Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Royaume ti Nzapa akomanse kua awe!

 CHAPITRE 6

Awafango tënë: Awafango tënë ni amû tere ti ala na bê ti ala wani

Awafango tënë: Awafango tënë ni amû tere ti ala na bê ti ala wani

KOTA TËNË TI CHAPITRE NI

Gbia ni aleke mbeni bungbi ti awafango tënë

1, 2. Kota kua wa la Jésus asara tënë ni ândö? Nga akota hundango ndo wa abâ gigi?

AKOTA zo ti poroso ayeke mû ka yanga ti sara mbeni ye, me mingi ni, ala yeke sara ye ni ape. Même ala so ayeke na anzoni bibe ayeke na ngangu pëpe ti sara ye kue so ala tene. Me Jésus Christ, Gbia so Nzapa asoro lo, ayeke ti lo nde na ala. Lakue, tongana lo mû yanga ti sara mbeni ye, lo yeke sara ni.

2 Na peko ti so Jésus aga lani Gbia na ngu 1914, lo yeke lani nduru ti sara ye alingbi na mbeni prophétie so lo tene a sara angu 1900 tongaso. Lani, kozo ti tene Jésus akui, lo tene: “A yeke fa ande nzoni tënë ti royaume so na ndo ti sese kue so azo ayeke dä.” (Mat. 24:14). Na ngoi so atënë ti lo so aga tâ tënë, a yeke mû lege na azo ti hinga so lo ga Gbia awe. Me, mbeni kota hunda abâ gigi. Na alango ti nda ni so, azo ayeke ndoye gi tere ti ala wani, ala yeke ye amba ti ala zo pëpe nga ala yeke ndoye angia ahon ti ndoye Nzapa. Tongaso, Gbia ni ayeke sara tongana nyen ti wara mbeni bungbi ti azo so ayeke mû tere ti ala, na bê ti ala wani, ti fa tënë? (Mat. 24:12; 2 Tim. 3:1-5). A yeke nzoni e wara kiringo tënë ni, ngbanga ti so hunda ni so abâ atâ Chrétien kue.

3. Confiance wa la Jésus ayeke na ni lani, na lo manda ni na tere ti zo wa?

3 Zia e kiri e bâ atënë ti yâ ti prophétie ti Jésus so. So lo tene “a yeke fa ande” afa so Jésus ahinga so a yeke fa ande tënë ni biani? En, Jésus ahinga tongaso. Lo hinga na bê ti lo kue so, na alango ti nda ni, lo yeke wara azo so ayeke mû tere ti ala, na bê ti ala wani, ti sara kua ni so. Nyen la asara si lo yeke na confiance tongaso? Lo manda ni na tere ti Babâ ti lo (Jean 12:45; 14:9). Lani, kozo ti tene lo ga na sese ge, lo bâ na lê ti lo wani tongana nyen la Jéhovah ayeke na confiance na awakua ti lo. Zia e bâ tongana nyen la Jéhovah afa confiance ni so.

Ala mû tere ti ala na bê ti ala wani

4. Jéhovah atisa lani azo ti Israël ti sara nyen, na ye ti pekoni ayeke so wa?

4 Zia e bâ ye so asi lani na ngoi so Jéhovah atene na Moïse ti leke tabernacle so ayeke lani ndo so mara ti Israël ayeke voro Jéhovah dä. Na lege ti Moïse, Jéhovah atisa azo ni ti mû maboko na kua ni. Moïse atene na ala, lo tene: “Tongana bê ti zo aye, zia lo ga na offrande ti lo na L’Éternel.” Ye ti pekoni ayeke  so, azo ni “angbâ ti ga na offrande ti be-nzoni . . . lâ na lâ na ndapre kue.” Ala ga na aye ni ahon ndo ni juska “lo gbanzi azo [ni] ti ga na ye.” (Ex. 35:5; 36:3, 6). Ye ni so azo ti Israël ni asara so afa so Jéhovah ayeke na raison ti sara confiance na ala.

5, 6. Tongana ti so a tene na Psaume 110:1-3, bibe wa la Jéhovah na Jésus aye ti tene atâ Chrétien aduti na ni na alango ti nda ni?

