Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA See 2013 revision

1 Timothée 3:1-16

3  Tënë so, zo alingbi ti zia bê ti lo na ndo ni. Tongana mbeni zo agi kusala ti zo ti bango ndo na ndo ti congrégation, lo sara nzara ti mbeni kusala so ayeke nzoni mingi.  A yeke nzoni zo ti bango ndo na ndo ti congrégation aduti zo so tënë ayeke na li ti lo pëpe, koli so ayeke gi na wali oko, zo so sarango ye ti tere ti lo ayeke lakue nzoni, lo bata bibe ti lo nzoni, lo sara ye kirikiri pëpe, lo yeke zo ti yambango agene nzoni, lo yeke zo so ahinga ti fa ye nzoni na zo,  lo yeke pëpe ngbâa ti sämba so aye gingo tënë, lo yeke zo ti pikango zo pëpe, me lo yeke zo so asara ye na lege ni, lo yeke zo so aye tiri pëpe, lo yeke zo ti yengo nginza pëpe,  lo yeke zo so afa lege nzoni na azo ti da ti lo, amolenge ti lo ayeke woko tere na gbe ti lo na bê ti ala kue,  (teti tongana mbeni zo ahinga ti fa lege nzoni na azo ti da ti lo pëpe, fade lo yeke bata congrégation ti Nzapa ni tongana nyen?)  lo yeke mbeni fini zo na yâ ti mabe pëpe, si baba alï lo pëpe na lo tï pëpe na gbe ti ngbanga so a dë na li ti Zabolo.  Nga, a yeke nzoni azo ti gigi asara nzoni tënë ti lo, si azo atene sioni tënë na ndo ti lo pëpe na lo tï pëpe na yâ ti kûkû ti Zabolo.  A yeke nzoni awakua ti mungo maboko aduti azo so ane tere ti ala, yanga ti ala ayeke use use pëpe, ala yeke azo so abi tere ti ala na yâ ti nyongo vin pëpe, ala sara bê ti warango ye na lege ti likisi pëpe,  nga tënë ti mabe so Nzapa ahonde nda ni, ala bata ni na nzoni yingo-ti-hinga. 10  Nga, zia a tara ala kozoni ti bâ wala ala lingbi na kua ni, na pekoni zia ala sara kua tongana awakua tongana tënë ayeke na li ti ala pëpe. 11  Legeoko nga, a yeke nzoni awali aduti azo so ane tere, ala duti azo ti pango zo pëpe, sarango ye ti tere ti ala ayeke lakue nzoni, ala yeke be-ta-zo na yâ ti aye kue. 12  Zia awakua ti mungo maboko aduti akoli so ayeke gi na wali oko, ala fa lege nzoni na amolenge ti ala nga na azo ti da ti ala. 13  Teti akoli so ayeke sara kua nzoni mingi, ala yeke wara nzoni iri nga ala lingbi ti sara tënë ti mabe na Christ Jésus na kamene oko pëpe. 14  Atâa so mbi yeke na beku ti si na mo kâ fade fadeso, mbi yeke sû mbeti so na mo, 15  si tongana mbi si hio pëpe, mo hinga tongana nyen ti sara ye na popo ti azo ti da ti Nzapa, so ti tene congrégation ti Nzapa so ayeke na fini, congrégation so ayeke gbu tâ tënë na nduzu na ayeke bata ni. 16  Biani, ti tâ tënë ni, tënë so Nzapa ahonde nda ni, so ti tene tënë ti gbungo tënë ti Nzapa ngangu so, ayeke kota tënë mingi: ‘A fa lo na gigi na yâ ti mitele, a diko lo tongana zo ti mbilimbili na yâ ti yingo, lo si na a-ange, a fa tënë na ndo ti lo na popo ti amara, a mä na bê na lo na yâ ti dunia so, a mû lo na nduzu na yâ ti gloire.’

Kete tënë