Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Royaume ti Nzapa akomanse kua awe!

Lettre ti Bebungbi

Lettre ti Bebungbi

Ita ti e so e ye mo mingi:

TARA ti bâ so mo yeke lani dä na Béthel ti Brooklyn na vendredi lango 2 ti octobre ngu 1914. Mo duti na place ti mo so mo yeke duti ka dä ti nyon kawa ti ndapre. Ala ngbâ ti ku gango ti Ita Charles Taze Russell. Mo ye ti bâ, yanga ti ndo ti tengo kobe ni azi, na Ita Russell alï. Tongana ti so lo yeke sara ka lakue, lo duti kpô kete, na pekoni lo tene na sewa ti Béthel ni, lo tene: “Bara ala kue.” Me, ahon ti tene lo gue lo duti na place so lo yeke duti ka dä, lo pika gi maboko ti lo, na pekoni lo tene mbeni pendere tokua, lo tene: “Ngoi ti aGentil ahunzi awe; ngoi ti agbia ti ala ahunzi awe!” Tere ti mo ayeke nzere sioni, ndali ti so depuis la mo yeke ku ngoi ni so kungo so! Mo na tanga ti azo ti sewa ti Béthel ni kue apika maboko ndali ti pendere sango so ala mä so.

 Pendere tënë so Ita Russell atene so asara angu mingi awe. Depuis na peko ti tënë ni so juska laso, nyen la Royaume ni asara? Lo sara aye mingi! Na lege ti Royaume ni so, yeke na yeke, Jéhovah asukula azo ti lo nga lo fa ye na ala. Na ngu 1914 ni lani, wungo ti azo ni ayeke gi kete, me laso, wungo ti ala ahon million mbasambala na ndambo. Afango ye ni so amû maboko na mo tongana nyen?

Laso, e yeke mä ka aita ayeke tene so “char ti Jéhovah so ayeke na yayu ayeke sara kua,” na tënë ti ala ni so ayeke tâ tënë. Me, aye mingi afa na e so a yeke depuis ngu 1914 la char ni so ayeke na yayu so, so ti tene mbage ti bungbi ti Jéhovah so ayeke na yayu, ayeke kpe loro ngangu mingi. Tongana mo diko ande mbeti so nzoni, mo yeke bâ biani so tënë so ayeke tâ tënë. Ti sara si fango nzoni tënë amû ndo ti dunia mobimba kue, awafango tënë asara kua na akode ndenge na ndenge. Na popo ti akode ni so a yeke wara ambeti-sango, tambelango na apancarte ti fa na tënë, afilm, acarte ti fango na tënë, aphonographe, radio même Internet.

Jéhovah airi tufa na ndo ti kua ni, ye so asara si laso e wani e yeke sigigi na ambeti ti Nzapa na ayanga ti kodoro ahon 670, nga e yeke mû ni na azo senge senge. Ambeni ita ayeke mû tere ti ala, na bê ti ala wani, ti mû mbage na kua ti lekengo aDa ti Royaume, aDa ti Assemblée nga na ada ti aBéthel, atâa na yâ ti akodoro so ayeke na nginza mingi wala pëpe. Tongana ambeni ye ti ngangu asi, na tapande, ngu asuku amû ndo wala sese ayengi, aita ti e ti koli na ti wali ayeke gue ti mû maboko na aita so ayeke na ando so kpale ni asi dä. Ye so aita ni so asara afa biani so a dü ala ndali ti “lâ ti ye ti vundu”.—aProv. 17:17.

Na ambeni ngoi, akota zo ti nzapa nga na ambeni wato ayeke lu “ndia ti kirikiri” ti sara si azo abâ kua ti e na nzoni lê ape. Me lakue, aye ti ala ni akiri asara si “nzoni tënë ni akiri amaï”, na ye ni so akpengba mabe ti e mingi.—Ps. 94:20; aPhil. 1:12.

Pasa la e yeke na ni ti bungbi legeoko na ala, amba ti e, “azo ti kua”. Zia ala hinga so e ye ala, oko oko kue, mingi. Sambela ti e ayeke ti tene atënë ti yâ ti buku so amû maboko na ala ti kiri ti ye ye ti héritier ti ala ti yingo ahon ti kozo.—Mat. 24:45.

Ala ngbâ nzoni

Aita ti ala,

Bebungbi ti aTémoin ti Jéhovah