Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Royaume ti Nzapa akomanse kua awe!

 CHAPITRE 18

E wara nginza ti sarango na akua ti Royaume ni na ndo wa?

E wara nginza ti sarango na akua ti Royaume ni na ndo wa?

KOTA TËNË TI CHAPITRE NI

Ndani so awakua ti Jéhovah ayeke mû maboko na kua ti Royaume nga lege so ala yeke sara ni

1, 2. (a) Ita Russell atene nyen na mbeni pasteur so aye lani ti hinga tongana nyen la si a yeke bâ lege ti akusala ti aWamandango Bible? (b) E yeke manda nyen na yâ ti chapitre so?

MBENI lâ, mbeni pasteur ti mbeni Eglize aga ahunda Ita Charles Russell ti hinga tongana nyen la a yeke bâ lege ti akua ti aWamandango Bible.

Ita Russell atene: “E yeke ro nginza lâ oko ape.”

Pasteur ni ahunda: “Ka ala yeke wara ka nginza tongana nyen?”

Russell akiri tënë na lo: “Tongana mbi tene na mo tâ tënë, mo yeke yeda na ni ape. Tongana azo aga na abungbi ti e, ala bâ so a hon na sakpa ape. Me ala bâ so a yeke futa ambeni ye. Ala hunda tere ti ala wani, ala tene, ‘Da so ahunda nginza . . . Tongana nyen la mbi lingbi ti mû kete pata ndali ni?’”

Pasteur ni abâ Ita Russell, na li ti lo akpe kue.

Russell akiri atene: “Tâ tënë la mbi yeke tene na mo so. Ala hunda na mbi gi oko tënë so, ‘Tongana nyen la mbi lingbi ti mû kete pata ndali ti kua so?’ Tongana mbeni zo awara ye na lo yeke na kete pata, lo ye ti sara kua na ni teti Seigneur. Tongana lo yeke na ni ape, ndani nyen ti hunda ni na lo?” *

2 Ita Russell ayeke tene biani lani “tâ tënë.” A yeke ngbene ye giriri la awakua ti Jéhovah ayeke mû a-offrande ti mû maboko na kua ti vorongo lo. Na yâ ti chapitre so, e yeke bâ ambeni tapande ti yâ ti Bible nga na mbaï ti e ti laso. Na ngoi so e yeke bâ tongana nyen la a yeke mû nginza laso ndali ti akua ti Royaume ni, a yeke nzoni e oko oko kue e hunda tere ti e: ‘Mbi yeke fa tongana nyen so mbi yeke mû maboko na kua ti Royaume ni?’

“Tongana bê ti zo aye, zia lo ga na offrande ti lo”

3, 4. (a) Jéhovah ahinga nyen na ndo ti azo so ayeke voro lo? (b) Amolenge ti Israël afa lani so ala mû maboko na kua ti lekengo tabernacle tongana nyen?

3 Jéhovah ayeke na confiance na atâ wakua ti lo. Lo hinga so tongana lege azi na ala, na ngia na bê, ala yeke mû ye ti fa so ala mû tere ti ala kue na lo. Zia e bâ atapande use na yâ ti mbaï ti Israël.

4 Na peko ti so Jéhovah asigigi na amolenge ti Israël na Égypte, lo tene na ala ti leke mbeni tabernacle so a yeke yô ni  yongo ti voro na lo. Ti leke ni nga ti zia aye na yâ ni ayeke hunda nginza mingi. Jéhovah afa na Moïse ti tene na azo ni ti mû maboko na kua ni so. Lo tene: “Tongana bê ti zo aye, zia lo ga na offrande ti lo na L’Éternel”. (Ex. 35:5). Azo ni asara nyen lani? A de ti ninga ape la “[azo ti Égypte aforcé] ala ti sara kusala ngangu.” (Ex. 1:14). Me, ala fa so ala mû maboko na kua ni na bê ti ala kue, na lege so ala wani amû lor, argent nga na ambeni ye ti nginza mingi. Mingi ti aye ni so ala wara ni lani na tïtî angbene wa ti ala, azo ti Égypte (Ex. 12:35, 36). Azo ti Israël amû lani ye mingi ahon ti so a yeke na bezoin ni nga a “gbanzi azo ti ga na ye.”​—Ex. 36:4-7.

5. Amolenge ti Israël asara lani nyen na ngoi so David amû lege na ala ti mû a-offrande ti leke na temple?

5 Angu 475 tongaso na pekoni, David amû aye na popo ti aye ti ‘mosoro ti lo wani’ ndali ti lekengo temple, so ayeke kozo da ti vorongo na Jéhovah na ndo ti sese. Na pekoni, lo mû lege na aita ti lo ti Israël ti mû ye. Lo tene na ala: “Tongaso, zo nyen aye ti mû ye na L’Éternel laso na nzobe?” Azo ni amû “ye na nzobe na bê ti ala kue na L’Éternel.” (1 Chron. 29:3-9). David afa so lo hinga lani zo so ayeke na gunda ti aye so a mû so. Lo sambela Jéhovah lo tene: “Ye kue aga na lege ti Mo, ye so e mû na Mo ayeke gi ye ti maboko ti Mo mveni.”​—1 Chron. 29:14.

