Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

1 aCorinthien 10:1-33

10  Aita, mbi ye si ALA hinga so akotara ti e kue ayeke lani na gbe ti mbinda na ala kue ahon na yâ ti ngu-ingo,  na a batize ala kue na yâ ti Moïse na lege ti mbinda ni nga na lege ti ngu-ingo ni.  Ala kue ate lani oko kobe so Nzapa amû,  na ala kue anyon oko ngu so Nzapa amû. Teti ala yeke nyon lani ngu so asigigi na kota tênë so Nzapa amû so amû peko ti ala, na kota tênë so aduti fä ti Christ.  Me, Nzapa ayeda lani na mingi ti ala pëpe, teti ala kui na yando.  Tongaso aye so aga atapande ndali ti e si e duti pëpe azo so asara nzara ti aye ti sioni tongana ti so lani azo so asara nzara ni.  Nga, ALA ga pëpe azo ti vorongo ayanda, tongana ti so lani ambeni asara, gi tongana ti so a sû na Mbeti ti Nzapa, a tene: “Azo ni aduti ti te na ti nyon, na ala londo ti sara ngia.”  Nga, zia e ngbâ na yâ ti lango-sioni pëpe tongana ti so lani ambeni na popo ti ala asara lango-sioni, na azo saki bale-use na ota na popo ti ala akui na lâ oko.  Nga, a yeke nzoni e zia Jéhovah na tara pëpe tongana ti so lani ambeni azia lo na tara, na ala kui na peko ti so angbo adë ala. 10  Zia ALA ga azo ti dikongo tënë na gbe ti go pëpe tongana ti so lani ambeni na popo ti ala adiko tënë na gbe ti go, na ala kui na tïtî wafutingo ye. 11  Biani, aye so asi na ala tongana atapande, na a sû ni na Mbeti ti Nzapa ti gboto mê ti e, e so nda ti aye ti angoi nde nde asi na ndo ti e. 12  Ndani la, zia zo so abâ ti lo atene ni luti awe asara hange si lo tï pëpe. 13  Mbeni tara nde asi na ALA pëpe, gi ti so ayeke si ka na azo kue. Me Nzapa ayeke be-ta-zo, na lo yeke zia ande pëpe si a tara ALA ahon ti so ALA lingbi ti kanga bê dä, me tongana tara ni ayeke si na ALA, lo yeke leke nga lege ti tene ALA lingbi ti gbu ngangu dä. 14  Ni la, ALA so mbi ndoye ALA mingi, ALA kpe vorongo ayanda. 15  Mbi yeke sara tënë na azo so ahinga ti bâ nda ti ye nzoni la. ALA wani abâ yâ ti tënë so mbi tene. 16  Kopo ti tënë nzoni so e iri tënë nzoni dä ayeke mbeni mungo mbage na mênë ti Christ la pëpe? Mapa so e kungbi yâ ni ayeke mbeni mungo mbage na tere ti Christ la pëpe? 17  Ngbanga ti so mapa ni ayeke oko, e nga, atâa so e yeke mingi, e yeke tere oko, teti e kue e yeke kangbi yâ ti mapa oko so. 18  ALA bâ Israël na lege ti mitele: Ala so ayeke te asandaga ni, ala na gbalaka ni ayeke kangbi ye na popo ti ala la pëpe? 19  Ka mbi tene nyen? Mbi tene so ye so a mû na sandaga na mbeni yanda ayeke mbeni ye? wala yanda ayeke mbeni ye? 20  Ên-ën. Me mbi tene so aye so azo ti amara ayeke mû na sandaga, ala yeke mû ni na asioni yingo, me ala yeke mû ni na Nzapa pëpe. Na mbi ye si ALA ga azo so ALA na asioni yingo akangbi ye na popo ti ALA pëpe. 21  ALA lingbi ti nyon kopo ti Jéhovah nga na kopo ti asioni yingo pëpe. ALA lingbi ti te ye na “table ti Jéhovah” nga na table ti asioni yingo pëpe. 22  Wala “e yeke pusu Jéhovah ti sara mbanda”? E yeke na ngangu ahon lo? 23  A mû lege na zo ti sara ye kue, me ye kue si ayeke sara nzoni na zo pëpe. A mû lege na zo ti sara ye kue, me a yeke ye kue si akpengba zo pëpe. 24  Zia zo oko oko angbâ ti gi ye so asara nzoni na mba ti lo, me pëpe ye so asara nzoni gi na lo wani. 25  ALA te nyama kue so a kä ni na lê ti gara, na ALA hunda nda ni pëpe ndali ti yingo-ti-hinga ti ALA, 26  teti “sese na aye so asi singo na ndo ni ayeke ti Jéhovah.” 27  Tongana mbeni zo na popo ti azo so amä na bê pëpe atisa ALA si ALA yeda ti gue, ALA te ye kue so a zia na gbele ALA, na ALA hunda nda ni pëpe ndali ti yingo-ti-hinga ti ALA. 28  Me tongana a si so mbeni zo atene na ALA atene: “So ayeke mbeni ye so a mû na sandaga”, ALA te pëpe ndali ti zo so afa tënë ni na ALA nga ndali ti yingo-ti-hinga. 29  Mbi sara tënë ti “yingo-ti-hinga” ti mo pëpe, me ti mba ti mo so. Teti ngbanga ti nyen a lingbi yingo-ti-hinga ti mbeni zo nde si afâ ngbanga na ndo ti liberté ti mbi? 30  Tongana mbi kiri singila na Nzapa awe si mbi yeke te nyama, ngbanga ti nyen a lingbi a sara sioni tënë ti mbi ndali ti mbeni ye so mbi kiri singila na Nzapa ndali ni awe? 31  Ni la, wala ALA yeke te ye, wala ALA yeke nyon ye wala ALA yeke sara mbeni ye nde, ALA sara ye kue teti gloire ti Nzapa. 32  ALA sara hange si aJuif, aGrec nga na congrégation ti Nzapa atï ngbanga ti ALA pëpe, 33  legeoko tongana ti so mbi yeke nzere na azo kue na yâ ti aye kue, mbi yeke gi ye so asara nzoni gi na mbi wani pëpe, me ye so asara nzoni na azo mingi si ala wara lege ti sö fini ti ala.

Kete tënë