Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Azo wa la ayeke sara laso ye so Jéhovah aye?

 YE TI MANDA 14

A-ekole wa la a sigigi na ni ndali ti apionnier?

A-ekole wa la a sigigi na ni ndali ti apionnier?

États-Unis

Ekole ti Galaad, na Patterson, New York

Panama

Teti angu mingi, a hinga aTémoin ti Jéhovah na sigingo na a-ekole so ayeke fa ye na aChrétien. A sigigi na ambeni ekole ni nde ndali ti azo so amû ngoi ti ala kue teti kua ti fango tënë ti Royaume, tongaso si ala ‘sara kusala ti ala ni kue.’2 Timothée 4:5.

Ekole ti apionnier. Tongana mbeni pionnier asara ngu oko na yâ ti kua ti lo ti pionnier awe, a yeke zia iri ti lo na mbeni ekole so ayeke ninga lango omene. Mingi ni, a yeke sara ekole ni so na yâ ti Da ti Royaume so ayeke nduru na ndo so pionnier ni alango dä. A sara ekole ni so ti mû maboko na pionnier ni ti ga nduru mingi na Jéhovah, ti tene lo wara anzoni akode na yâ ti ambage nde nde kue ti kua ti lo ni nga ti tene lo ngbâ lakue ti sara kua ti lo ni nzoni.

Ekole ti awafango nzoni tënë ti Royaume. Ekole ni so ayeke ninga nze use, na a sara ni ndali ti apionnier so aninga na yâ ti kua ti ala na so ala lingbi ti yeda ti dö ndo ti ala ti zia ti gue na mbeni ndo so bezoin ayeke dä. A yeke mo bâ mo tene ala tene, “Mbi lâ! Tokua mbi”, ti gue oko na tapande ti Jésus Christ, so ayeke lani kota Wafango tënë na ngoi so lo yeke na sese ge (Ésaïe 6:8, FD; Jean 7:29). Ti tene ala dö kodoro ti ala ti zia a hunda peut-être na ala ti changé dutingo ti ala. Asarango ye ti azo ti ndo ni alingbi ti duti nde na ti ala, peut-être dê wala ndowa ayeke na ndo ni so mingi nga kobe ti ndo ni apeut ti duti nde na ti so lo yeke te ka. Peut-être ala bezoin nga ti manda mbeni fini yanga ti kodoro. Azo so ayeke gue na ekole ni so ayeke aita-koli nga na aita-wali kumbamba na aita so asara mariage awe, so ngu ti ala ayeke na popo ti ngu 25 ti si na ngu 65. Ekole ni so ayeke mû maboko na ala ti duti na apendere sarango ye na yâ ti akua ti ala nga ti wara akode so alingbi ti sara si Jéhovah na bungbi ti lo asara kua mingi na ala.

Ekole ti Galaad ti Mandango Bible ti Société Watchtower. Na yanga ti Hébreu, tënë “Galaad” aye ti sara tënë ti “Kundu so ayeke témoin”. Depuis so a zia gere ti Ekole ti Galaad so na sese na ngu 1943, a tokua amissionnaire ahon 8000 tongaso, so asara ekole ni so, ti tene ala fa tënë ti témoin “juska na nda ti sese.” (Kusala 13:47) Na tapande, tongana amissionnaire ti e asi lani kpâ na Pérou, congrégation oko ayeke lani dä ape, me fadeso e yeke na ni ahon 1000. Nga, tongana amissionnaire ato nda ni ti fa tënë na Japon, aTémoin asi nga lani bale-oko ape na ngoi ni kâ, me fadeso ala si 200000. Ekole ti Galaad ni ayeke ninga nze oku. Na ngoi ti mandango aye ni, azo ni ayeke mû ngoi ti ala ti manda aversê oko na oko kue ti yâ ti Mbeti ti Nzapa. Azo so ayeke gue na ekole ni so ayeke apionnier spécial, amissionnaire, abéthelite wala asurveillant ti circonscription. Ekole ni so ayeke leke ala ti mû maboko mingi na yâ ti kota kua so e yeke sara na ndo ti dunia kue, tongaso si kua ni aluti nzoni.

  • A zia Ekole ti apionnier na sese ngbanga ti nyen?

  • Ekole ti awafango nzoni tënë ti Royaume ayeke ndali ti azo wa?

TI HINGA AMBENI TËNË

A-Témoin ti Jéhovah: Bungbi so a leke ni ti fa nzoni tënë

A hinga aTémoin ti Jéhovah nzoni mingi ndali ti kusala ti fango ye na ndo ti Bible so ala yeke sara na yâ ti akodoro nde nde. Bungbi ti ala ni ayeke tambela tongana nyen, azo wa la ayeke na li ni nga ala yeke wara nginza na ndo wa?

A fa kode ti sarango kua na awakua ti Royaume ni

Tongana nyen la a-ekole ti bungbi ti e aleke awakua ti Royaume ti sara kua ti ala nzoni?