Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Bible na ndo ti Internet

MBETI TI NZAPA TI FINI DUNIA

1 Timothée 1:1-20

1  Paul, bazengele ti Christ Jésus na lege ti yanga so Nzapa Sauveur ti e amû nga na ti Christ Jésus, beku ti e,  atokua mbeti so na Timothée, tâ molenge ti mbi na yâ ti mabe: Zia kota nzobe, nzoni bê na siriri so alondo na Nzapa Babâ ni nga so alondo na Christ Jésus Seigneur ti e aduti na mo.  Gi tongana ti so mbi wa mo lani ti ngbâ na Éphèse na ngoi so lani mbi ga nduru ti gue na Macédoine, mbi wa mo nga fadeso ti ngbâ kâ, tongaso si mo mû yanga na ambeni zo ti fa ambeni tënë nde pëpe,  ti dengi mê pëpe na ambaï ti mvene nga na dikongo molongo ti iri ti akotara, so na nda ni mbeni ye ayeke na pekoni pëpe, me so adü gi ahundango ndo so amû ngoi ti zo mingi ahon ti mû na zo mbeni ye so alondo na Nzapa nga so akpengba mabe ti zo.  Biani, nda ni so mbi mû yanga so ayeke ti tene e duti na ndoye so alondo na vuru bê, na nzoni yingo-ti-hinga nga na mabe so ayeke ti handango lê ti zo pëpe.  Teti so ambeni zo ague nde na aye so, a sara si ala dö lege ni azia ti gue na peko ti asenge senge tënë,  ala ye ti ga azo ti fango ndia, me aye so ala yeke tene nga so ala yeke luti na ndo ni ngangu so, ala mä yâ ni pëpe.  E hinga so Ndia ayeke nzoni mingi gi tongana a sara kua na ni tongana ti so a hunda  na hingango ye so: A sigigi na ndia pëpe ndali ti zo so ayeke mbilimbili, me ndali ti azo so akpe ndia pëpe na azo ti ngangu-li, azo so akpe Nzapa pëpe na awasiokpari, azo so ayeke abe-ta-zo pëpe, azo so ayeke buba nengo ti ye so ayeke nzoni-kue, azo ti fango babâ ti ala na azo ti fango mama ti ala, azo ti fango zo, 10  azo ti sarango lango-sioni, akoli so alango na amba ti ala koli, azo ti nzingo zo ti hon na ni, azo ti mvene, azo so adeba yanga ti ala na mvene nga aye kue so ague nde na nzoni fango ye 11  so alingbi na pendere nzoni tënë ti Nzapa so ayeke na ngia, nzoni tënë so a zia na maboko ti mbi. 12  Mbi kiri singila na Christ Jésus, Seigneur ti e, lo so amû na mbi ngangu, ngbanga ti so lo bâ mbi tongana zo so ayeke be-ta-zo na lege so lo soro mbi ndali ti mbeni kusala, 13  atâa so kozo mbi yeke mbeni zo ti zongango ndo, zo ti sarango ye ti ngangu na azo ti lo nga zo ti sioni yanga. Ye oko, a sara nzoni bê na mbi ngbanga ti so ye so mbi sara lani, mbi hinga ni pëpe nga mabe amanke mbi. 14  Me kota nzobe ti Seigneur ti e awu mingi mingi legeoko na mabe nga na ndoye so ayeke na yâ ti Christ Jésus. 15  Tënë so, zo alingbi ti zia bê ti lo na ndo ni nga a lingbi ti tene zo ayeda na ni na bê ti lo kue: Christ Jésus aga na dunia so ti sö awasiokpari. Na mbi, mbi yeke kota wasiokpari ni na popo ti ala. 16  Ye oko, nda ni so si a sara nzoni bê na mbi ayeke ti tene na lege ti mbi, so mbi yeke kota wasiokpari ni, Christ Jésus afa kangango bê ti lo kue si mbi duti tapande teti ala so ayeke zia ande mabe ti ala na lo ti tene ala wara fini ti lakue lakue. 17  Lo so ayeke Gbia ti lakue lakue, so tere ti lo alingbi ti buba pëpe, so lê abâ lo pëpe, lo so gi lo oko ayeke Nzapa, zia a mû na lo gonda na gloire lakue lakue nga kpu na kpu. Amen. 18  Molenge ti mbi Timothée, mbi mû na mo yanga so, so ague oko na aprophétie so a tene lani so andu tâ gi mo, si na lege ni mo ngbâ ti tiri pendere bira, 19  na batango mabe nga na nzoni yingo-ti-hinga, so ambeni zo adö lege ni azia na mabe ti ala atï tongana ti so mangboko atuku na ngu. 20  Hyménée na Alexandre ayeke na popo ti azo so, na mbi zia ala na maboko ti Satan tongaso si a se ala ti fa na ala ti zonga ndo pëpe.

Kete tënë