Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

1 aCorinthien 13:1-13

13  Tongana mbi sara tënë na ayanga ti kodoro ti azo nga na ti a-ange, me mbi yeke na ndoye pëpe, mbi ga tongana totongo ti mbeni gbakuru ti gengere wala ti mbeni cymbale.  Nga, tongana mbi yeke na matabisi ti tenengo prophétie na mbi hinga nzoni mingi atënë kue so Nzapa ahonde nda ni nga mbi hinga ye kue, na tongana mbi yeke na mabe kue ti zi ahoto ti zia na mbeni ndo nde, me mbi yeke na ndoye pëpe, mbi yeke ye oko pëpe.  Tongana mbi mû aye ti mbi kue ti bata na azo nga tongana mbi kä tere ti mbi na kuâ ti tene mbi pika kate ti mbi na pekoni, me mbi yeke na ndoye pëpe, mbi wara ye oko na pekoni pëpe.  Ndoye ahinga ti kanga bê ti ku nga lo ye gi ti sara nzoni na zo. Ndoye asara mbanda pëpe, lo pika kate na ndo ti ye pëpe, lo zia si baba alï lo pëpe,  lo sara ye ti songo bê ti zo pëpe, lo gi gi aye so anzere na lo pëpe, lo yeke sara ngonzo hio hio pëpe. Lo yeke diko pëpe sioni so a sara na lo.  Lo wara ngia pëpe na yâ ti ye so ayeke mbilimbili pëpe, me lo wara ngia na yâ ti tâ tënë.  Lo kanga bê na gbele aye kue, lo mä na bê na aye kue, lo zia beku na ndo ti aye kue, lo gbu ngangu na yâ ti aye kue.  Ndoye ayeke hon lâ oko pëpe. Me tongana a yeke amatabisi ti tenengo prophétie, fade a yeke kaï ni biaku; tongana a yeke sarango tënë na ayanga nde nde, fade a yeke hunzi; tongana a yeke hingango ye, fade a yeke kaï ni biaku.  Teti e hinga gi mbage ti aye nga e tene gi mbage ti aprophétie. 10  Me tongana ye so alingbi kue aga ande, ye so ayeke gi mbage ti aye fade a yeke kaï ni biaku biaku. 11  Tongana mbi de lani kete molenge, mbi yeke sara tënë tongana kete molenge, mbi yeke gbu li tongana kete molenge, kode ti sarango tënë ti mbi ayeke tongana ti kete molenge, me so mbi ga koli awe, mbi zia lege ti asarango ye ti kete molenge awe. 12  Ti fadeso, e yeke bâ ye na tatara ti wen, me ye ni asigigi polele pëpe, me na ngoi ni so ande fade a yeke duti lê na lê. Ti fadeso, mbi hinga gi mbage ti aye, me na ngoi ni so ande mbi yeke hinga ye tâ nzoni legeoko tongana ti so a hinga mbi tâ nzoni. 13  Ye oko, fadeso, aye ota so, mabe, beku na ndoye angbâ. Me ye so ayeke kota mingi na popo ti aye ota so ayeke ndoye.

Kete tënë