Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

1 aCorinthien 1:1-31

1  Paul, so a iri lo ti duti bazengele ti Jésus Christ na lege ti ye so bê ti Nzapa aye, legeoko na Sosthène, ita ti e,  atokua mbeti so na congrégation ti Nzapa so ayeke na Corinthe, ALA so a zia ALA nde tongana azo so asara beoko na Christ Jésus, ALA so a iri ALA ti ga azo so ayeke nzoni-kue, legeoko na ala kue so na ndo kue ayeke iri ndo na Seigneur ti e Jésus Christ na iri ti lo, Seigneur ti ala na ti e nga.  Zia kota nzobe na siriri so alondo na Nzapa Babâ ti e nga so alondo na Seigneur Jésus Christ aduti na ALA.  Mbi yeke kiri singila lakue na Nzapa teti ALA ngbanga ti kota nzobe ti Nzapa so a mû na ALA na yâ ti Christ Jésus,  so na yâ ti aye kue, ALA wara aye mingi na lege ti lo, ngangu kue ti fa tënë nga na hingango ye kue,  teti so a sara si gere ti tënë so a fa na ndo ti Christ agbu sese ngangu na popo ti ALA,  tongaso si matabisi oko amanke ALA pëpe na ngoi so ALA yeke ku kungo lango so Seigneur ti e Jésus Christ ayeke fa tere ti lo na gigi.  Lo yeke sara nga si ALA kpengba juska na nda ni, si ALA duti azo so a lingbi ti wara tënë na li ti ALA oko pëpe na lâ ti Seigneur ti e Jésus Christ.  Nzapa ayeke be-ta-zo, lo so airi ALA ti wara ye legeoko na Molenge ti lo Jésus Christ Seigneur ti e. 10  Aita, mbi wa ALA na iri ti Seigneur ti e Jésus Christ ti tene tënë ti ALA kue amä tere, si kangbi aduti na popo ti ALA pëpe, me si ALA duti biani beoko na yâ ti bibe oko nga na bango ndo oko. 11  Aita ti mbi, azo ti da ti Chloé asara tënë ti ALA na mbi atene papa ayeke na popo ti ALA. 12  Ye so mbi ye ti tene ayeke so: na popo ti ALA, mbeni atene: “Mbi yeke zo ti Paul”, mbeni atene: “Mbi, mbi yeke zo ti Apollos”, mbeni atene: “Mbi, mbi yeke zo ti Céphas”, si mbeni atene: “Mbi, mbi yeke zo ti Christ.” 13  Yâ ti Christ ayeke kangbi la. Paul si a kanga lo na ndo ti keke ndali ti ALA? Wala a batize ALA na iri ti Paul? 14  Mbi kiri singila na Nzapa so mbi batize ti mbi mbeni zo na popo ti ALA pëpe, gi Crispus na Gaïus, 15  si fade mbeni zo atene pëpe so a batize ALA na iri ti mbi. 16  Mbi girisa! Mbi batize nga azo ti da ti Stéphanas. Âdu ti atanga ni, mbi hinga pëpe wala mbi batize mbeni zo. 17  Teti Christ atokua mbi ti batize azo pëpe, me ti fa nzoni tënë; mbi yeke fa nzoni tënë ni na lege ti ndara ti sarango tënë ti azo pëpe, si keke ti pasi ti Christ aga ye senge pëpe. 18  Teti tënë ti keke ti pasi ayeke ye ti buba na lê ti azo so ayeke gue ti wara futingo, me ti e so a ngbâ ti sö e, tënë ni ayeke ngangu ti Nzapa. 19  Teti a sû na Mbeti ti Nzapa, a tene: “Fade mbi yeke sara si ndara ti awandara afuti, nga fade mbi yeke pusu yamba hingango ndo ti azo so ahinga ndo.” 20  Wandara ni ayeke na ndo wa? Zo ti fango Ndia ni ayeke na ndo wa? Wadengo gaba ti aye ti ngoi ti fadeso ayeke na ndo wa? Nzapa asara si ndara ti dunia so aga ye ti buba pëpe? 21  Teti so, na yâ ti ndara ti Nzapa, dunia so na lege ti ndara ti lo awara lege ti hinga Nzapa pëpe, Nzapa abâ so, ti ala so ayeke mä na bê, a yeke nzoni lo sö ala na lege ti ye ti buba so a yeke fa tënë ni. 22  A-Juif ahunda ti bâ afä na aGrec ayeke gi ndara, 23  me e, e yeke fa tënë ti Christ so a kanga lo na ndo ti keke, na lê ti aJuif tënë so ayeke ye so asara si ala tï, me na lê ti amara, a yeke ye ti buba. 24  Me ti ala so Nzapa airi ala, aJuif nga na aGrec, Christ ayeke ngangu ti Nzapa nga na ndara ti Nzapa. 25  Teti ye ti Nzapa so ayeke ye ti buba ayeke na ndara mingi ahon azo, na ye ti Nzapa so ayeke ye so awoko ayeke ngangu mingi ahon azo. 26  Aita, ALA bâ iringo so Nzapa airi na ALA: lo iri pëpe azo mingi so ayeke azo ti ndara na lege ti mitele, nga lo iri pëpe azo mingi so ayeke azo ti ngangu, nga lo iri pëpe azo mingi so a dü ala na yâ ti sewa ti akota zo. 27  Me Nzapa asoro aye so ayeke abuba ye ti dunia so si lo zia kamene na lê ti awandara; nga Nzapa asoro aye ti dunia so ayeke awokongo ye si lo zia kamene na lê ti angangu ye ni. 28  Na Nzapa asoro aye so ayeke ye oko pëpe na yâ ti dunia so nga aye so azo abâ tongana mbumbuse ye, aye so ayeke ye pëpe, si lo sara si aye so ayeke ye aga ye oko pëpe, 29  ti tene zo oko apika kate ti lo pëpe na gbele Nzapa. 30  Me a yeke ndali ti lo si ALA yeke beoko na Christ Jésus, lo so aga ndara so alondo na Nzapa ndali ti e, nga mbilimbili ndali ti e na ye so asara si e ga nzoni-kue nga ye so azi e na lege ti ngere so a futa ti zi azo, 31  tongaso si ye ni aduti gi tongana ti so a sû na Mbeti ti Nzapa, a tene: “Zo so apika kate ti lo, zia lo pika kate ti lo na ndo ti Jéhovah.”

Kete tënë