Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Sara ye na mabe tongana ti ala

Lettre ti Bebungbi

Lettre ti Bebungbi

Na aita ti e so e ye ala mingi:

A sara ngu mingi awe si a sigigi na amolongo ti ambeni article ti Tour ti Ba Ndo so mama-tene ni ayeke “Mû tapande ti mabe ti ala.” A sigigi na ni na ayanga ti kodoro nde nde na ndo ti dunia mobimba. A sara a-article ni ti tene tongana azo laso adiko ni, ala bâ tere ti ala na yâ ni nga ala bâ tongana nyen la si ambeni koli na ambeni wali ti ândö asara ye na mabe na lê ti akpale nga na aye ti ngangu so asi na ala. A-article so asara nyen na ndo ti azo so adiko ni?

Na peko ti so lo hunzi ti diko article na ndo ti Marthe, mbeni wali atene: “So ngia si mbi he! Tâ gi sarango ye ti tere ti mbi la! Mbi ye ka ti yamba agene ti mbi nzoni. Me teti so mbi mû ka ngoi ti mbi kue ti lekere na aye ndali ti agene ti mbi, mbi pensé ka ti duti na ala ape.” Mbeni maseka-wali atene pendere tënë so na ndo ti mbaï ti Esther, lo tene: “Mbaï ni afa tâ na e tongana nyen la tënë ti bongo nga na ti ambeni fini ye alingbi ti gbu bê ti e mingi. Tâ tënë, a lingbi e yü bongo nzoni, me zia si ahon ndo ni ape.” Lo kiri lo tene: “Ye so anzere mingi na Jéhovah ayeke ye so ayeke na yâ ti bê ti e.” Article so asara tënë na ndo ti bazengele Pierre apusu mbeni ita-wali ti tene tënë so: “Mo bâ mo tene a yôro tâ gi mbi na yâ ti mbaï ni! Mbi tara ti zia tere ti mbi na yâ ni, ti mä atënë ni nga ti bâ aye ni.”

Azo so, nga na ambeni mingi so atokua mbeti ti fa na singila ti bê ti ala ndali ti a-article so, afa tâ tongana nyen la tënë ti bazengele Paul so ayeke tâ tene; a tene: “Aye kue so a sû ândö giriri na yâ ti Mbeti ti Nzapa, a sû ni ti tene a fa ye na e.” (aRom. 15:4). Biani, Jéhovah azia ambaï so na yâ ti Bible, si tongana e diko ni, e manda apendere ye dä. Ni la, e kue, atâa e sara ngu oke na yâ ti tâ tënë awe, e lingbi ti manda ye na lege ti ambaï so.

E wa mo mingi ti diko mbeti so, ti ku ape. Yôro ni na yâ ti kapa ti mo ti Vorongo Nzapa na yâ ti sewa, a yeke nzere na amolenge mingi ande. Na ndembe so a yeke manda ni ande na bungbi na ngoi ti Mandango Bible ti Congrégation, manke mbeni oko ape. Mû ngoi ti mo ti diko ni yeke yeke. Bâ aye ni na yâ ti li ti mo na zia tere ti mo na yâ ni. Aye so asi na azo ti yâ ti mbaï ni, tara ti zia tere ti mo na place ti ala ti hinga ye so asi na ala. Bâ ye so ala sara na gbele ti mbeni ye, na bâ tongana mo la fade, ka mo yeke sara ti mo tongana nyen?

A nzere na e mingi so e na mo kue e wara mbeti so ti manda ni. Zia si a sara nzoni na mo nga na sewa ti mo. Hinga so e ye mo mingi na zia Jéhovah aduti na mo,

Bebungbi ti aTémoin ti Jéhovah