Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

1 Jean 4:1-21

4  ALA so mbi ndoye ALA mingi, ALA mä na bê pëpe na atënë kue so alondo na yingo, me ALA tara atënë ni so ti bâ wala a londo na Nzapa, ngbanga ti so aprophète ti wataka mingi abâ gigi na yâ ti dunia so.  ALA yeke hinga tënë so yingo atene na so alondo na Nzapa na lege so: Tënë kue so yingo atene so atene Jésus Christ aga na yâ ti mitele, tënë ni so alondo na Nzapa.  Me tënë kue so yingo atene na so atene Jésus aga na yâ ti mitele pëpe alondo na Nzapa pëpe. Nga, so ayeke tënë ti yingo so alondo na wato-ti-Christ la so ALA mä tënë ti gango ni awe, na fadeso a bâ gigi na yâ ti dunia so awe.  Amolenge so mbi ndoye ALA mingi, ALA londo na Nzapa na ALA hon azo so na ngangu awe, ngbanga ti so lo so ayeke beoko na ALA ayeke kota ahon lo so ayeke beoko na dunia so.  Azo ni so alondo na dunia so. Ndani la, ala yeke sara tënë ti ye so ayeke ti dunia so na dunia ni amä ala.  Ti e, e londo na Nzapa. Zo so ahinga Nzapa amä e. Zo so alondo na Nzapa pëpe amä e pëpe. A yeke tongaso si e hinga tënë so yingo atene so ayeke ti tâ tënë, na tënë so yingo atene so ayeke ti wataka.  ALA so mbi ndoye ALA mingi, zia e ngbâ ti ndoye tere na popo ti e ngbanga ti so ndoye alondo na Nzapa, na zo kue so ayeke na ndoye, Nzapa si adü lo na lo hinga Nzapa.  Zo so ayeke na ndoye pëpe ahinga Nzapa pëpe, ndali ti so Nzapa ayeke ndoye.  A bâ ndoye ti Nzapa na mbage ti e na lege so: Nzapa atokua lani oko Molenge* ti lo na dunia so si e lingbi ti wara fini na lege ti lo. 10  A bâ ndoye ni na lege so, a yeke e la e ndoye Nzapa pëpe, me a yeke lo si andoye e na lo tokua Molenge ti lo tongana sandaga so amû lege ti leke songo na popo ti zo na Nzapa, sandaga ndali ti asiokpari ti e. 11  ALA so mbi ndoye ALA mingi, tongana a yeke tongaso si Nzapa andoye e, a yeke ngbanga ti e nga ti ndoye tere na popo ti e. 12  Mbeni zo abâ Nzapa lâ oko pëpe. Tongana e ngbâ ti ndoye tere na popo ti e, Nzapa angbâ na e nga a sara si ndoye ti lo alingbi kue na yâ ti e. 13  E hinga so e ngbâ beoko na lo na lo yeke beoko na e na lege so: ndali ti so lo mû na e yingo ti lo. 14  Nga, e wani e bâ na e sara tënë ni e tene Babâ ni atokua Molenge ti lo tongana Sauveur ti dunia. 15  Zo kue so atene na yanga ti lo so Jésus Christ ayeke Molenge ti Nzapa, Nzapa angbâ beoko na zo tongaso, na lo nga lo ngbâ beoko na Nzapa. 16  Ti e, e hinga na e mä na bê na ndoye so Nzapa ayeke na ni na mbage ti e. Nzapa ayeke ndoye, na zo so angbâ na yâ ti ndoye, lo ngbâ beoko na Nzapa, na Nzapa angbâ beoko na lo. 17  Bâ lege so e fa ndoye na popo ti e na mbeni lege so alingbi kue la, si e lingbi ti sara tënë na kamene pëpe na lâ ti fango ngbanga, ndali ti so, gi tongana ti so lo yeke, e nga e yeke tongaso na yâ ti dunia so. 18  Mbeto ayeke na yâ ti ndoye oko pëpe, me ndoye so alingbi kue abi mbeto na gigi ngbanga ti so mbeto ayeke ye ti kangango lege. Biani, zo so ayeke na yâ ti mbeto, a sara si lo lingbi kue pëpe na yâ ti ndoye. 19  Ti e, e yeke na ndoye, ngbanga ti so lo ndoye e kozoni. 20  Tongana mbeni zo atene: “Mbi ndoye Nzapa,” me lo ngbâ ti ke ita ti lo, lo yeke zo ti mvene. Teti zo so andoye ita ti lo pëpe, ita ti lo so lo bâ lo, lo lingbi pëpe ti ndoye Nzapa so lo bâ lo pëpe. 21  E wara commandement so na mbage ti lo: zo so andoye Nzapa, a lingbi lo ndoye ita ti lo nga.

Kete tënë

Bâ kete tënë ti Jn 3:16.