6. Ngbanga ti nyen a bezoin nginza laso ndali ti kua ti Royaume? Ye so aga na ahundango tënë wa?

6 Lani, Moïse wala David ayeke na bezoin ape ti pusu awakua ti Jéhovah pusungo. Nde na so, azo ni amû aye ni na bê ti ala wani. Ti laso ayeke tongana nyen? E hinga so a hunda nginza ti sara na kua ti Royaume. A yeke futa aye mingi ti sigigi na Bible nga na ambeti ti e ti kangbi ni, ti leke ando ti vorongo Jéhovah dä nga ti bata ni nzoni. A hunda nga nginza ti leke afiliale nga ti mû maboko na aita so ye ti ngangu asi na ala. Ni la, kota hundango ndo ni ayeke so: E yeke wara nginza ndali ti aye so kue na ndo wa? A bezoin ti pusu adisciple ti Gbia ti Royaume ni pusungo?

“Lo yeke iri ye wala lo yeke hunda ye na tïtî azo pëpe ti mû maboko na lo”

7, 8. Ngbanga ti nyen awakua ti Jéhovah ayeke iri nginza wala ayeke hunda ni ape?

7 Ita Russell na amba ti lo ake lani ti mû peko ti kode ti warango nginza so a-eglize ayeke sara na kua lani mingi. Na yâ ti use numero ti Tour ti Ba Ndo, na gbe ti kete li ti tene “Mo ye ti diko ‘Tour ti Ba Ndo’?” Russell atene: “E hinga na bê ti e kue so Jéhovah la ayeke mû maboko na Tour ti Ba Ndo. Teti so a yeke tongaso, lo yeke iri ye wala lo yeke hunda ye na tïtî azo pëpe ti mû maboko na lo. Tongana Zo so atene: ‘Argent ayeke ti Mbi, na lor ayeke ti Mbi’ azia ti mû anginza so e yeke na bezoin ni, ge la e yeke hinga so ngoi alingbi awe ti zia ti sigigi na mbeti so.” (Ag. 2:7-9) Angu 130 na ndo ni na pekoni, Tour ti Ba Ndo nga na bungbi so ayeke sigigi na ni angbâ ngangu lakue.

 8 Awakua ti Jéhovah ayeke iri nginza ape. Ala yeke hon na sakpa na popo ti azo ape nga ala yeke tokua enveloppe na ala pëpe. Ala yeke leke pëpe angia ti nginza ti wara na nginza. Ala ngbâ ti mû peko ti tënë so Tour ti Ba Ndo atene ândö: “E pensé lâ oko pëpe so a yeke na lege ni ti hunda nginza ndali ti Seigneur, tongana ti a-eglize . . . E bâ ti e so nginza so a yeke iri iringo na iri ti Seigneur ason bê ti lo nga lo yeda na ni pëpe. Ye tongaso ayeke ga na tufa ape na ndo ti zo so amû nginza ni nga na ndo ti kua so a sara na ni.” *

“Zia zo oko oko asara tongana ti so lo leke na bê ti lo ti sara”

9, 10. Mbeni oko ti araison so e yeke mû a-offrande na bê ti e wani ayeke so wa?

9 E so e yeke na gbe ti Royaume ti Nzapa laso, a bezoin ape ti pusu e pusungo ti mû ye. Nde na so, na ngia na bê e mû nginza ti e nga na ambeni ye ti e ti mû maboko na akusala ti Royaume. E yeke mû ye na bê ti e wani ngbanga ti nyen? Zia e bâ araison ota.

10 Kozoni, e mû a-offrande na bê ti e wani ndali ti so e ye Jéhovah nga e ye ti “sara aye so anzere na lê ti lo.” (1 Jean 3:22). Jéhovah aye wakua ti lo so amû ye na lo na bê ti lo wani. Zia e hasa yâ ti atënë so bazengele Paul atene na ndo ti mungo ye ti aChrétien. (Diko 2 aCorinthien 9:7.) Tâ Chrétien ayeke pëpe zo so a yeke gbu lo gbungo na ngangu. Me lo mû ye ngbanga ti so “lo leke na bê ti lo ti sara” tongaso. * A ye ti tene so, lo yeke mû ye na peko ti so lo bâ so mbeni bezoin ayeke dä nga so lo lingbi ti kaï bezoin ni so. Mara ti zo tongaso ayeke zo ti bê ti Jéhovah, teti “Nzapa andoye zo so amû ye na ngia.”

