Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Azo wa la ayeke sara laso ye so Jéhovah aye?

 YE TI MANDA 3

Lê ti azo akiri azi na ndo ti tâ tënë tongana nyen?

Lê ti azo akiri azi na ndo ti tâ tënë tongana nyen?

Awamandango Bible, na popo ti ngu 1870

Kozo numero ti Tour ti Ba Ndo, na 1879

Tour ti Ba Ndo laso

Bible atene ândö so na peko ti kuâ ti Christ, ambeni zo ayeke londo na popo ti akozo Chrétien na ala yeke fa ye ti wataka na azo nga ala yeke ba yâ ti atâ tënë ti Bible (Kusala 20:29, 30). A yeke tâ gi ye so asi na pekoni la. Ala bungbi afango ye ti Jésus na ti apaïen oko, na ye so asara si aChrétien ti wataka abâ gigi (2 Timothée 4:3, 4). Nyen la apusu e ti tene na kite oko pëpe so laso e hinga tâ mbilimbili ye so Bible afa biani?

Ngoi ni asi lani awe ti tene Jéhovah asigigi na tâ tënë. Nzapa atene lani so na ‘lâ ti nda ni, ndara ayeke wu mingi.’ (Daniel 12:4). Na ngu 1870, mbeni kete wungo ti azo so ayeke gi lani tâ tënë aga ti bâ so mingi ti aye so a-eglize afa ague nde na ye so Bible afa ti lo. Tongaso, ala to nda ti gi ti hinga tâ nda ti ye so Bible afa, na Jéhovah amû maboko na ala na yâ ni.

Ambeni zo so aye lani ti hinga tâ tënë agi yâ ti Bible nzoni. A-Wamandango Bible so, so aga kozo na e, asigigi na mbeni kode ti gingo nda ti ye so e ngbâ ti mû pekoni laso. Ala yeke mû mbeni tënë ti yâ ti Bible na ala yeke pika patara na ndo ni. Tongana a si so ala mä yâ ti mbeni tënë ti yâ ti Bible ni ape, ala yeke gi ambeni versê nde so afa ndani. Tongana ye so ala wara ague oko na tanga ti aversê ti Bible, ala sara ni na mbeti. So ala zia si Bible wani la ayeke fa nda ti ye na ala, lê ti ala akiri azi na ndo ti iri ti Nzapa na Royaume ti lo, na ndo ti ye so lo leke ti sara ndali ti azo nga ndali ti sese, na ndo ti dutingo ti azo so akui awe nga na ndo ti beku ti zingongo ti akuâ. Gingo nda ti ye ti ala ni azi ala na gbe ti gbâ ti afango ye ti wataka nga na asarango ye so ayeke na lege ni pëpe.Jean 8:31, 32.

Ti si na ngu 1879 aWamandango Bible so abâ so ngoi ni asi awe ti fa tâ tënë na ndo ti sese mobimba. Tongaso, na ngu ni so, ala to nda ti sigigi na mbeti so e ngbâ lakue ti sigigi na ni laso, so ayeke Tour ti Ba Ndo Afa Tene ti Royaume ti Jéhovah. Ti fadeso e yeke fa tâ tënë ti Bible na azo na yâ ti akodoro 240 nga na ayanga ti kodoro ahon 750. Tâ tënë, laso ndara, wala tâ hingango ye, awu mingi mingi!

  • Nyen la asi na tâ tënë na peko ti kuâ ti Christ?

  • Nyen la asara si lê ti e akiri azi na ndo ti tâ tënë so ayeke na yâ ti Bible?