5 Jéhovah aku lani ti wara mara ti azo ni so, so ala yeke sara ye na bê ti ala wani, na popo ti awakua ti lo na alango ti nda ni? En! Angu 1 000 kozo ti tene a dü Jésus na sese ge, Jéhovah amû yingo ti lo na David ti sû tënë na ndo ti ngoi so Messie ayeke ga Gbia. (Diko Psaume 110:1-3.) A fa so, na ngoi so a yeke zia Gbia ni na ndo ti mbata ti gbia, lo yeke duti ande na awato. Me nga, lo yeke wara ande mbeni bungbi ti azo so ayeke mû mbage ti lo. Azo ni so ayeke sara kua na Gbia ni so na bê ti ala wani. Même amaseka, so ayeke na popo ti ala, ayeke mû tere ti ala na bê ti ala wani ti sara kua ni so. Ala yeke duti gbani gbani tongana gbâ ti ngu ti pere na ndapre. *

Azo so amû mbage ti Royaume ni ayeke mingi tongana ngu ti pere (Bâ paragraphe 5)

6 Jésus ahinga lani so atënë ti prophétie so ayeke na Psaume 110 so abâ lo (Mat. 22:42-45). Ni la, lo yeke na raison ti gi bê ti lo ape; lo hinga lo tene lo yeke wara ambeni zo so ayeke duti ande na mbage ti lo, na ala yeke mû tere ti ala na bê ti ala wani ti fa nzoni tënë na ndo ti sese kue. Aye so asi na yâ ti mbaï afa nyen na ndo ni? Gbia ni ayeke wara mbeni bungbi ti azo, so na bê ti ala wani, ayeke fa tënë na ngoi ti nda ni so?

“Mbi yeke na pasa nga a yeke ti mbi ti gue ti fa tokua ni so”

7. Na peko ti so a zia Jésus Gbia, aye wa la lo sara ti leke adisciple ti lo ndali ti kua so ayeke ku ala?

7 Kete na peko ti so a zia Jésus Gbia, lo mû li ni ti leke adisciple ti lo ndali ti kota kua so a yeke sara ni ande. Tongana ti so e bâ na Chapitre 2, na ngu 1914 ti si na tongo nda ti ngu 1919, Jésus aga abâ azo ti lo ni nga lo zi asaleté na popo ti ala (Mal. 3:1-4). Na pekoni, na ngu 1919 ni, lo zia ngbâa  be-ta-zo na li ti bungbi ti adisciple ti lo ni (Mat. 24:45). A yeke mbilimbili na ngoi ni so la si ngbâa ni akomanse ti mû akobe ti yingo ni. Lo sara ni na lege ti adiskur ti akota bungbi nga na lege ti ambeti, so na yâ ni, a luti mingi na ndo ti kungba so aChrétien kue ayeke na ni, so a yeke ti tene ala kue afa tënë.

8-10. Tongana nyen la lani akota bungbi apusu azo ti sara kua ti fango tënë? Mû mbeni tapande. (Bâ nga encadré “ Akozo kota bungbi so apusu azo ti sara kusala ti fango tënë.”)

8 Adiskur ti akota bungbi. Teti so aWamandango Bible aye lani ti tene a fa lege na ala, ti londo na lango 1 ti septembre ti si na lango 8 ti septembre ngu 1919, ala bungbi tere na Cedar Point, Ohio (États-Unis) ti sara kozo kota bungbi ti ala na peko ti Kozo Bira. Na use lango ni, Ita Rutherford amû mbeni diskur, so na yâ ni lo tene na azo so aga, lo tene: “Kua ti Chrétien na sese ge . . . ayeke ti fa tokua ti royaume ti Seigneur.”

9 Kota mbage ti bungbi ni ayeke lango ota na pekoni, na ngoi so Ita Rutherford amû mbeni diskur so kota mama-tene ni ayeke, “Diskur na amba ti e awakua,” so asigigi nga na yâ ti Tour ti Ba Ndo na mbage so atene, “E fa tënë ti Royaume ni.” Lo tene: “Na angoi ti ngangu, mbeni Chrétien ayeke hunda tere ti lo, lo tene, Mbi yeke na ndo ti sese so ngbanga ti nyen? Ni la, a yeke nzoni kiringo tënë ti lo ni aduti so: Seigneur, na nzoni bê ti lo, asoro mbi ti ga lembe ti lo ti fa tënë ti lekengo songo na popo ti lo na dunia so, mbi yeke na pasa nga a yeke ti mbi ti gue ti fa tokua ni so.”

10 Na yâ ti oko kpengba diskur ni so, Ita Rutherford asara tënë ti mbeni fini périodique so a yeke sigigi na ni ti gboto lê ti azo mingi na ndo ti Royaume ni, so ayeke oko beku ti azo. Périodique ni so ayeke L’Âge d’Or (so laso a iri ni Réveillez-vous !). Na pekoni, lo hunda ti hinga wala azo oke la aye ti sara kua ti kangbingo périodique ni so. Mbeni tondo na ndo ti kota bungbi ni so atene: “Kiringo tënë ti azo ni ayeke lani ye ti dongo bê. Azo saki omene alondo na nduzu, tongana zo oko.” * A yeke tâ polele so Gbia ni ayeke lani na ambeni zo, so na bê ti ala wani, ayeke na kota nzara ti fa tënë ti Royaume ti lo.