Akete molenge ti e na Mozambique nga kue aye ka ti mû offrande

11. Nyen la asara si e yeke mû aye so ayeke nzoni ahon atanga ni kue na Jéhovah?

11 Use ni, e yeke mû a-offrande ti kiri singila na Jéhovah ndali ti atufa mingi so e wara. Zia e bâ mbeni wango na yâ ti Ndia ti Moïse so apusu zo ti gbu li ti lo. (Diko Deutéronome 16:16, 17.) Na ngoi so ala yeke gue na amatanga ota ti ngu oko oko, akoli na Israël oko oko kue ayeke mû lani mbeni matabisi “alingbi na ye so ayeke na ala, na lege ti nzoye so L’Éternel Nzapa ti ala amû na ala.” Ni la, kozo si mbeni koli na Israël ague na mbeni matanga, lo yeke diko anzoni ye so Nzapa amû na lo nga lo bâ yâ ti bê ti lo wani si lo soro matabisi so ayeke nzoni ahon atanga ni kue ti mû ni na Nzapa. Legeoko nga, na ngoi so e yeke gi ti hinga gbâ ti atufa ti Jéhovah so e wara, bê ti e ayeke pusu e ti mû na lo ye ti e so ayeke nzoni ahon atanga ni kue. Aye so e mû na bê ti e kue, so andu a-offrande ti e, afa na gigi singila ti e ndali ti atufa so Jéhovah atuku na ndo ti e.​—2 aCor. 8:12-15.

12, 13. Tongana nyen la a-offrande so e mû na bê ti e wani afa so e ye Gbia ti e? Zo oko oko ayeke mû oke?

12 Ota ni, e yeke fa so e ye Gbia ti e Jésus Christ na lege ti a-offrande so e mû. Tongana nyen? Bâ ye so Jésus atene na  adisciple ti lo na bï so asi kozo ti tene a fâ lo. (Diko Jean 14:23.) Jésus atene: “Tongana mbeni zo andoye mbi, lo yeke bata tënë ti mbi.” Na yâ ti “tënë” ti Jésus ni e yeke wara commandement so lo mû ti fa nzoni tënë ti Royaume na ndo ti sese kue (Mat. 24:14; 28:19, 20). E yeke bata “tënë” ti lo so tongana e sara ye alingbi na ngangu ti e, so ti tene ngoi ti e, ngangu ti e nga na mosoro ti e, ti pusu na li ni kusala ti fango tënë. Ge la e yeke fa so e ye Gbia so Nzapa asoro lo.

13 Biani, e so e mû gi mbage ti Royaume ti Nzapa, e ye na bê ti e kue ti mû nginza ti mû maboko na kua ti Royaume ni. E yeke sara ni tongana nyen? So ayeke desizion ti zo oko oko. Zo oko oko ayeke mû ye alingbi na ngangu ti lo. Ye oko, aita ti e mingi ayeke na aye ti dunia so mingi ape (Mat. 19:23, 24; Jacq. 2:5). Me bê ti aita tongaso ayeke dë ti hinga so Jéhovah na Molenge ti lo ayeke bâ na nene ni akete offrande kue so zo amû ni na bê ti lo kue.​—Marc 12:41-44.

 A yeke wara nginza ni tongana nyen?

14. Teti angu mingi, aTémoin ti Jéhovah ayeke zia ambeti na azo lani tongana nyen?

14 Teti angu mingi, e yeke fa lani ngere ti ambeti ti e na azo so e zia ambeti ni na tïtî ala. Me, ngere ni ayeke lani ngangu ape ti tene azo so ayeke na ye mingi ape awara ambeti ni. Biani, tongana mbeni zo asara lani nzara ti tënë ti e me lo lingbi pëpe ti mû pata ni, e yeke zia mbeti ni na lo. Ye so e ye lani ayeke ti tene azo so aye tâ tënë awara ambeti ti e si ala diko ni na ala bâ nzoni dä.

15, 16. (a) Na ngu 1990, Bebungbi aga na changement wa na yâ ti kode so e yeke zia na ambeti na azo? (b) A yeke mû a-offrande tongana nyen? (Bâ nga encadré “ A-offrande ti e ni ayeke gue na ndo wa?”)

15 Na ngu 1990, Bebungbi ato nda ni lani ti changé kode so e yeke zia na mbeti na azo. Na ngu ni so, na États-Unis, a to nda ti zia ambeti kue na azo teti mbeni offrande. Mbeni lettre so a tokua na acongrégation ni kue atene: “A yeke mû apériodique nga na ambeni mbeti na awafango tënë nga na azo sân ti hunda na ala wala ti wa ala ti futa mbeni wungo ti nginza si ala wara mbeni mbeti. . . . Zo kue so aye ti mû mbeni offrande ti tene a futa na aye ndali ti kua ti e ti fango ye na azo alingbi ti sara ni. Me azo ayeke wara ambeti ti e atâa ala mû offrande wala pëpe.” Ye so a leke so afa polele so e yeke sara kua ti Nzapa nga e yeke mû ye na bê ti e wani nga so “e yeke pëpe azo so ayeke kä tënë ti Nzapa kango”. (2 aCor. 2:17). Na pekoni, a zia kode ti mungo a-offrande so na yâ ti afiliale kue.

