Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

1 Pierre 2:1-25

2  Tongaso, ALA pusu aye so kue yongoro na tere ti ALA: ye ti sioni kue, handango ndo kue, handango lê ti zo, kota bê nga na dikongo mara ti asioni tënë kue na tere ti zo;  me legeoko tongana aforoto so a dü ala fini fini, zia ALA duti na kota nzara ti nyon lait so a zia mbeni ye nde dä pëpe, lait so ayeke ti tënë ti Nzapa, si na lege ni ALA kono ti wara salut,  gi tongana ALA tara si ALA bâ so Seigneur ayeke nzoni.  Tongana ALA yeke ga na mbage ti lo, so ti tene na mbage ti mbeni tênë so ayeke na fini, so biani azo ake ni, me so Nzapa asoro ni na lo bâ ni tongana ye so ngere ni ayeke kota mingi,  ALA nga, tongana atênë so ayeke na fini, a ngbâ ti leke ALA ti ga mbeni da ti yingo ti tene ALA ga mbeni bungbi ti aprêtre so ayeke nzoni-kue, ti mû asandaga ti yingo so anzere na Nzapa na lege ti Jésus Christ.  Teti a sara tënë ni na yâ ti Mbeti ti Nzapa, a tene: “Bâ, mbi yeke zia na Sion mbeni tênë, so a soro ni awe, mbeni tênë so ayeke kozo tênë ti gere ti da, tênë so ngere ni ayeke kota mingi; zo kue so amä na bê na ni, fade vundu ayeke sara lo na pekoni oko pëpe.”  Tongaso, ndali ti ALA, lo yeke ye so ngere ni ayeke kota mingi, ngbanga ti so ALA yeke azo so amä na bê. Me ti azo so amä na bê pëpe, “oko tênë so azo ti lekengo da ni ake ni aga tâ kozo tênë ti gere ti da ni”,  nga a ga “tênë so zo ayeke pika gere ti lo dä nga mbeni kota tênë so asara si zo atï.” Azo so ayeke pika gere ti ala dä ngbanga ti so ala ke ti mä tënë ni. Na a yeke ye so a fa kozo awe ti si na ala.  Me ALA, ALA yeke “mara so a soro ni awe, mbeni bungbi ti aprêtre so ayeke sara kua tongana agbia, azo ti mara so ayeke nzoni-kue, azo so ayeke ga ye ti Nzapa wani si ALA lingbi ti fa anzoni” ti lo so lo iri ALA ti sigigi na yâ ti bingo ti ga na yâ ti pendere lumière ti lo. 10  Teti ândö ALA yeke mbeni mara pëpe, me fadeso ALA yeke mara ti Nzapa; ândö ALA yeke azo so a sara nzoni bê na ala pëpe, me fadeso ALA yeke azo so a sara nzoni bê na ala. 11  ALA so mbi ndoye ALA mingi, mbi wa ALA tongana awande nga azo so aga ti sara kodoro ti ninga pëpe ti gbanzi tere ti ALA na anzara ti mitele so ayeke tiri na âme. 12  ALA duti na nzoni sarango ye na popo ti azo ti amara, si na yâ ti ye so azo ni ayeke tene ALA yeke asioni zo, ala mû gloire na Nzapa na peko ti so ala bâ anzoni kusala ti ALA, na lango so lo ga ti bâ kua so a sara. 13  Ndali ti Seigneur, ALA woko tere na gbe ti aye so kue azo azia na sese: wala a yeke mbeni gbia, zia ALA woko tere na gbe ti lo teti so lo yeke kota zo; 14  wala a yeke agouverneur, zia ALA woko tere na gbe ti ala teti ala yeke azo so Seigneur si atokua ala ti se azo ti sarango sioni, me ti gonda azo ti sarango nzoni. 15  Teti Nzapa aye si na sarango ye ti nzoni ALA kanga yanga ti azo so ndara amanke ala si ala yeke tene abuba tënë so. 16  ALA sara ye tongana azo so a zi ALA awe, me zia si ALA duti na liberté ti ALA ni pëpe tongana mbeni ye ti honde ndo ti sioni, me tongana angbâa ti Nzapa. 17  ALA ne mara ti azo nde nde kue, ALA ndoye sewa ti e ti aita kue, ALA kpe mbeto ti Nzapa, ALA ne gbia ti kodoro. 18  Zia azo ti kua awoko tere na gbe ti awa ti ala na sarango mbeto ti ala na lege ni; ala woko tere gi pëpe na gbe ti awa ti ala so ayeke nzoni nga ayeke sara ye na lege ni, me zia ala woko tere nga na gbe ti ala so sarango kua na gbe ti ala ason mingi. 19  Teti tongana mbeni zo ayeke kanga bê na gbe ti aye ti vundu na lo yeke bâ pasi senge senge ndali ti yingo-ti-hinga ti lo na lê ti Nzapa, so ayeke mbeni nzoni ye. 20  Teti tongana ALA yeke sara ye ti sioni na a yeke pika ALA si ALA yeke gbu ngangu dä, gonda ti nyen si ALA wara dä? Me tongana ALA yeke sara ye ti nzoni na ALA bâ pasi si ALA gbu ngangu dä, so ayeke mbeni ye so azia ngia na bê ti Nzapa. 21  Biani, a iri ALA ti wara mara ti fini tongaso, ngbanga ti so Christ abâ lani pasi ndali ti ALA, na lo zia na ALA mbeni tapande si ALA mû tâ gi peko ti gere ti lo mbilimbili. 22  Lo sara siokpari oko pëpe, na a wara tënë ti handango zo na yanga ti lo pëpe. 23  Tongana a yeke zonga lo, lo kiri peko ti zonga ni pëpe. Tongana lo yeke bâ pasi, lo gi ti son na ndo ti zo pëpe, me lo ngbâ ti zia tënë ti lo kue na maboko ti lo so ayeke fâ ngbanga mbilimbili. 24  Lo wani lo yô asiokpari ti e na yâ ti tere ti lo na ndo ti keke, si ti e na siokpari ahunzi, na e duti na fini ti sara ye ti mbilimbili. Nga “ALA wara sava ndali ti akä ti lo.” 25  Teti lani ALA yeke tongana angasangbaga so agirisa lege awe; me fadeso ALA kiri na mbage ti lo so ayeke berger nga zo ti bango ndo na ndo ti âme ti ALA.

Kete tënë