Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Azo wa la ayeke sara laso ye so Jéhovah aye?

 YE TI MANDA 19

Ngbâa be-ta-zo so ayeke sara ye na ndara ayeke zo wa?

Ngbâa be-ta-zo so ayeke sara ye na ndara ayeke zo wa?

Kobe ti yingo so e wara asara e nzoni mingi

Ngoi kete kozoni si lo kui, Jésus asara lisoro na adisciple ti lo, Pierre, Jacques, Jean na André, gi lo na ala osio. Lo fa na ala fä ti singo ti lo na alango ti nda ni. Na pekoni lo hunda na ala: “Zo wa mbilimbili si ayeke ngbâa be-ta-zo so ayeke sara ye na ndara? Lo so wa ti lo azia lo na ndo ti azo ti kua ti lo ti mû na ala kobe ti ala na ngoi ni so alingbi?” (Matthieu 24:3, 45, Marc 13:3, 4). Na yâ ti atënë ti lo, Jésus afa so teti so lo yeke “wa” ti ala, lo yeke mû ande kua na ala ti mû lakue kobe ti yingo na adisciple ti lo na alango ti nda ni. Azo ni so, so tongana a bungbi ala kue ala ga ngbâa ni, ayeke azo wa?

Ala yeke atâ disciple ti Jésus so Nzapa asoro ala ti gue na yayu. A bâ polele so “ngbâa” ni so ayeke Bebungbi ti aTémoin ti Jéhovah. A yeke lo la lo yeke mû kobe ti yingo na amba ti lo awakua ti Jéhovah na tâ ngoi ni. Gi na mbage ti ngbâa be-ta-zo so la si e lingbi ti wara lakue “kobe so alingbi na [e] na ngoi ni so alingbi”.Luc 12:42.

Ala yeke bâ ndo na ndo ti azo ti da ti Nzapa (1 Timothée 3:15). Jésus amû kota kua na ngbâa ni ti bâ ndo na ndo ti kusala so mbage ti bungbi ti Jéhovah so ayeke na sese ge ayeke sara na ndo ti dunia mobimba. Kua ni ayeke ti bâ lege ti aye tongana nginza, ada ti bungbi nde nde, afiliale, ambeti na ambeni ye nde. Ala yeke bâ ndo na ndo ti kua ti fango tënë nga ala yeke fa ye na e na lege ti acongrégation ti e. Ni la, ti tene e wara ye so e bezoin ni na tâ ngoi ni, “ngbâa be-ta-zo so ayeke sara ye na ndara” ayeke kangbi kobe ti yingo na lege ti ambeti nga na lege ti aye so e yeke manda na ngoi ti abungbi nga na akota bungbi.

Ngbâa ni ayeke be-ta-zo na lege so lo yeke fa gi atënë so ayeke na yâ ti Bible nga na lege so lo yeke sara kua ti lo ti fango nzoni tënë. Lo sara ye na ndara ndali ti so lo yeke sara kusala nzoni mingi na aye so Christ azia na tïtî lo na ndo ti sese ge (Kusala 10:42). Jéhovah airi tënë nzoni na ndo ti kua ti ngbâa ni na sarango si aye ti lo awu, atâa na lege ti mitele wala na lege ti yingo.Ésaïe 60:22; 65:13.

  • Jésus azia kua ti mungo kobe ti yingo na adisciple ti lo na tïtî zo wa?

  • Ngbanga ti nyen a tene ngbâa ni ayeke be-ta-zo nga lo sara ye na ndara?