Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

2 aCorinthien 1:1-24

1  Paul, mbeni bazengele ti Christ Jésus na lege ti ye so bê ti Nzapa aye, legeoko na ita ti e Timothée, atokua mbeti so na congrégation ti Nzapa so ayeke na Corinthe, nga na ala kue so ayeke nzoni-kue so ayeke na yâ ti sese ti Achaïe kue:  Zia kota nzobe nga na siriri so alondo na Nzapa Babâ ti e, nga so alondo na Seigneur Jésus Christ aduti na ALA.  Zia a gonda Nzapa na Babâ ti Seigneur ti e Jésus Christ, Babâ so ayeke sara nzoni bê mingi na zo nga Nzapa ti dengo bê kue,  lo so adë bê ti e na yâ ti ye ti vundu kue so e wara, si e lingbi ti dë bê ti ala so ayeke na yâ ti ye ti vundu nde nde kue, na lege ti dengo bê so Nzapa angbâ ti dë bê ti e na ni.  Legeoko tongana ti so apasi so e bâ ndali ti Christ awu mingi, dengo bê so e wara awu mingi nga na lege ti Christ.  Tongana e yeke na yâ ti ye ti vundu, nda ni ayeke ti tene bê ti ALA adë na ALA wara salut. Tongana a yeke dë bê ti e, nda ni ayeke ti tene bê ti ALA adë, si ALA wara lege ti gbu ngangu na yâ ti a-oko pasi so e yeke bâ so.  Tongaso beku so e yeke na ni na ndo ti ALA ayengi pëpe, teti e hinga e tene gi tongana ti so ALA yeke bâ pasi tongana e, fade ALA yeke wara nga dengo bê tongana e.  Aita, e ye si ALA hinga tënë ti vundu so asi na e lani na yâ ti kodoro-komanda ti Asie: A sara lani pasi mingi na e, pasi ni ahon ngangu ti e biani, na a sara si e hinga pëpe wala e yeke ngbâ na fini.  Ti tâ tënë ni, e wani e bâ ti e lani so a dë ngbanga ti kuâ na li ti e awe. Ye so asi ti tene e zia bê ti e na e wani pëpe, me na Nzapa so ayeke zingo akuâ. 10  Lo zi e lani na yâ ti kota ye ti kuâ tongaso, na e yeke na beku so lo yeke kiri ande ti zi e. 11  ALA nga, ALA lingbi ti sara mbeni ye ndali ti e na lege ti vorongo tere ti ALA na Nzapa. Tongana ALA sara ni, a yeke sara si azo mingi ayeke kiri ande singila na Nzapa ndali ti e ngbanga ti so a sara nzoni bê na e na peko ti sambela ti azo mingi mingi. 12  Ye so e yeke pika kate ti e ngbanga ni na so yingo-ti-hinga ti e ayeda na ni ayeke so: sarango ye ti e na yâ ti dunia so, na mbilimbili na mbage ti ALA, ayeke na mbeni lege so ayeke nzoni-kue nga na vuru bê so alondo na Nzapa; a yeke pëpe na lege ti ndara ti dunia so, me na lege ti kota nzobe ti Nzapa. 13  Biani tënë so e yeke sû na ALA ayeke mbeni tënë nde pëpe, gi so ALA hinga ni nzoni wala so ALA yeda na ni. Nga, mbi yeke na beku so ALA yeke ngbâ ande ti yeda na atënë ni so juska na nda ni, 14  legeoko tongana ti so ALA yeda kamême so e yeke ye so ALA yeke pika kate ti ALA ngbanga ni, fade ALA nga ALA yeke duti ye so e yeke pika kate ti e ngbanga ni na lâ ti Seigneur ti e Jésus. 15  Tongaso, na lege ti beku so, mbi leke na bê ti mbi kozoni ti gue na ALA kâ, si ALA lingbi ti wara lege ti duti na ngia ti fani use ni. 16  Na tongana mbi duti kete na ALA awe, mbi yeke gue na Macédoine. Na pekoni mbi yeke londo na Macédoine mbi kiri na mbage ti ALA, na nda ni ALA zia mbi na lege mbi gue na Judée. 17  Biani, na ngoi so mbi leke tënë so na bê ti mbi, mbi bâ ni tongana tënë ti ngia? Wala aye so mbi leke ti sara, mbi leke ti sara ni alingbi na ye ti mitele? si mbi tene “En, En” na pekoni “Ên-ën, Ên-ën”? 18  Me tongana ti so Nzapa ayeke be-ta-zo, atënë so e tene na ALA ayeke En na Ên-ën pëpe. 19  Teti Christ Jésus, Molenge ti Nzapa, so mbi na Silvain na Timothée e fa tënë ti lo na popo ti ALA, aga lani En na Ên-ën pëpe, me ti lo En ni ayeke gi En. 20  Ngbanga ti so atâa wungo ti azendo ti Nzapa ayeke oke, kue aga En na lege ti lo. Tongaso nga, na lege ti lo e tene “Amen” na Nzapa, si e lingbi ti mû gloire na Nzapa. 21  Me zo so afa atene e na ALA e yeke ti Christ nga zo so asoro* e ayeke Nzapa. 22  Lo kpo nga nzoroko ti lo na ndo ti e na lo mû na e ye so afa atene ye so ayeke ga ayeke si biani, ye ni so ayeke yingo so lo zia na yâ ti bê ti e. 23  Mbi iri Nzapa ti duti tongana témoin ti ke âme ti mbi: a yeke ti tene ALA kiri ALA wara vundu pëpe si mbi de mbi si na Corinthe pëpe. 24  Mbi tene pëpe so e yeke azo so akomande na ndo ti mabe ti ALA, me e yeke amba ti ALA awakua ndali ti ngia ti ALA, teti a yeke na lege ti mabe ti ALA si ALA yeke luti so.

Kete tënë

Bâ kete tënë ti Lc 4:18.