Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

1 aCorinthien 4:1-21

4  Zia azo abâ e tongana azo ti gbe ti Christ nga awabatango ye so ayeke bata atënë ti Nzapa so lo honde nda ni.  Nga, tongana a yeke tongaso, ye so a yeke gi na mbage ti awabatango ye ayeke ti tene ala duti be-ta-zo.  Ti mbi, a yeke gi mbeni senge senge ye tongana a yeke ALA wala mbeni da-ngbanga ti azo si abâ tënë ti mbi. Même mbi wani kue mbi bâ tënë ti mbi pëpe.  Mbi hinga ti mbi mbeni ye ti sioni so mbi sara pëpe. Me mbi ye ti tene pëpe so mbi yeke mbilimbili, me a yeke Jéhovah si ayeke bâ tënë ti mbi.  Tongaso ALA fâ ngbanga na ndo ti mbeni ye pëpe kozo si ngoi ni alingbi, juska Seigneur aga, lo so fade ayeke mû aye so a sara na gbemingo na yâ ti bingo ti sigigi na ni na lumière, nga lo so ayeke fa na gigi aye so azo aleke na bê ti ala ti sara. Na pekoni, zo oko oko ayeke wara ande gonda ti lo so ayeke londo na Nzapa.  Aita, mbi sara tënë ti aye so na mungo tapande ni na ndo ti mbi nga na Apollos teti nzoni ti ALA, si na lege ti tapande ti e, ALA lingbi ti hinga ye so: “ALA sara ye ahon ti so a sû na Mbeti ti Nzapa so pëpe,” tongaso si zo oko oko asara baba pëpe na bango mbeni zo kota ahon mbeni.  Teti zo wa si asara si mo yeke nde na mba ti mo? Biani, nyen la mo yeke na ni so a mû na mo mungo pëpe? Na tongana a mû ni na mo mungo, ngbanga ti nyen mo yeke pika kate ti mo mo bâ mo tene a mû ni na mo mungo pëpe?  ALA wara ti ALA ye ni alingbi ALA awe? ALA ga azo ti mosoro awe? ALA to nda ti komande tongana agbia kozo ti e awe? Biani, mbi ye si ALA to nda ti komande tongana agbia si e nga e komande legeoko na ALA tongana agbia.  Ti mbi, ye ni ayeke mo bâ mo tene Nzapa afa e abazengele na gigi na ndangba ni tongana azo so ague ti kui kuingo, ngbanga ti so e ga tongana mbeni ngia so dunia so, a-ange nga na azo ayeke bâ ni. 10  E ga azo ti buba ngbanga ti Christ, me ALA, ALA yeke sara ye na ndara na yâ ti Christ. E woko, me ALA kpengba ti ALA. Azo agonda ALA, me azo abâ e tongana ambumbuse zo. 11  Juska na ngoi so, nzara ti kobe na nzara ti ngu angbâ ti sara e, e yeke yü bongo nzoni pëpe, a yeke sara ye ti sioni na e, e yeke na ndo ti lango pëpe 12  na e yeke sara ngangu kua na maboko ti e wani. Na ngoi so azo ayeke zonga e, e yeke iri tënë nzoni na ndo ti ala; na ngoi so azo ayeke sara ye ti ngangu na e, e yeke kanga bê; 13  na ngoi so azo ayeke buba iri ti e, e yeke voro yanga na ala; e ga tongana azende ti dunia so nga saka ti aye kue, juska fadeso. 14  Mbi sû aye so na mbeti na ALA ti zia kamene na lê ti ALA pëpe, me ti gboto mê ti ALA tongana amolenge ti mbi so mbi ndoye ALA mingi. 15  Teti atâa so na yâ ti Christ ALA lingbi ti duti na azo saki bale-oko so ayeke azo ti bango ndo na ndo ti ALA, so kue ALA yeke na ababâ mingi pëpe. Teti na yâ ti Christ Jésus, mbi ga babâ ti ALA na lege ti nzoni tënë. 16  Mbi voro yanga na ALA mingi: ALA ga azo so asara ye tongana mbi. 17  Ndani la, mbi yeke tokua Timothée na ALA, teti lo yeke molenge ti mbi so mbi ndoye lo mingi nga so lo yeke be-ta-zo na yâ ti Seigneur. Na fade lo yeke kiri ti dabe ti ALA na akode ti mbi na ndo ti tënë ti Christ Jésus, a-oko kode so mbi yeke fa na ye na ndo kue na yâ ti acongrégation kue. 18  Baba ti ambeni ahon ndo ni mo bâ mo tene mbi yeke si na ALA kâ pëpe. 19  Me tongana Jéhovah aye, na yâ ti kete ngoi mbi yeke si na ALA kâ, na fade mbi yeke zia bê ti mbi pëpe na tënë ti yanga ti azo so baba ti ala ahon ndo ni so, me mbi yeke bâ ngangu ti ala. 20  Teti royaume ti Nzapa ayeke na lege ti tënë ti yanga pëpe, me a yeke na lege ti ngangu. 21  ALA ye nyen? ALA ye mbi mû keke si mbi gue na ni na tere ti ALA kâ? Wala ALA ye si mbi si na ALA kâ na ndoye nga na sarango ye na ngangu pëpe.

Kete tënë