Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Sara ye na mabe tongana ti ala

Atënë ti nda ni

Atënë ti nda ni

Ala duti . . . azo so asara ye tongana ti ala so, na lege ti mabe nga na kangango bê ti ku ye, awara azendo so a mû ni.”AHÉBREU 6:12.

1, 2. Ngbanga ti nyen a yeke kota ye ti tene e kpengba mabe ti e laso? Fa ni na lege ti mbeni tapande.

MABE. Tënë so ayeke pendere mingi nga afa mbeni sarango ye so anzere na bê mingi. Ye oko, tongana e tï na ndo ti tënë so, a yeke nzoni e pensé nga na mbeni tënë ni nde, so ayeke “Hio!” Ti tâ tënë ni, tongana e yeke na mabe ape, a lingbi e gi lege hio ti duti na ni. Nga, tongana e yeke na mabe, a lingbi e sara ye hio ti bata ni na ti kpengba ni. Ngbanga ti nyen?

2 Tara ti bâ so mo yeke fâ yâ ti mbeni kota yando so ahule ngangu, na nzara ti ngu ahon ndo ti mo. Mo wara ngu kâ, me a lingbi mo bata ni si lâ ahule ni ape. Nga, tongana mo si na mbeni ndo, a lingbi mo tö mbeni ngu ni ti tene amû lege na mo ti si na ndo so mo yeke gue dä. Laso, e azo kue e yeke na yâ ti mbeni dunia so e lingbi ti haka ni na mara ti yando so, so warango tâ mabe dä ayeke ngangu. Tongana e bata mabe ni so nzoni ape nga e yeke gi ti kpengba ni ape, a yeke girisa hio. Ni la a lingbi e sara ye hio, teti tongana ti so zo abezoin ngu ti ngbâ na fini, e bezoin nga mabe ti ngbâ lakue na nzoni songo na Jéhovah.—aRom. 1:17.

3. (a) Jéhovah amû na e nyen ti tene e duti na mabe? (b) Aye use wa a lingbi e girisa ti sara ni ape?

3 Jéhovah ahinga so e yeke tâ na bezoin ti mabe. Lo hinga nga so a yeke ngangu mingi ti duti na mabe na ti bata ni laso. Ndani la si lo zia tapande ti ambeni zo na yâ ti Bible ti tene e mû peko ni. Jéhovah apusu bazengele Paul ti sû tënë so: “Ala duti . . . azo so asara ye tongana ti ala so, na lege ti mabe nga na kangango bê ti ku ye, awara azendo so a mû ni.” (aHéb. 6:12). Ndali ti atënë so, bungbi ti Jéhovah awa e mingi ti sara kue ti sara ye tongana ti akoli na awali be-ta-zo, so ambeni ayeke na yâ ti mbeti so. Ti fadeso, nyen la a lingbi e girisa ti sara ni ape? (1) A lingbi e girisa ape ti kpengba lakue mabe ti e, nga (2) a lingbi e girisa ape ti sara si beku so e yeke na ni aduti tâ ye na yâ ti li ti e.

4. (a) Na lege wa Satan ayeke kota wato ti mabe? (b) Ngbanga ti nyen a lingbi e tene pëpe ti e awe la?

4 Kpengba lakue mabe ti mo. Kota wato ti mabe ayeke Satan. So dunia kue ayeke na gbe ti ngangu ti lo, Satan asara si a yeke ngangu na zo ti bata tâ mabe. Nga, teti so lo yeke ngangu mingi ahon e, e tene so ti e awe la? e lingbi ti kpengba mabe ti e ape? Oko ape! Jéhovah ayeke tâ kota Kamarade ti azo kue so aye ti duti na tâ mabe. Lo tene na e so lo yeke mû maboko na e ti ke Zabolo si lo kpe yongoro na e (Jacq. 4:7). E yeke ke Satan na mungo ngoi lâ oko oko ti kpengba mabe ti e. E yeke sara ni tongana nyen?

