Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

1 Pierre 3:1-22

3  Legeoko nga, awali, ALA woko tere na gbe ti akoli ti ALA, si tongana ambeni koli ni ayeke dä so ayeda na tënë ti Nzapa pëpe, a lingbi ti ga na ala ti mä na bê, na lege ti tënë pëpe, me na lege ti sarango ye ti tere ti awali ti ala,  ngbanga ti so akoli ni abâ na lê ti ala sarango ye ti ALA so sioni oko ayeke dä pëpe nga na nengo so ALA ne na ala mingi.  Nga, zia pendere ti ALA aduti gi pendere ti gigi pëpe, so ti tene sarango li ti ALA na kode ahon ndo ni, yungo aye ti pendere nde nde ti lor wala yungo abongo ti ndo ni,  me zia pendere ti ALA aduti ti zo ti yâ ni na yungo bongo so alingbi ti buba pëpe so ayeke bibe ti dutingo na siriri nga ti sarango ye na ngangu pëpe, so ayeke ye ti kota ngere na lê ti Nzapa.  Teti a yeke nga tongaso si awali ti ândö so ayeke nzoni-kue nga so azia beku ti ala na Nzapa ayeke sara pendere na tere ti ala, ala woko tere na gbe ti akoli ti ala,  tongana ti Sara so amä lani yanga ti Abraham na lo iri lo “seigneur.” ALA ga amolenge ti lo awe tongana ALA ngbâ ti sara nzoni nga ALA zia si mbeni ye asara ALA mbeto pëpe.  Akoli, ALA ngbâ ti duti na awali ti ALA na lege ti hingango ye; ALA ne awali tongana mbeni ta so awoko ti lo mingi, teti ALA na awali ti ALA nga ayeke ahéritier ti fini so a mû ni na lege ti kota nzobe ti Nzapa, si a kanga lege na asambela ti ALA pëpe.  Ti hunzi na ni, zia ALA kue ALA duti na bibe oko, ALA hinga ti zia tere ti ALA na place ti mba ti ALA, ALA ye tere na popo ti ala na yengo tere ti aita, ALA bâ mawa ti mba mingi, ALA duti na tâ be-ti-molenge na yâ ti sarango ye ti ALA,  ALA kiri sioni teti sioni pëpe wala zonga teti zonga pëpe; me ALA tene nzoni tënë na zo, ngbanga ti so a iri ALA ti sara ye tongaso si ALA lingbi ti wara tënë nzoni tongana ye ti héritier. 10  Teti “zo so aye ti ndoye fini na ti bâ alango so ayeke nzoni, zia lo bata menga ti lo si lo tene sioni tënë pëpe nga lo bata yanga ti lo na tënë ti handango zo, 11  me zia lo turnê peko ti lo na ye so ayeke sioni na lo sara ye so ayeke nzoni; zia lo gi siriri na lo tomba pekoni. 12  Teti lê ti Jéhovah ayeke na ndo ti azo ti mbilimbili, na mê ti lo ayeke mä sambela ti ala ti voro tere na lo; me lê ti Jéhovah ake azo so ayeke sara aye ti sioni.” 13  Ti tâ tënë ni, zo wa si ayeke sara sioni na ALA tongana ALA ga azo so ayapu na sarango ye ti nzoni? 14  Me tongana a si so ALA bâ pasi ndali ti mbilimbili, ngia ayeke na ALA. Ye oko, ye so azo so asara mbeto ni, ALA sara mbeto ni pëpe, nga ALA gi bê ti ALA pëpe. 15  Me na yâ ti bê ti ALA, zia ALA hinga so Christ ayeke nzoni-kue na ALA bâ lo tongana Seigneur, lakue ALA duti nduru ti gbu koko ti beku ti ALA na gbele azo kue so ayeke hunda ALA na nda ti beku ni so; me ALA sara ni na ngangu pëpe nga na nengo zo mingi. 16  ALA duti na nzoni yingo-ti-hinga, si na ndo ti ye so a tene sioni tënë ti ALA dä, nzoni sarango ye ti ALA tongana azo ti Christ asara si kamene agbu azo so ayeke tene sioni tënë ti ALA. 17  Teti a yeke nzoni mingi ti tene ALA bâ pasi ngbanga ti so ALA yeke sara ye ti nzoni, tongana a yeke ye so bê ti Nzapa aye la, ahon ti bâ pasi ngbanga ti so ALA yeke sara ye ti sioni. 18  Christ akui gi fani oko biani biani awe tënë ti asiokpari, zo ti mbilimbili ndali ti azo so ayeke mbilimbili pëpe, si lo lingbi ti gue na ALA na Nzapa; a fâ lo na yâ ti mitele, me a kiri na lo na fini na yâ ti yingo. 19  Na pekoni lo gue lo tö mbela na ayingo so ayeke na da ti kanga, 20  ayingo so ake yanga ândö na ngoi so Nzapa angbâ lani ti kanga bê ti ku na ngoi ti Noé, tongana a yeke leke lani arche, so a yô na yâ ni azo mingi pëpe, so ti tene a-âme miombe, ti sö fini ti ala na lege ti ngu. 21  Ye so ague oko na ni ayeke sö ALA fadeso nga, so ti tene batême (batême ayeke pëpe zingo saleté ti tere ti zo, me hundango Nzapa ti wara nzoni yingo-ti-hinga), na lege ti zingongo ti Jésus Christ na kuâ. 22  Lo yeke na koti ti Nzapa, teti lo gue na yayu awe; na a zia a-ange, akomandema nga na angangu na gbe ti lo.

Kete tënë