Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

1 aCorinthien 2:1-16

2  Ti mbi, aita, tongana mbi si lani na ALA kâ, mbi ga pëpe na angbongboro tënë nga na akota ndara ti fa na ALA tënë so Nzapa ahonde nda ni.  Teti mbi leke na bê ti mbi ti hinga mbeni ye nde pëpe, gi Jésus Christ, lo so a kanga lo na ndo ti keke.  Tongana mbi si lani na ALA, mbi yeke na ngangu pëpe, mbeto asara mbi nga tere ti mbi adö mingi.  Na tënë ti mbi nga na ye so mbi fa ayeke pëpe atënë ti ndara ti handa na bê ti zo, me a yeke atënë so afa na gigi yingo nga na ngangu ti Nzapa,  si mabe ti ALA aluti pëpe na ndo ti ndara ti azo, me na ndo ti ngangu ti Nzapa.  E yeke sara tënë ti ndara so na popo ti ala so ayeke abiazo, me a yeke ndara ti aye ti ngoi ti fadeso pëpe, nga a yeke pëpe ndara ti amokonzi ti aye ti ngoi ti fadeso so ala yeke hon ande hongo.  Me e yeke sara tënë ti ndara ti Nzapa na yâ ti mbeni tënë so lo honde nda ni, ndara so a honde nda ni, so Nzapa aleke tënë ni kozo awe teti gloire ti e kozo na aye ti ngoi ti fadeso.  Na popo ti amokonzi ti aye ti ngoi ti fadeso zo oko awara lege ti hinga ndara so pëpe, teti tongana fade ala hinga ni, ka ala yeke kanga pëpe na ndo ti keke Seigneur so ayeke na gloire.  Me a yeke gi tongana ti so a sû na Mbeti ti Nzapa, a tene: “Aye so Nzapa aleke teti ala so andoye lo ayeke aye so lê ti zo abâ ni pëpe, na so mê ti zo amä ni pëpe nga so zo abi bê ti lo dä pëpe.” 10  Teti a yeke na e si Nzapa afa aye so na lege ti yingo ti lo, teti yingo ayeke gi nda ti aye kue, même aye ti Nzapa so nda ni alï mingi. 11  Biani, zo wa na popo ti azo ahinga aye so ayeke na yâ ti zo? gi yingo ti zo ni so pëpe? Legeoko nga, zo oko ahinga aye ti Nzapa pëpe, gi yingo ti Nzapa ni. 12  Ti e, e wara yingo ti dunia so pëpe, me yingo so alondo na Nzapa, si e hinga aye so Nzapa amû ni na e na nzoni bê. 13  E yeke sara nga tënë ti aye so na lege ti atënë so yingo afa, me pëpe na lege ti atënë so ndara ti zo si afa, tongana e mû atënë ti yingo ti fa na nda ti aye ti yingo. 14  Me zo ti mitele awara aye ti yingo ti Nzapa pëpe, teti a yeke ye ti buba na lê ti lo, na lo lingbi ti gbu nda ni pëpe, ngbanga ti so a yeke na lege ti yingo si a yeke bâ yâ ti aye so nzoni. 15  Me zo ti yingo abâ yâ ti aye kue nzoni, na zo oko ayeke hinga nda ti lo pëpe. 16  Teti “zo wa si ahinga bibe ti Jéhovah si lo fa ye na lo?” Me ti e, e yeke na bibe ti Christ.

Kete tënë