Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

1 aCorinthien 6:1-20

6  Tongana mbeni zo na popo ti ALA ayeke na tënë na mba ti lo, a sara tongana nyen si lo yeke gue tâ na ni na gbele azo so ayeke mbilimbili pëpe, ahon ti gue na ni na gbele azo so ayeke nzoni-kue?  Wala ALA hinga pëpe so a yeke azo so ayeke nzoni-kue si ayeke fâ ande ngbanga ti dunia so? Na tongana a yeke ALA si ayeke fâ ande ngbanga ti dunia ni, ALA lingbi pëpe ti fâ ngbanga ti asenge senge tënë?  ALA hinga pëpe so fade e yeke fâ ngbanga ti a-ange? Tongaso, ngbanga ti nyen si e lingbi nga ti fâ ngbanga ti atënë ti gigi so pëpe?  Na tongana ALA yeke na atënë ti gigi so ti tene a fâ ngbanga ni, a yeke azo so aita na yâ ti congrégation abâ ala na nene ni pëpe si ALA yeke mû ala tongana awafango ngbanga?  Mbi yeke sara tënë so ti zia kamene na lê ti ALA. Biani, mbeni zo ti ndara oko tongaso ayeke na popo ti ALA pëpe so alingbi ande ti fâ ngbanga ti mbeni tënë na popo ti aita ti lo?  Me ita na ita ayeke gue na tënë ti ala na gbele ngbanga; na ala gue na gbele azo so amä na bê pëpe!  Ti tâ tënë ni, so ALA yeke gue na mba na gbele ngbanga afa so ALA tï biani awe. Ngbanga ti nyen ALA zia pëpe si a sara sioni na ALA? Ngbanga ti nyen ALA zia pëpe si a mû ye ti ALA?  Me a yeke ALA si ayeke sara sioni na azo nga ayeke mû ye ti azo, na azo ni so ayeke aita ti ALA.  Ye ni nyen! ALA hinga pëpe? azo ti mbilimbili pëpe, fade royaume ti Nzapa ayeke ga ti ala pëpe. ALA handa tere ti ALA pëpe: atâa azo ti sarango lango-sioni, wala azo ti vorongo ayanda, wala azo ti gingo wali wala koli nde, wala akoli so azia tere ti ala na amba ti ala koli, wala akoli so alango na amba ti ala koli, 10  wala azo ti nzi, wala azo ti sarango bê ti ye, wala angbâa ti sämba, wala azo ti zongango ndo, wala azo ti mungo ye ti zo na likisi, royaume ti Nzapa ayeke ga ti ala pëpe. 11  Ye oko, ambeni na popo ti ALA ayeke ândö tongaso. Me a sukula ALA si ALA ga nzoni, a sara si ALA ga nzoni-kue, a diko ALA tongana azo ti mbilimbili na iri ti Seigneur ti e Jésus Christ nga na lege ti yingo ti Nzapa ti e. 12  A mû lege na mbi ti sara ye kue, me a yeke ye kue si ayeke ga na mbi ye ti nzoni pëpe. A mû lege na mbi ti sara ye kue, me fade mbi yeke zia tere ti mbi na gbe ti komandema ti mbeni ye pëpe. 13  Kobe ayeke ngbanga ti yâ, na yâ ayeke ngbanga ti kobe. Me fade Nzapa ayeke sara si yâ nga na kobe aga senge ye. Tere ti zo ayeke ndali ti lango-sioni pëpe, me a yeke ndali ti Seigneur, na Seigneur ayeke ndali ti tere ti zo. 14  Me Nzapa, na lege ti ngangu ti lo, azingo lani Seigneur na kuâ na fade lo yeke zingo e na kuâ nga. 15  ALA hinga pëpe so tere ti ALA ayeke amembre ti tere ti Christ? Tongaso, fade mbi zi amembre ti tere ti Christ ti sara si a ga amembre ti tere ti mbeni wali-ndumba? Zia ye tongaso asi lâ oko pëpe! 16  Ye ni nyen! ALA hinga pëpe so zo so abungbi oko na mbeni wali-ndumba ayeke tere oko na lo? Teti Nzapa atene: “Fade ala use kue aga mitele oko.” 17  Me zo so abungbi oko na Seigneur ayeke yingo oko na lo. 18  ALA kpe yongoro na lango-sioni. Siokpari kue so mbeni zo asara ni ayeke na gigi ti tere ti lo, me zo so angbâ na yâ ti lango-sioni lo yeke sara siokpari na tere ti lo wani. 19  Ye ni nyen! ALA hinga pëpe so tere so ALA yeke ni so ayeke temple ti yingo vulu so alondo na Nzapa na so ayeke na yâ ti ALA? Nga, ALA yeke ti ALA wani pëpe, 20  teti a vo ALA na mbeni ngere awe. Tongaso ALA mû gloire na Nzapa na yâ ti tere ti ALA.

Kete tënë