Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

1 aCorinthien 14:1-40

14  ALA tomba peko ti ndoye; ye oko, ALA ngbâ ti yapu na gingo amatabisi ti yingo, me mingi ni, a yeke nzoni ALA tene prophétie.  Teti zo so asara tënë na mbeni yanga nde, lo yeke sara tënë na azo pëpe me na Nzapa, ngbanga ti so zo oko ayeke mä lo pëpe, atâa so a yeke na lege ti yingo si lo tene atënë so Nzapa ahonde nda ni.  Ye oko, zo so ayeke tene prophétie ayeke kpengba azo, lo yeke wa ala nga lo yeke dë bê ti ala na lege ti tënë ti yanga ti lo.  Zo so asara tënë na mbeni yanga nde lo kpengba gi lo wani, me zo so atene prophétie lo kpengba congrégation.  Mbi ye si ALA kue asara tënë na ayanga nde nde, me ti bê ti mbi, mbi ye mingi ti tene ALA tene prophétie. Biani, zo so atene prophétie ayeke kota ahon zo so ayeke tene ayanga nde nde, teti tongana zo so atene ayanga nde nde akiri peko ti tënë ti lo pëpe, lo lingbi pëpe ti kpengba congrégation.  Me ti fadeso, aita, tongana mbi ga na mbage ti ALA na tenengo ayanga nde nde, ye ti nzoni wa mbi yeke sara na ALA? Mbi yeke sara nzoni na ALA gi tongana mbi sara tënë na ALA na lege ti matabisi ti fango peko ti mbeni ye so Nzapa afa na mbi, wala matabisi ti hingango ye, wala ti tenengo prophétie wala ti fango ye.  Même aye so ayeke na fini pëpe ayeke toto, atâa a yeke flûte wala kundi. Tongana popo ti totongo ti aye ni ayeke dä pëpe, a yeke hinga ande go ti flûte so a yeke huru ni wala ti kundi so a yeke pika ni so tongana nyen?  Ti tâ tënë ni, tongana go ti trompette atoto polele pëpe, zo wa la ayeke leke tere ti lo ti sara bira?  Legeoko nga, na menga ti ALA, tongana ALA tene pëpe tënë so zo alingbi ti gbu nda ni hio, fade zo ayeke hinga nda ti tënë so ALA yeke tene so tongana nyen? Biani, ALA yeke sara ande tënë gi na yâ ti pupu. 10  Na yâ ti dunia so mara ti atotongo ti ayanga ti kodoro ayeke mingi, me mbeni oko so nda ni ayeke pëpe ayeke dä pëpe. 11  Tongaso, tongana mbi mä yâ ti totongo ti yanga ti kodoro so a yeke tene so pëpe, fade mbi yeke duti wande na lê ti zo so ayeke sara tënë ni, na zo so ayeke sara tënë ni ayeke duti wande na lê ti mbi. 12  Tongaso ALA nga, teti so ALA ye mingi ti wara amatabisi ti yingo, ALA gi ti wu mingi na yâ ni ti kpengba congrégation. 13  Tongaso zia zo so ayeke sara tënë na mbeni yanga nde asambela ti tene lo kiri peko ti tënë ni. 14  Teti tongana mbi yeke sambela na mbeni yanga nde, a yeke matabisi ti yingo so mbi wara ni si ayeke sambela, me li ti mbi asara ye oko dä pëpe. 15  Tongaso, mbi yeke sara nyen? Fade mbi yeke sambela na matabisi ti yingo, me mbi yeke sambela nga na hingango ndo ti mbi. Fade mbi yeke he bia ti sepela na lege ti matabisi ti yingo, me mbi yeke he nga bia ti sepela na lege ti hingango ndo ti mbi. 16  Tongaso pëpe, tongana mo yeke sepela Nzapa na matabisi ti yingo so mo wara, fade zo so ayeke ti lo senge zo ayeke tene “Amen” na tënë ti singila ti mo na Nzapa ni tongana nyen? so lo mä pëpe yâ ti tënë so mo yeke tene so? 17  Ti tâ tënë ni, mo kiri singila na Nzapa na mbeni lege so ayeke nzoni mingi, me mo yeke kpengba mba ti mo ni pëpe. 18  Mbi kiri singila na Nzapa so mbi yeke tene ayanga ti kodoro mingi ahon ALA kue. 19  Ye oko, na yâ ti mbeni congrégation, mbi ye mingi ti sara gi atënë oku na hingango ndo ti mbi, si mbi wara lege ti fa ye na ambeni zo na yanga, ahon ti sara atënë saki bale-oko na mbeni yanga ti kodoro nde. 20  Aita, ALA ga akete molenge pëpe na lege ti gbungo nda ti ye, me tongana a ndu tënë ti sioni ALA ga akete molenge. Ye oko, zia ALA ga akangba na lege ti gbungo nda ti ye. 21  A sû tënë so na yâ ti Ndia, a tene: “Jéhovah atene: ‘Fade mbi yeke sara tënë na azo so na ayanga ti kodoro ti awande nga na yanga ti awande, me atâa so kue, fade ala yeke dengi mê ti mä mbi pëpe.’ ” 22  Ndani la ayanga ti kodoro ayeke mbeni fä pëpe ndali ti azo so amä na bê, me a yeke fä ndali ti azo so amä na bê pëpe. Âdu ti tenengo prophétie, a yeke ndali ti azo so amä na bê, me pëpe ndali ti azo so amä na bê pëpe. 23  Tongaso, tongana congrégation kue abungbi ndo oko na azo ni kue ayeke tene ayanga nde nde, si ambeni senge zo wala ambeni zo so amä na bê pëpe aga alï, fade azo so ayeke tene ande so ye asara li ti ALA pëpe? 24  Me na ngoi so ALA kue angbâ ti tene prophétie, si mbeni zo so amä na bê pëpe wala mbeni senge zo aga alï, tënë ti ALA ni kue ayeke fa sioni ti lo na lo nga a yeke mû lege na lo ti bâ yâ ti asarango ye ti lo nzoni, 25  na atënë ti bê ti lo so ahonde ayeke sigigi, tongaso fade lo tï lo kuku lê ti lo na sese na lo voro Nzapa, lo tene: “Nzapa ayeke biani na popo ti ALA.” 26  Tongaso, aita, a lingbi ALA sara nyen? Na ngoi so ALA bungbi, mbeni oko ayeke na matabisi ti hengo bia, ti mbeni ayeke ti fango ye, ti mbeni ayeke ti tenengo peko ti ye so Nzapa afa na lo, ti mbeni ayeke ti tenengo mbeni yanga nde na ti mbeni ayeke ti fango nda ti atënë. Zia ALA sara aye so kue ti kpengba mba ti ALA. 27  Nga, tongana mbeni zo ayeke sara tënë na mbeni yanga nde, zia a duti gi zo use wala ota awe, na mbeni atene ti lo ahunzi awe si mbeni atene ti lo. Nga, zia si mbeni zo aduti dä ti kiri peko ti atënë ni. 28  Me tongana mbeni zo ti kiri peko ti atënë ni ayeke dä pëpe, zia lo duti kpô na yâ ti congrégation ni na lo sara tënë ni gi na yâ ti bê ti lo wani nga na Nzapa. 29  Nga, zia aprophète use wala ota asara tënë, na zia atanga ni agi ti bâ nda ti tënë ni. 30  Me tongana Nzapa afa mbeni ye na mbeni zo ni nde na ngoi so lo yeke na popo ti ALA, zia kozo zo ni aduti kpô. 31  Teti ALA kue ALA lingbi ti tene prophétie, zo oko na peko ti mba ti lo, tongaso si ALA kue amanda ye na ALA kue akpengba. 32  Nga, a lingbi aprophète aduti na ngangu na ndo ti amatabisi ti yingo so ala yeke na ni. 33  Teti Nzapa ayeke Nzapa ti wusuwusu pëpe, me ti siriri. Tongana ti so a yeke tambela na yâ ti acongrégation kue ti azo so ayeke nzoni-kue, 34  zia awali angbâ ti duti kpô na yâ ti acongrégation, teti a mû lege na ala pëpe ti sara tënë, me zia ala woko tere na gbe ti akoli tongana ti so Ndia atene. 35  Tongana ala ye ti manda mbeni ye, zia ala hunda akoli ti ala na yanga-da, teti a yeke ye ti kamene tongana wali asara tënë na yâ ti mbeni congrégation. 36  Ye ni nyen? Tënë ti Nzapa ni abâ gigi na ALA kâ, wala gi ALA si tënë ni asi na ALA? 37  Tongana mbeni zo abâ tere ti lo so lo yeke prophète wala lo yeke na mbeni matabisi ti yingo, zia lo yeda na aye so mbi yeke sû ni na ALA na mbeti, teti a yeke commandement ti Seigneur. 38  Me tongana mbeni zo ake ti yeda na ye so, zia lo ngbâ gi na ni tongaso. 39  Ndani la, aita ti mbi, ALA ngbâ ti yapu na gingo matabisi ti tenengo aprophétie, me ALA kanga lege pëpe na mbeni zo ti sara tënë na ayanga nde nde. 40  Me ALA zia si ye kue atambela na lege ni nga na yâ ti wusuwusu pëpe.

Kete tënë