11, 12. Na ngu 1920, tënë wa la Tour ti Ba Ndo atene na ndo ti ngoi so a yeke sara na kua ti fango tënë so Jésus asara tënë ni kozo?

11 Ambeti. Tour ti Ba Ndo afa yeke na yeke nda ti kua so Jésus asara lani tënë ni kozo so, so a yeke ti fa nzoni tënë ti Royaume. Zia e bâ ambeni tapande ni na tongo nda ti ngu 1920.

12 Tokua wa la a yeke fa ni ti tene tënë ti Matthieu 24:14 so aga tâ tënë? A yeke sara kua ni so lawa? Na yâ ti Tour ti Ba Ndo ti lango 1 ti juillet ngu 1920, na Anglais, na mbage so atene, “Nzoni tënë ti Royaume,” a tene: “Nzoni tënë ni ge andu hunzingo ti aye ti ngoi so nga tongo nda ti kua ti Royaume so Christ ayeke Gbia ni.” Na yâ ti oko article ni so, a fa nga ngoi so a yeke fa na tënë ni, a tene: “A yeke fa tënë ni na popo ti ngoi ti kota bira so amû sese kue [Kozo Bira ni] juska na ngoi ti ‘kota ye ti vundu.’” Ni la, article ni atene: “Ngoi ni asi  awe . . . ti tene a fa nzoni tënë ni so na azo kue so atene ala yeke aChrétien.”

13. Tour ti Ba Ndo ti ngu 1921 awa lani aChrétien so a soro ala ti gue na yayu ti bâ kua ti fango tënë tongana nyen?

13 A pusu lani azo ti Nzapa pusungo ti sara kua ni so Jésus asara tënë ni kozo awe so? Oko ape. Na yâ ti Tour ti Ba Ndo ti lango 15 ti mars ngu 1921, na Anglais, na mbage so atene, “Ala sara mbeto ape,” asara tënë mingi na aChrétien so a soro ala ti gue na yayu. A wa lani azo oko oko ti hunda tere ti ala wani, a tene: “Kota pasa nga kota kungba la mbi yeke na ni ti fa tënë so ape?” Article ni atene: “E hinga e tene tongana ala bâ ni tongaso [ti bâ kua ti fango tënë tongana mbeni pasa] ala yeke ga tongana Jérémie, so tënë ti Seigneur aga lani ‘tongana wâ so agbi ye, a gbi na yâ bio ti [lo]’ juska lo kanga yanga ti lo gbä, lo sara tënë.” (Jér. 20:9). Atënë ni so afa biani so Jéhovah na Jésus ayeke na raison ti sara confiance na awafango tënë ti Royaume ni.

14, 15. Na ngu 1922, Tour ti Ba Ndo awa lani aita ti sara kua na akode wa?

14 Atâ Chrétien ni ayeke sara tongana nyen ti wara azo si ala fa tënë ti Royaume ni na ala? Mbeni kpengba nduru article ti Tour ti Ba Ndo ti Anglais, ti lango 15 ti août ngu 1922, so kota mama-tene ni ayeke “Fango tënë ayeke kota ye mingi,” awa aChrétien so a soro ala ti gue na yayu ti bâ nene ti “guengo na ambeti ti e na azo, nene ti sarango lisoro na ala na yanga-da ti ala nga ti fa na ala so Royaume ti yayu aga nduru awe.”

15 A yeke polele so, ti to nda ni na ngu 1919 ti ga na ni, Christ asara kusala na ngbâa be-ta-zo so ayeke sara ye na ndara ti luti mingi na ndo ti pasa nga na kungba so aChrétien ayeke na ni ti fa nzoni tënë ti Royaume na sese ge. Me, aWamandango Bible ni asara ye lani tongana nyen na ngoi so a wa ala ti mû mbage mingi na fango tënë ti Royaume ni so?