5. Nyen la abe-ta-zo ti giriri asara ti duti na mabe?

 5 Tongana ti so e bâ awe, a dü abe-ta-zo so na mabe ni dungo ape. Gigi ti ala afa biani so yingo vulu ti Jéhovah la amû maboko na ala ti duti na mabe ni (aGal. 5:22, 23). Ala sambela lani Jéhovah ti mû maboko na ala, na Jéhovah akpengba mabe ti ala. Zia e kue e sara tongaso. E girisa lâ oko ape so Jéhovah ayeke mû yingo ti lo na azo kue so ahunda ni na lo na so ayeke sara ye ague oko na sambela ti ala (Luc 11:13). Me, ambeni ye nde wa a lingbi e sara ni?

6. E lingbi ti sara nyen ti bâ nzoni na lege ti ambaï ti yâ ti Bible so e yeke manda?

6 Na yâ ti mbeti so, e bâ gi ambeni tapande ti azo so asara ye na kota mabe. Me ambeni angbâ gbani! (Diko aHébreu 11:32.) E lingbi ti manda ye mingi na mbage ti azo ni so kue, oko na oko. Me tongana e diko ye na ndo ti ala gi na loro loro, e lingbi ande ape ti kpengba mabe ti e wani. Ni la, zia e mû ngoi ti hasa yâ ti atënë ni nzoni nga na anzene nzene tënë so andu ala. Tongana e dabe ti e lakue so abe-ta-zo so ayeke lani ‘azo tongana e,’ aye so asi na ala lani so ayeke ga polele na yâ ti li ti e (Jacq. 5:17, La Sainte Bible en sango). Nga, tongana e zia tere ti e na place ti ala, e yeke hinga tongana nyen la ala hon ndo ti akpale ti ala so akpa ati e.

7-9. (a) Tongana lani ambeni wakua be-ta-zo ti Jéhovah so Bible asara tënë ti ala avoro Jéhovah tongana ti so e yeke sara laso, a yeke sara nyen na ndo ti ala? (b) Ngbanga ti nyen a yeke ti e ti kpengba mabe ti e na lege ti akusala ni?

7 E yeke kpengba nga mabe ti e na lege ti akusala ni, ngbanga ti so “mabe so ayeke na akusala pëpe akui awe.” (Jacq. 2:26). Bâ tënë so si: Tongana lani Jéhovah ahunda na abe-ta-zo so e manda ye na ndo ti ala so ti sara a-oko kua so lo mû na e laso ti sara so, tere ti ala ayeke nzere mingi, ni ape?

8 Na tapande, tongana lani Jéhovah atene na Abraham ti voro lo pëpe na lege ti agbalaka ti tênë so Abraham ni asara na yâ ti ngonda, me ti voro lo na popo ti awakua ti lo na Da ti Royaume nga na akota bungbi, mo pensé tere ti Abraham ayeke nzere ape? Na ando tongaso la si lo yeke manda aye mingi na ndo ti azendo so lo bâ ti lo ni lani gi na lê “yongoro kâ”. (Diko aHébreu 11:13.) Ti Élie, e hinga so lo fâ lani asioni prophète ti Baal na ngoi so lo yeke sara kue ti ngbâ be-ta-zo na Jéhovah na gbe ti komandema ti mbeni sioni gbia so ake Jéhovah na bê oko. Me tongana Jéhovah atene fade na lo ti gue gi na da ti azo ti fa tënë ti dengo bê nga na ti beku na ala, a yeke nzere na lo ape? Ti tâ tënë ni, a yeke nzere mingi na awakua ti Jéhovah ti ândö ti voro Jéhovah tongana ti so e yeke sara laso so.

