Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

1 aCorinthien 11:1-34

11  ALA ga azo so asara ye tongana mbi, tongana ti so mbi nga mbi yeke zo so asara ye tongana Christ.  Biani, mbi gonda ALA ngbanga ti so, na yâ ti aye kue, ALA ngbâ ti dabe ti ALA na mbi na ALA ngbâ ti gbu ngangu angobo so mbi fa na ALA.  Me mbi ye si ALA hinga so mokonzi ti akoli kue ayeke Christ, mokonzi ti wali ayeke koli na mokonzi ti Christ ayeke Nzapa.  Koli kue so ayeke sambela wala so ayeke tene prophétie na lo kanga ye na li ti lo, lo zia kamene na lê ti mokonzi* ti lo.  Me wali kue so asambela wala atene prophétie na lo kanga ye na li ti lo pëpe, lo zia kamene na lê ti mokonzi ti lo, teti a yeke mo bâ mo tene lo yeke wali so a kio kuä ti li ti lo.  Teti tongana mbeni wali akanga ye na li ti lo pëpe, zia lo fâ kuä ti li ti lo. Me tongana a yeke ye ti kamene na mbeni wali ti fâ kuä ti li ti lo wala ti kio ni, a yeke nzoni lo kanga ye na li ti lo.  A yeke ngbanga ti mbeni koli ti kanga ye na li ti lo pëpe, teti lo yeke image na gloire ti Nzapa, me wali ayeke gloire ti koli.  Teti koli aga na lege ti wali pëpe, me wali si aga na lege ti koli.  Na ndo ni, a sara koli pëpe ndali ti wali, me a sara wali ndali ti koli. 10  Ni la, ndali ti a-ange, a yeke ngbanga ti wali ti duti na mbeni ye na li ti lo so afa so lo yeke na gbe ti komandema ti koli ti lo. 11  Nga, tongana a ndu tënë ti Seigneur, tongana koli ayeke pëpe, wali nga ayeke pëpe; na tongana wali ayeke pëpe, koli nga ayeke pëpe. 12  Teti legeoko tongana wali abâ gigi na lege ti koli, koli nga abâ gigi na lege ti wali, me ye kue alondo na Nzapa. 13  ALA wani ALA bâ tënë so: A yeke na lege ni ti tene mbeni wali asambela Nzapa na lo zia li ti lo senge? 14  Gigi wani afa na ALA pëpe so tongana mbeni koli ayeke na yongoro kuä ti li, a yeke ye ti kamene ndali ti lo? 15  A fa nga pëpe so tongana mbeni wali ayeke na yongoro kuä ti li, a yeke mbeni gloire ndali ti lo? Teti a mû kuä ti li na wali tongana ye ti kangango na li ti lo. 16  Me tongana mbeni zo aye ti dë gaba na ndo ti mbeni ngobo nde, e yeke na mbeni ngobo nde pëpe, na acongrégation ti Nzapa nga ayeke na ni pëpe. 17  Me na ngoi so mbi yeke mû awango so, mbi gonda ALA pëpe, ngbanga ti so ALA yeke bungbi tere ti ALA ndali ti nzoni pëpe, me ndali ti sioni. 18  Kozoni kue, tongana ALA bungbi na yâ ti mbeni congrégation, mbi mä a tene kangbi ayeke na popo ti ALA; na mbi mä na bê na ambeni tënë ni. 19  Teti a lingbi asecte nga aduti na popo ti ALA, si na popo ti ALA a lingbi ti hinga polele azo so Nzapa ayeda na ala. 20  Ni la, tongana ALA bungbi ndo oko, lege ayeke dä pëpe ti te kobe ti Seigneur. 21  Teti tongana ALA yeke te ni, zo oko oko ate kobe ti lo kozoni awe, ye so asara si nzara ayeke na yâ ti ambeni me ti ambeni sämba asara ala. 22  Ti tâ tënë ni, ALA yeke na ada so ALA lingbi ti te kobe nga ti nyon ye na yâ ni pëpe? Wala ALA yeke bâ congrégation ti Nzapa na nene ni pëpe na ALA yeke zia kamene na lê ti ala so ayeke na ye pëpe so? Mbi tene ande nyen na ALA? A lingbi mbi gonda ALA? Na ndo ti ye so, mbi gonda ALA pëpe. 23  Teti Seigneur afa na mbi tënë so mbi yeke fa nga na ALA: Na bï so a yeke kä lo, Seigneur Jésus amû mbeni mapa, 24  na tongana lo kiri singila awe, lo kungbi yâ ni, na lo tene: “So ayeke fä ti tere ti mbi so ayeke ndali ti ALA. ALA ngbâ ti sara ye so ti dabe ti ALA na mbi.” 25  Na peko ti so lo te kobe ti lakui ni awe, lo sara tongaso nga na kopo ni, lo tene: “Kopo so ayeke fä ti fini mbele na lege ti mênë ti mbi. Lakue tongana ALA yeke nyon kopo ni, ALA ngbâ ti sara ye so ti dabe ti ALA na mbi.” 26  Teti lakue tongana ALA yeke te mapa so na ALA yeke nyon kopo so, ALA yeke fa tënë ti kuâ ti Seigneur juska lo si. 27  Ni la, zo so ate mapa ni wala anyon kopo ti Seigneur na lege ni pëpe, fade tënë ayeke duti na li ti lo na ndo ti tënë ti tere na ti mênë ti Seigneur. 28  Kozoni kue zia mbeni zo abâ tere ti lo mbilimbili ti bâ wala lo lingbi, na pekoni zia lo te mapa ni na lo nyon kopo ni. 29  Teti zo so ate na anyon, tongana lo bâ tere ni so nzoni pëpe, lo te na lo nyon ngbanga na li ti lo wani. 30  Ndani la si azo mingi na popo ti ALA awoko, ala yeke na kobela nga ambeni mingi akui* awe. 31  Me tongana e bâ tere ti e mbilimbili ti bâ wala e lingbi, fade a fâ ngbanga na li ti e pëpe. 32  Me tongana a fâ ngbanga na li ti e, andâ Jéhovah si ayeke se e, tongaso si e ga pëpe azo so a fâ ngbanga ti sioni na li ti ala legeoko na dunia so. 33  Tongaso, aita, tongana ALA bungbi ti te ni, ALA ku mba si. 34  Tongana nzara asara mbeni zo, zia lo te ye na kodoro, si ALA bungbi ndali ti ngbanga pëpe. Âdu ti tanga ti atënë ni, mbi yeke leke ni ande tongana mbi si kâ.

Kete tënë

Na Grec: “li ti lo.”
Na Grec: “alango (na yâ ti kuâ).”