“Awakua ti Nzapa ayeke mû tere ti ala na bê ti ala wani”

16. So lani a tene a yeke nzoni azo kue afa tënë, ambeni ancien ni asara ye tongana nyen?

16 Na yâ ti angu so aga na peko ti ngu 1920 nga na ngu 1930, ambeni zo ni ake tënë so a tene a yeke nzoni aChrétien kue so a soro ala ti gue na yayu afa tënë so. Tour ti Ba Ndo ti lango 1 ti novembre ngu 1927, na Anglais, afa ye so asi lani, a tene: “Laso, ambeni zo ayeke dä na yâ ti eglize [wala congrégation] so ala yeke sara kua tongana a-ancien . . . me ala ke ti wa aita ti ala ti mû mbage na kua ni so, nga ala wani ake ti mû mbage dä. . . . So a hunda ti gue da na da ti fa tënë ti Nzapa, ti fa tënë ti Gbia so lo soro nga na ti Royaume ni so na azo, ala he ti ala tënë ni so hengo.” Article ni atene polele, a tene: “Ngoi ni alingbi awe ti tene aita so ayeke be-ta-zo azia lê ti ala na ndo ti mara ti azo tongaso, ti kpe ala nga ti tene na ala so a yeke zi kua ti ancien ni na tïtî ala.” *

17, 18. Mingi ti acongrégation ti ngoi ni kâ asara ti ala ye tongana nyen na gbele fango lege ti ngbâa be-ta-zo ni? (b) Na yâ ti angu 100 so ahon, azo kutu mingi asara nyen?

17 Me, mingi ti aita ayeda, na ngia na bê, na fango lege ti ngbâa be-ta-zo ni. Ala bâ so a yeke mbeni pasa ti tene ala fa tënë ti Royaume ni. Tour ti Ba Ndo ti lango 15 ti mars ngu 1926,  na Anglais, atene: “Awakua ti Nzapa ayeke mû tere ti ala na bê ti ala wani . . . ti fa tokua so na azo.” Awakua ni so asara ye alingbi na tënë ti prophétie so ayeke na Psaume 110:3, nga ala fa so a yeke na bê ti ala wani la ala yeke mû mbage ti Gbia so Nzapa asoro lo.

18 Na yâ ti angu 100 so ahon, azo kutu mingi amû tere ti ala na bê ti ala wani ti sara na kua ti fango tënë ti Royaume so. Na yâ ti ambeni chapitre so ayeke ga, e yeke bâ akode so ala sara na kusala, agbakuru so ala sara na kua ni nga na aye ti pekoni. Kozoni kue, zia e bâ ndani so azo kutu mingi ayeke mû tere ti ala na bê ti ala wani ti fa tënë ti Royaume ni so, atâa so ala yeke na yâ ti mbeni dunia so azo ti yâ ni apensé gi na ala wani. Na ngoi so e yeke bâ mbage so, a yeke nzoni e hunda tere ti e, e tene, ‘Mbi yeke fa nzoni tënë na azo ndali ti nyen?’

‘Ala ngbâ ti gi Royaume ti Nzapa kozoni’

19. Ngbanga ti nyen e yeke sara ye alingbi na wango ti Jésus so atene “ala ngbâ ti gi royaume ti Nzapa . . . kozoni”?

19 Jésus awa lani adisciple ti lo ti “ngbâ ti gi royaume ti Nzapa . . . kozoni”. (Mat. 6:33). E yeke sara ye alingbi na wango so ngbanga ti nyen? Kota raison ni ayeke so e hinga kota ti Royaume ni so; Royaume ni la ayeke kota mbage ti aye so Nzapa aleke ti sara. Tongana ti so e bâ na yâ ti chapitre so ahon, yingo vulu afa apendere tâ tënë na ndo ti Royaume ni so yeke na yeke. Na ngoi so pendere tokua ti Royaume ni so andu bê ti e, e bâ so a yeke kungba ti e ti gi Royaume ni so kozoni.

Legeoko tongana ti mbeni koli so awara mbeni mosoro so a honde si tere ti lo anzere, aChrétien nga kue ayeke na ngia ndali ti so ala wara tâ tënë ti Royaume (Bâ paragraphe 20)

20. Tapande so Jésus amû na ndo ti mosoro so a honde afa so adisciple ti lo ayeke sara ande ye tongana nyen?

20 Jésus ahinga tongana nyen la si adisciple ti lo ayeke sara ye alingbi na wango so ahunda ti gi Royaume ni so kozoni. Zia e bâ tapande so lo mû na ndo ti mosoro so a honde ni. (Diko Matthieu 13:44.) Na ngoi so zo ti fango yaka, so a sara tënë ti lo na yâ ti tapande ni so, angbâ ti sara kua ti yaka, lo wara mbeni mosoro so a honde na lo hinga so ngere ni ayeke kota mingi. Lo sara tongana nyen? “Teti so tere ti lo anzere mingi, lo gue lo kä aye ti lo kue na lo vo yaka so.” E manda nyen dä? E manda so, na ngoi so e wara tâ tënë ti Royaume nga si e hinga so Royaume ni ayeke kota mingi, e yeke sara ye kue so e lingbi ti sara tongaso si e zia Royaume ni na kozo ndo na yâ ti fini ti e. *

21, 22. Tongana nyen la awafango tënë ti Royaume afa so ala yeke gi Royaume ni kozoni? Mû mbeni ta­pande.

