yâ ti ngangu kua nga na pasi; fani mingi na bï mbi lango pëpe; ti ambeni a yeke nzara ti kobe na nzara ti ngu; fani mingi mbi gbanzi tere ti mbi na kobe; mbi yeke na yâ ti dê nga bongo ayeke na tere ti mbi pëpe. 28  Na ndo ti mara ti aye so kue, mbeni ye ayeke dä so ayeke ga gi na ndo ti mbi lâ na lâ: gingo bê na ndo ti acongrégation kue. 29  Zo wa la si awoko, si mbi woko pëpe? Zo wa la si mabe ti lo atï, si bê ti mbi ason pëpe? 30  Tongana a yeke tënë ti pikango kate, fade mbi yeke pika kate ti mbi na ndo ti aye so afa so mbi woko. 31  Nzapa nga Babâ ti Seigneur ti e Jésus, Lo so a lingbi a gonda lo lakue lakue, ahinga so mbi yeke tene mvene pëpe. 32  Na Damas, gouverneur so ayeke na gbe ti Gbia Arétas azia azo ti bata yanga ti gbagba ti gbata ni ti gbu mbi, 33  me a zia mbi na yâ ti mbeni sakpa na a yôro mbi na lê ti mbeni fenêtre ti tere ti gbagba ni si mbi zu na sese na mbi kpe na maboko ti lo.

Kete tënë