9 Tongaso, zia e ngbâ lakue ti kpengba mabe ti e na lege ti akusala ni. A yeke tongaso si e yeke fa so e sara ye alingbi na aye so e manda na mbage ti awakua be-ta-zo ti yâ ti Bible. Tongana ti so e tene na yâ ti Atënë ti tongo nda ni ti mbeti so, azo so ayeke ga akota kamarade ti e. Me, songo ti kamarade ni so ayeke ngbâ gi na lê ti mbeti ape, e na ala e ga nduru ti tingbi tere.

10. Apendere ye wa la e yeke wara ni ande na yâ ti Paradis?

 10 Zia si beku so mo yeke na ni aduti tâ ye na yâ ti li ti mo. Ye so akpengba lani mabe ti awakua ti Jéhovah ti giriri ayeke beku so lo mû na ala. Ti mo kue ayeke tongaso? Na tapande, bâ ngia so mo yeke duti na ni ti wara tere na ala na ngoi so Nzapa ayeke “zingo ande [azo ti mbilimbili] na kuâ”. (Diko Kusala 24:15.) Atënë wa la mo ye ande ti hunda na ala?

11, 12. Na yâ ti fini dunia, atënë wa mo yeke hunda peut-être ande (a) na Abel? (b) na Noé? (c) na Abraham? (d) na Ruth? (e) na Abigaïl? (f) nga na Esther?

11 Tongana mo bâ Abel, mo yeke hunda lo ande na ndo ti babâ na mama ti lo? Wala mo yeke tene na lo: “Achérubin so abata lani lege so ague na yaka ti Eden so, mo sara lani tënë na ala? Ala zi yanga na mo lani?” Ka tongana mo tingbi na Noé? Mo yeke tene peut-être na lo: “Mbeto ti aNéphilim asara mo lani? Mo sara lani tongana nyen ti bâ lege ti anyama kue so ayeke lani na yâ ti arche ni?” Hinga ape mo tingbi na Abraham, mo yeke hunda peut-être tënë so na lo: “Mo na Sem abâ lani tere la? Zo wa la afa lani ye na mo na ndo ti Jéhovah zo wa? So lani mo zia Ur mo hon, a yeke lani ngangu na mo?”

12 Bâ fadeso ambeni hundango tënë so mo ye ande peut-être ti hunda na ambeni wali be-ta-zo ti yâ ti Bible so a zingo ala na kuâ. Na Ruth: “Nyen la apusu mo lani ti yeda ti voro Jéhovah?” Na Abigaïl: “Na peko ti so mo mû maboko na David, mbeto ti sara tënë ni na Nabal asara mo lani?” Na Esther: “Tongana aye kue so mo na Mardochée asara lani, so Bible afa ni, ahunzi kue kue kue awe, ala sara nyen na pekoni?”

13. (a) Na peko ti so a yeke zingo ande abe-ta-zo so na kuâ, atënë wa la ala yeke hunda peut-être ande na mo? (b) So mo na abe-ta-zo ti giriri ayeke tingbi tere ande, a sara mo nyen?

13 Kite ayeke pëpe so awakua be-ta-zo so ayeke duti nga na gbâ ti tënë ti hunda na mo. E pensé a yeke nzere ande na mo mingi ti fa na ala ye na ndo ti tënë ti alango ti nda ni nga tongana nyen la Jéhovah aduti na azo ti lo na yâ ti angangu ngoi so. A yeke nzere nga na ala ande ti mä tongana nyen la Jéhovah asara si aprophétie ti lo kue aga tâ tënë. Na yâ ti Paradis ande, e yeke tingbi tere lê na lê na awakua be-ta-zo so, e bezoin ande encore ape ti diko tënë ti ala dikongo na yâ ti mbeti. Ni la, na ngoi so e yeke dä so, sara lakue si azo so aduti atâ zo na lê ti mo. Ngbâ lakue ti sara ye na mabe tongana ti ala. Zia si mo na ala asara na Jéhovah maboko na maboko tongana atâ kamarade kpu na kpu!