Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

1 aThessalonicien 5:1-28

5  Aita, âdu ti ngoi ni nga na alango ni so a soro awe, mbeni ye ti tene a sû mbeti na ALA ndali ni la pëpe.  Teti ALA wani ahinga mbilimbili so lâ ti Jéhovah ayeke ga tâ gi tongana mbeni zo ti nzi na bï.  Na ngoi so azo ni ayeke tene: “Siriri na nzoni duti ayeke dä!” mo ye ti bâ, futingo ayeke ga gi hio tongaso na ndo ti ala gi tongana ti so songo yâ ayeke gbu mbeni mama ti ngo; na ala yeke kpe ande oko pëpe.  Me ALA, aita, ALA yeke na yâ ti bingo pëpe, si lango ni so anzi ALA nzingo tongana ti so kota lâ ayeke nzi azo ti nzi,  teti ALA kue ayeke amolenge ti lumière nga amolenge ti kota lâ. E yeke ti bï wala ti bingo pëpe.  Tongaso, zia e lango pëpe tongana ti so atanga ni ayeke lango, me zia lê ti e angbâ na zingo ni na e zia li ti e kpô.  Teti azo so ayeke lango, ala yeke lango lakue gi na bï, na azo so ayeke sulêe, ala yeke sulêe ka gi na bï.  Me ti e so e yeke azo ti kota lâ, a yeke nzoni e zia li ti e kpô na e yü na kate ti e bongo ti wen ti mabe na ti ndoye nga e yü beku ti salut tongana casque,  ngbanga ti so Nzapa asoro e, ti tene ngonzo ti lo atï na ndo ti e pëpe, me ti tene e wara salut na lege ti Seigneur ti e Jésus Christ. 10  Lo kui teti e si, atâa e lango pëpe wala e lango, e lingbi ti duti na fini legeoko na lo. 11  Ni la, ALA ngbâ ti dë bê ti mba nga ti kpengba mba gi tongana ti so ALA yeke sara so. 12  Aita, e hunda na ALA ti ne azo so ayeke sara kua ngangu na popo ti ALA, so ayeke fa lege na ALA na yâ ti kusala ti Seigneur nga so ayeke gboto mê ti ALA. 13  E hunda nga na ALA ti tene, na lege ti ndoye, ALA ne azo so mingi mingi teti kusala so ala yeke sara. ALA duti na siriri na popo ti ALA. 14  Na mbage nga, aita, e wa ALA: ALA gboto mê ti azo so ayeke sara ye kirikiri, ALA sara tënë so adë bê ti a-âme so vundu asara ala mingi, ALA mû maboko na azo so awoko nga ALA kanga bê ti ALA na azo kue. 15  ALA bâ si mbeni zo akiri sioni teti sioni na mba ti lo pëpe, me lakue ALA tomba peko ti ye so ayeke nzoni ndali ti amba ti ALA nga ndali ti azo kue. 16  ALA duti na ngia lakue. 17  ALA ngbâ ti sambela lakue. 18  ALA kiri singila ngbanga ti aye kue. Teti so ayeke ye so bê ti Nzapa aye na mbage ti ALA na lege ti Christ Jésus la. 19  ALA mingo wâ ti yingo pëpe. 20  ALA bâ tenengo aprophétie tongana buba ye pëpe. 21  ALA gi ti bâ wala aye kue ayeke tâ tënë; ALA gbu ngangu ye so ayeke nzoni mingi. 22  ALA gbanzi tere ti ALA na mara ti aye ti sioni kue. 23  Zia Nzapa ti siriri ni wani asara si ALA ga tâ nzoni-kue. Na yâ ti aye kue, zia a bata yingo na âme nga na tere so ayeke ti ALA kue si a duti na sioni oko pëpe na ngoi so Seigneur ti e Jésus Christ ayeke si na lo yeke duti dä. 24  Zo so airi ALA so, lo yeke be-ta-zo, na lo yeke sara ye so ande nga. 25  Aita, ALA ngbâ ti sambela ndali ti e. 26  ALA bara aita ni kue na ALA su ngbangba ti ala tongana ti aita. 27  Mbi hunda na ALA mingi na iri ti Seigneur ti tene a diko mbeti so na aita kue. 28  Kota nzobe ti Seigneur ti e Jésus Christ aduti na ALA.

Kete tënë