Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

1 Pierre 1:1-25

1  Pierre, bazengele ti Jésus Christ, atokua mbeti so na azo so aga ti sara kodoro ti ninga pëpe, so akangbi kirikiri na sese ti Pont, ti Galatie, ti Cappadoce, na yâ ti kodoro-komanda ti Asie, na sese ti Bithynie, ala so a soro ala awe  alingbi na ngangu ti Nzapa Babâ ni ti hinga ye kozo, nga so a sara si ala ga nzoni-kue na lege ti yingo vulu, ti tene ala ga azo so amä yanga nga azo so a fi mênë ti Jésus Christ na tere ti ala: Zia Nzapa angbâ ti mû kota nzobe nga na siriri ti lo mingi mingi na ALA.  Zia a gonda Nzapa na Babâ ti Seigneur ti e Jésus Christ, ndali ti so, na lege ti kota nzoni bê so lo sara, lo kiri lo dü e fini ti duti na beku so ayeke na fini na lege ti zingongo so Jésus Christ azingo na kuâ,  ti wara ye ti héritier so alingbi ti buba pëpe, so alingbi ti ga sioni pëpe nga so pendere ni alingbi ti hon pëpe. A bata ni na ALA na yayu,  ALA so a yeke bata ALA na ngangu ti Nzapa na lege ti mabe ndali ti salut so a ga nduru ti fa ni awe na ngoi ti nda ni.  Ndani la, ALA yeke na ngia mingi, atâa so teti kete ngoi fadeso, a lingbi atara nde nde azia vundu na bê ti ALA,  si mabe ti ALA so a tara ni awe (mabe so ngere ni ahon ngere ti lor so ayeke buba bubango atâa so a tara ni na lê ti wâ awe) aduti mbeni ye ti gonda, ye ti gloire, ye ti nengo tere na ngoi so Jésus Christ ayeke fa tere ti lo na gigi.  Atâa so ALA bâ lo lâ oko pëpe, ALA ndoye lo. Atâa so ALA yeke bâ lo fadeso pëpe, ALA mä na bê na lo nga bê ti ALA ayeke na ngia mingi, ngia so a lingbi ti fa nda ni pëpe, tâ kota ngia,  teti so ALA yeke wara ye ti peko ti mabe ti ALA, so ti tene salut ti âme ti ALA. 10  Aprophète so afa ândö na prophétie tënë ti kota nzobe so Nzapa ayeke sara na ALA agi ti hinga ye mbilimbili na ndo ti salut ni so nga ala gi ye nzoni na ndo ni. 11  Ala yeke gi ti hinga mbilimbili ngoi wa nga mara ti ngoi wa si yingo so ayeke na yâ ti ala ayeke fa na ndo ti Christ, tongana yingo ni ayeke fa ândö tënë ti apasi ti Christ nga na ti agloire so ayeke ga na peko ti apasi ni. 12  Me a fa ândö na aprophète so a tene ala yeke sara kua ndali ti ala wani pëpe, me a yeke ndali ti ALA si aprophète ni ayeke sigigi lani na aye so laso a fa ni na ALA awe na lege ti azo so afa nzoni tënë na ALA na yingo vulu so alondo na yayu. A yeke aye so la si a-ange ayeke na nzara ti zia lê ti ala dä mbilimbili. 13  Ni la, ALA leke bibe ti ALA ti sara ngangu kua, ALA zia tâ li ti ALA kpô; ALA zia beku ti ALA na ndo ti kota nzobe so a yeke sara ande na ALA na ngoi so Jésus Christ ayeke fa tere ti lo na gigi. 14  Teti so ALA yeke amolenge so amä yanga, a yeke nzoni ALA zia lege ti sarango ye alingbi na anzara ti bê so ALA yeke na ni ândö na ngoi so ALA de ti hinga ndo pëpe so, 15  me ti gue oko na Lo so ayeke nzoni-kue so airi ALA, zia ALA nga aga azo so ayeke nzoni-kue na yâ ti sarango ye ti ALA kue, 16  ngbanga ti so a sû na Mbeti ti Nzapa, a tene: “A yeke nzoni ALA ga nzoni-kue, ngbanga ti so mbi yeke nzoni-kue.” 17  Nga, tongana ALA yeke iri ndo na Babâ ni so ayeke fâ ngbanga ti zo oko oko alingbi na kusala ti lo na mungo mbage ti zo pëpe, zia ALA sara ye na mbeto na ngoi so ALA yeke sara kodoro na yâ ti dunia so tongana awande. 18  Teti ALA hinga so a yeke pëpe na aye so ayeke buba bubango, argent wala lor, si a zi ALA na yâ ti sarango ye ti ALA so alë lengo pëpe so ALA mû na peko ti ngobo ti akotara ti ALA. 19  Me a zi ALA na lege ti mênë so ngere ni ayeke kota mingi, mênë so ayeke tongana ti mbeni ngasangbaga so sioni wala saleté oko ayeke na tere ti lo pëpe, so ti tene mênë ti Christ. 20  Tâ tënë, a hinga lo kozo si a zia gere ti dunia, me a fa lo na gigi na hunzingo ti ngoi ni ndali ti ALA 21  so na lege ti lo ALA ga azo so amä na bê na Nzapa, Lo so Lo zingo Christ na kuâ si Lo mû na lo gloire, ti tene mabe ti ALA nga na beku ti ALA aduti na mbage ti Nzapa. 22  So fadeso ALA sukula âme ti ALA na lege so ALA yeda ti sara ye alingbi na tâ tënë awe so, ye ti pekoni ayeke yengo tere ti aita, yengo tere so ayeke ti handango lê ti zo pëpe, zia ALA ndoye tere ngangu mingi na ndoye so alondo na bê. 23  Teti a kiri a dü ALA fini awe, a dü ALA pëpe na lege ti ngongoa so ayeke buba bubango, me na lege ti ngongoa so ayeke gi ti sigigi nga so alingbi ti buba pëpe, na lege ti tënë ti Nzapa, lo so ayeke na fini si lo yeke ngbâ kpu na kpu. 24  Teti “azo kue ayeke tongana pere, na gloire ti azo kue ayeke tongana pere so angbâ ti sigigi; pere ni ahule na kongo ti pere ni atï, 25  me tënë ti yanga ti Jéhovah ayeke ngbâ kpu na kpu.” Biani, so a yeke “tënë ti yanga” ti lo ni la, tënë so a fa na ALA awe tongana nzoni tënë.

Kete tënë