Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

2 Timothée 1:1-18

1  Paul, bazengele ti Christ Jésus na lege ti ye so bê ti Nzapa aye nga alingbi na zendo ti fini so aga na lege ti dutingo beoko na Christ Jésus,  atokua mbeti so na Timothée, molenge ti mbi so mbi ndoye lo mingi: Zia kota nzobe, nzoni bê na siriri so alondo na Nzapa Babâ ni nga so alondo na Christ Jésus Seigneur ti e aduti na mo.  Mbi kiri singila mingi na Nzapa, lo so mbi yeke sara kusala so ayeke nzoni-kue na lo na nzoni yingo-ti-hinga nga tongana ti so akotara ti mbi asara ândö. Mbi kiri singila na lo teti so mbi zia lâ oko pëpe ti dabe ti mbi na mo so mbi yeke voro tere ti mbi na Nzapa, bï na lâ,  mbi ye mingi ti bâ mo (tongana mbi yeke dabe ti mbi na ngu ti lê ti mo) si ngia asi bê ti mbi.  Mbi dabe ti mbi na mabe ti mo so ayeke ti handango lê ti zo oko pëpe, mabe so ayeke kozo na âta ti mo ti wali Loïs nga na mama ti mo Eunice, na so mbi hinga mbi tene a yeke na mo nga kue.  Ndali ti tënë so, mbi kiri mbi dabe ti mo ti sara si matabisi ti Nzapa so ayeke na mo angbâ gi ti za tongana wâ, matabisi so mo wara ni na lege ti ziango maboko ti mbi na ndo ti mo.  Teti Nzapa amû na e yingo ti zo ti mbeto pëpe, me yingo ti ngangu, ti ndoye nga na ti batango bibe ti e nzoni.  Tongaso, mo sara kamene pëpe ti fa tënë na ndo ti Seigneur ti e, nga mo sara kamene ti mbi pëpe, mbi so mbi sara kanga teti iri ti Seigneur, me mo kue mo duti nduru ti bâ pasi ndali ti nzoni tënë a lingbi na ngangu ti Nzapa.  Lo sö e na lo iri e a lingbi na iringo ndo so ayeke nzoni-kue; lo sara ni ndali ti akusala so e sara pëpe, me ndali ti ye so lo wani lo leke na bê ti lo ti sara nga ndali ti kota nzobe ti lo. Lo mû na e kota nzobe so ndali ti Christ Jésus ngbene ye ândö giriri. 10  Me fadeso, a fa kota nzobe so polele awe tongana Sauveur ti e Christ Jésus afa tere ti lo na gigi, lo so lo lungula kuâ biaku biaku nga na lege ti nzoni tënë lo za lumière na ndo ti fini nga na ndo ti tënë ti tere so alingbi ti buba pëpe; 11  nzoni tënë so, a zia mbi ti duti wafango tënë, bazengele nga wafango ye ndali ni. 12  A yeke ndali ti ye so si mbi yeke bâ apasi so, me kamene asara mbi pëpe. Teti mbi hinga lo so mbi mä na bê na lo nga mbi hinga mbi tene lo lingbi ti bata ye so mbi zia na maboko ti lo ti bata juska ti si na lango ni so. 13  Mo ngbâ ti bata anzoni tënë so a zia ni tongana tapande, anzoni tënë so mo mä ni na mbage ti mbi; mo ngbâ ti bata ni na mabe nga na ndoye so ague oko na Christ Jésus. 14  Pendere ye so a zia na maboko ti mo ti bata so, mo bata ni na lege ti yingo vulu so aduti na yâ ti e. 15  Mo hinga tënë so, so azo kue so ayeke na yâ ti kodoro-komanda ti Asie aturnê peko ti ala na mbi. Phygèle na Hermogène ayeke na popo ti azo so. 16  Zia Seigneur asara nzoni bê na azo ti da ti Onésiphore, ngbanga ti so fani mingi lo dë bê ti mbi, na lo sara pëpe kamene ti azingiri so mbi yeke na yâ ni. 17  Me, tongana lo si lani na Rome, lo gi mbi mbilimbili na lo wara mbi. 18  Zia Seigneur Jéhovah asara nzoni bê na lo na lango ni so. Na akua so kue lo sara na Éphèse, mo hinga tënë ni nzoni awe.

Kete tënë