Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

1 aThessalonicien 4:1-18

4  Ti hunzi na ni, aita, legeoko tongana ti so e wa ALA lani na ndo ti lege so a lingbi ALA tambela na ni nga ALA mû ngia na Nzapa (tongana ti so ALA yeke tambela fadeso), e hunda na ALA nga e wa ALA na iri ti Seigneur Jésus ti ngbâ ti sara ni mingi ahon so.  Teti ALA hinga yanga so e mû lani na ALA na iri ti Seigneur Jésus.  Bâ, ye so Nzapa aye ayeke ti tene ALA ga nzoni-kue, ALA gbanzi tere ti ALA na lango-sioni;  lo ye si zo oko oko na popo ti ALA ahinga ti kanga nzara ti tere ti lo wani si lo duti nzoni-kue nga na nengo tere,  me na lege ti asioni nzara ti tere pëpe tongana ti so amara so ahinga Nzapa pëpe ayeke nga na ni.  Ye so Nzapa aye nga ayeke ti tene mbeni zo ague juska ti sara sioni na ita ti lo nga ti nzi adroit ti lo na ndo ti tënë so pëpe, teti Jéhovah si ayeke fâ ngbanga na ndo ti aye so kue, gi tongana ti so e sara tënë ni kozo na ALA nga e fa nda ni kue na ALA awe.  Teti Nzapa airi e pëpe ti kanga lê na ndo ti sioni ye, me ti duti azo so ayeke nzoni-kue.  Ni la, tongana mbeni zo ake, lo yeke ke zo pëpe, me lo yeke ke Nzapa, lo so azia yingo vulu ti lo na yâ ti ALA.  Ye oko, âdu ti tënë ti yengo tere tongana aita, a yeke mbeni ye ti tene mbi sû mbeti na ALA ndali ni pëpe, teti Nzapa afa na ALA ti ye tere na popo ti ALA. 10  Tâ tënë, a yeke ye so ALA yeke sara ni na aita kue so ayeke na yâ ti Macédoine kue. Me, aita, e wa ALA mingi ti ngbâ ti sara ni mingi mingi ahon ti kozo, 11  na ti sara kue ti duti gi na siriri nga ti sara gi ye so abâ gi ALA wani, ti sara kua na maboko ti ALA wani gi tongana ti so e mû lani yanga na ALA ti sara; 12  tongaso si ALA tambela na lege ni na lê ti azo ti gigi nga mbeni ye amanke ALA pëpe. 13  Nga, aita, e ye ALA hinga tënë na ndo ti azo so akui,* si ALA sara mawa ahon ndo ni pëpe tongana tanga ti azo so ayeke na beku pëpe. 14  Teti tongana e mä na bê so Jésus akui na lo zingo na kuâ, e mä na bê nga so ala so akui beoko na Jésus, fade Nzapa ayeke ga na ala legeoko na lo. 15  Bâ ye so e ye ti fa na ALA na lege ti tënë ti Jéhovah la: E so e yeke na fini si e yeke ngbâ juska na ngoi so Seigneur ayeke si na lo yeke duti dä, fade e yeke hon kozo pëpe na ala so akui awe, 16  ngbanga ti so Seigneur wani ayeke londo na yayu ti zu, fade lo yeke mû yanga na kota go, na go so ayeke ti archange nga na trompette ti Nzapa; na ala so asara beoko na Christ si akui awe ayeke londo ande kozoni. 17  Na pekoni, e so e yeke na fini si e ngbâ, a yeke mû e ande legeoko na ala na yâ ti mbinda ti gue ti tingbi na Seigneur na yâ ti pupu; na tongaso e yeke duti lakue lakue na tere ti Seigneur. 18  Ni la, ALA ngbâ ti dë bê ti mba na tënë so.

Kete tënë

Na Grec: “alango (na yâ ti kuâ).”