16 Azo ayeke mû a-offrande ni tongana nyen? A yeke zia ambeni sanduku na yâ ti aDa ti Royaume ti aTémoin ti Jéhovah na mbeni place so ayeke gboto lê ti azo ape. Azo alingbi ti zia offrande ti ala ala wani na yâ ni wala ti tokua ni na association so e yeke sara kua na ni. Na ngu oko oko, Tour ti Ba Ndo ayeke fa tongana nyen la azo alingbi ti mû a-offrande tongaso.

A yeke sara kua na nginza ni tongana nyen?

17-19. A yeke sara kusala na a-offrande ti e ndali ti kusala na ndo ti sese kue tongana nyen? (b) Ti lekengo aDa ti Royaume na ndo ti sese kue ayeke tongana nyen? (c) Ka ti aye so a yeke futa na yâ ti congrégation?.

17 Kusala na ndo ti dunia kue. A yeke futa nginza ndali ti aye so ayeke mû lege na e ti fa tënë na ndo ti sese kue. Aye so andu nginza so a yeke futa ti sara na ambeti ti kangbi na ndo kue, lekengo afiliale nga bango lege ni. A yeke mû nga nginza ndali ti a-ekole nde nde ti bungbi ti e. Na ndo ni, a yeke mû nginza ti bâ lege ti amissionnaire, asurveillant so ague na ndo nde nde nga na apionnier spécial. A yeke sara nga kua na a-offrande so e mû ti bâ lege ti aita so aye ti ngangu asi na ala. *

18 Lekengo aDa ti Royaume na ndo ti sese kue. A yeke sara kua na nginza ti mû maboko na acongrégation ti leke afini Da ti Royaume wala ti leke peko ni. Ndali ti so azo angbâ ti mû a-offrande, lege ayeke dä ti mû maboko na ambeni congrégation nde. *

19 Aye so acongrégation ayeke futa. A yeke sara kua na  nginza ti futa na aye ndali ti Da ti Royaume si aduti propre. A-ancien alingbi ti hunda ti tene a tokua mbeni mbage ti nginza ni na filiale ti kodoro ti ala ti pusu na kua ti e na devant. Ti sara ni, a-ancien ayeke fa na congrégation mbeni mbeti ti mungo yanga. Tongana aita ayeda na ni, a yeke tokua nginza ni. Nze oko oko, ita so ayeke bâ lege ti compte ti congrégation ayeke leke mbeni rapport ti aye so a futa ni na nginza so a wara ni si a diko ni na congrégation.

20. Mo lingbi ti mû gonda na Jéhovah tongana nyen na “anzoni ye” ti mo?

20 Tongana e bâ aye kue so andu kua ti fango tënë nga ti sarango adisciple na ndo ti sese kue, bê ti e apusu e ti gonda Jéhovah na mungo na lo anzoni ye ti e (aProv. 3:9, 10). Anzoni ye ti e andu ngangu ti e, bibe ti e nga aye ti yingo so e yeke na ni. E ye biani ti sara kua nzoni na aye so na yâ ti kua ti Royaume. Me girisa ape so anzoni ye ti e ni andu nga aye ti sese so e yeke na ni. Zia e leke na bê ti e ti mû ye so e lingbi ti mû na ngoi so e lingbi ti mû ni. A-offrande so e mû na bê ti e wani amû gonda na Jéhovah na afa so e yeke mû maboko na kusala ti Royaume ti Nzapa.

^ par. 10 Tour ti Ba Ndo ti lango 15 ti juillet ngu 1915, na Anglais, lembeti 218-219.

^ par. 8 Tour ti Ba Ndo ti lango 1 ti août ngu 1899, na Anglais, lembeti 201.

^ par. 10 Mbeni wandara atene so tënë ti Grec so a kiri peko ni na “leke na bê” “aye ti sara tënë ti mbeni ye so zo aleke kozo.” Lo kiri lo tene: “Atâa so zo ni ayeke mû ye ni na ngia na bê nga na lê ni lê ni, lo yeke leke ni kozo.”​—1 aCor. 16:2.

^ par. 17Chapitre 20 ti hinga ambeni tënë na ndo ti mungo maboko na aita so aye ti ngangu asi na ala.

^ par. 18Chapitre 19 ti hinga ambeni tënë na ndo ti lekengo aDa ti Royaume.