Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

1 aCorinthien 12:1-31

12  Aita, âdu ti amatabisi ti yingo, mbi ye si ALA hinga tënë na ndo ni.  ALA hinga so na ngoi so ALA de lani azo ti dunia so, a yeke gboto ALA lani kirikiri ti gue na ALA ti voro ayanda so ayeke sara tënë pëpe.  Ni la, mbi ye si ALA hinga so tongana yingo ti Nzapa apusu mbeni zo ti sara tënë, lo yeke tene pëpe: “Deba ayeke na ndo ti Jésus!” Me a yeke gi na lege ti yingo vulu si mbeni zo alingbi ti tene: “Jésus ayeke Seigneur!”  Yâ ti amatabisi ayeke nde nde, me gi oko yingo si ayeke dä.  Yâ ti akusala ayeke nde nde, me gi oko Seigneur si ayeke dä.  Yâ ti alege ti sarango kusala ayeke mingi, me a yeke gi oko Nzapa si amû na azo kue alege ti sarango kua so kue.  Me yingo ayeke sara kusala na yâ ti zo oko oko teti mbeni nzoni ye.  Na tapande, na lege ti yingo a mû na mbeni zo matabisi ti sarango tënë na ndara; na lege ti oko yingo so a mû na mbeni zo nga matabisi ti sarango tënë na hingango ye;  na lege ti oko yingo so a mû na mbeni zo mabe; na lege ti oko yingo so, a mû na mbeni zo matabisi ti savango azo; 10  a mû na mbeni zo alege ti sarango akusala ti ngangu; a mû na mbeni zo matabisi ti tenengo aprophétie; a mû na mbeni zo ngangu ti bâ yâ ti atënë so alondo na yingo; a mû na mbeni zo matabisi ti sarango tënë na ayanga nde nde; a mû na mbeni zo matabisi ti fango nda ti atënë so a tene na ayanga nde nde. 11  Me a yeke gi oko yingo ni si asara akusala so kue, na a kangbi ni na zo oko oko alingbi na ye so yingo ni aye. 12  Teti legeoko tongana ti so tere ayeke gi oko me lo yeke na amembre mingi, na amembre so kue, atâa so ala yeke mingi, ala yeke tere oko, ti Christ nga ayeke tongaso. 13  Teti biani a yeke na lege ti yingo oko si a batize e kue na yâ ti tere oko, atâa e yeke aJuif wala aGrec, angbâa wala azo so a zi ala awe. Nga, a sara si e kue e nyon yingo oko so. 14  Biani, tere ayeke gi membre oko pëpe, me amembre mingi. 15  Tongana gere atene: “So mbi yeke maboko pëpe, mbi yeke ti mbi mbeni membre ti tere pëpe,” so la asara si lo yeke mbeni membre ti tere ni pëpe? 16  Nga, tongana mê atene: “So mbi yeke lê pëpe, mbi yeke ti mbi mbeni membre ti tere pëpe,” so la asara si lo yeke mbeni membre ti tere ni pëpe? 17  Tongana tere kue ayeke fade gi lê, ka mango ndo ayeke duti ti lo na ndo wa? Wala tongana tere kue ayeke fade gi mê, ka mango fion ti ye ayeke duti ti lo na ndo wa? 18  Me Nzapa azia amembre ti tere oko oko na place ti ala, tongana ti so bê ti lo aye. 19  Tongana amembre ti tere kue ayeke fade gi membre oko, ka ngbongboro tere ni ayeke duti ti lo na ndo wa? 20  Ye oko, amembre ti tere ayeke mingi, me ngbongboro tere ni ayeke gi oko. 21  Lê alingbi pëpe ti tene na maboko: “Mbi yeke na bezoin ti mo pëpe.” Wala li nga alingbi pëpe ti tene na agere: “Mbi yeke na bezoin ti ALA pëpe.” 22  Me ye ni ayeke ti lo tongaso: amembre ti tere so a bâ a tene ala woko ahon ambeni, ala si ayeke kota ye biani, 23  me ambage ti tere ni so e bâ e tene a kpa ti mû gonda na ni mingi pëpe, ala si e mû gonda na ni mingi. Tongaso ambage ti tere ti e so amû kamene na zo ayeke ambage so si a ne ala mingi, 24  me ambage ti tere ti e so e ne ala mingi ayeke na bezoin ti mbeni ye pëpe. Ye oko, Nzapa aleke tere ni, na lo sara si a mû nengo mingi na mbage so ye amanke ni, 25  tongaso si kangbi aduti na yâ ti tere ni pëpe, me amembre ni kue abi bê ti ala na mba. 26  Nga, tongana membre oko abâ pasi, atanga ni kue abâ pasi legeoko na lo; wala tongana a mû gloire na mbeni membre oko, atanga ti membre ni kue asara ngia legeoko na lo. 27  ALA yeke tere ti Christ, na zo oko oko ayeke membre ti tere ni. 28  Nga, Nzapa azia azo oko oko na place ti ala na yâ ti congrégation: kozoni, abazengele; use ni, aprophète; ota ni, awafango ye; na pekoni, akusala ti ngangu; na matabisi ti savango azo; akusala ti mungo maboko, akode ti mungo li ni, sarango tënë na ayanga nde nde. 29  A yeke azo kue si ayeke abazengele? A yeke azo kue si ayeke aprophète? A yeke azo kue si ayeke awafango ye? A yeke azo kue si ayeke sara akusala ti ngangu? 30  A yeke azo kue si ayeke na matabisi ti savango azo? A yeke azo kue si ayeke sara tënë na ayanga nde nde? A yeke azo kue si ayeke kiri peko ti ayanga ni? 31  Me ALA ngbâ ti yapu na gingo amatabisi so ahon ati so. Me zia mbi fa na ALA mbeni lege so ayeke kota mingi ahon so.

Kete tënë