21 Awafango tënë ti Royaume afa na lege ti sarango ye ti ala, pëpe gi na tënë ti yanga senge, so ala ngbâ ti gi Royaume ni kozoni. Ala mû fini ti ala, ngangu ti ala nga na amosoro ti ala ti sara na kua ti fango tënë ti Royaume. Azo mingi ayeke sara akota sacrifice na yâ ti fini ti ala ti mû lege na ala ti fa tënë mingi. Amara ti azo tongaso abâ na lê ti ala wani so Jéhovah ayeke iri tënë nzoni na ndo ti azo so ayeke gi Royaume ni kozoni. E yeke bâ mbeni tapande ni oko fadeso.

22 Avery na Lovenia Bristow asara lani kua tongana  acolporteur (wala apionnier) na mbongo ti États-Unis na yâ ti angu 1920. Angu mingi na pekoni, Lovenia adabe ti lo, lo tene: “Mbi na Avery e sara kua ti e ti pionnier nzoni na yâ ti angu mingi. Fani mingi, a si so e hinga pëpe ndo so e yeke wara nginza ti vongo na essence wala kobe dä. Me lakue, Jéhovah azia e ape. E dö nga lege ti kua ti pionnier ni e zia pëpe. Lakue, e yeke wara ye so e yeke na bezoin ni na yâ ti lango oko oko.” Lovenia adabe ti lo na mbeni ngoi so ala yeke na gbata ti Pensacola, na Floride. A si na mbeni ngoi, nginza ti ala aga nduru ti hunzi nga kobe ti ala angbâ mingi ape. Na mbeni lango so ala kiri na yanga-da ti ala, ala wara kota bozo use na akobe na yâ ni nga na mbeni lettre na tere ni. Na yâ ti lettre ni a tene: “Congrégation ti Pensacola la atokua ni.” Tongana Lovenia agbu li ti lo na ndo ti gbâ ti angu so lo sara na yâ ti kua ti ngoi kue, lo tene: “Jéhovah agirisa e lâ oko ape. E zia confiance ti e kue na lo, na lo zia kamene na lê ti e lâ oko ape.”

23. Ti mo, tâ tënë ti Royaume so mo wara asara nyen na ndo ti mo? Mo leke na bê ti mo ti sara nyen?

23 Dutingo ti zo oko oko ayeke nde nde, e kue e peut ti fa tënë alingbi tere ape. Me, e kue e lingbi ti bâ fango nzoni tënë tongana mbeni pasa, nga e lingbi ti sara ni na âme ti e kue (aCol. 3:23). Teti so e bâ tâ tënë ti Royaume so e wara na nene ni, e ye ti sara ye kue so e lingbi ti sara ti mû mbage ti e mingi, nga na bê ti e kue, ti fa nzoni tënë ni. A yeke ye so mo kue mo leke na bê ti mo ti sara la?

24. Mbeni oko ti akota ye so Royaume ni ayeke sara na alango ti nda ni so ayeke so wa?

24 Na yâ ti angu 100 so ahon, Gbia ni asara si prophétie so lo sara tënë ni na Matthieu 24:14 aga tâ tënë. Me, lo gbu azo ni gbungo na ngangu ti sara kua ni ape. Na ngoi so adisciple ni azi tere ti ala na yâ ti dunia so, so azo ti yâ ni apensé gi na ala wani, ala mû tere ti ala na bê ti ala wani ti fa tënë. Kusala ti fango tënë so ala yeke sara na ndo ti dunia mobimba afa so a zia Jésus Gbia ti Royaume ni awe. Nga, a yeke oko ti akota ye so Royaume ni ayeke sara na alango ti nda ni so.

^ par. 5 Na yâ ti Bible, mamio, wala ngu ti pere aye ti sara tënë ti gbâ ti aye.Gen. 27:28; Mi. 5:6.

^ par. 10 Mbeni brochure so iri ni ayeke À qui l’œuvre est confiée, na Anglais, atene: “A yeke sara kua ti kangbingo L’Âge d’Or na yanga-da ti azo tongaso si a gue na ala tokua ti royaume. . . . Tongana a si na mbeni yanga-da si a fa tokua ni awe, a yeke zia L’Âge d’Or oko na yanga-da ni so, même si azo ti da ni ayeda ti sara abonema wala pëpe.” Me, angu mingi na pekoni, a wa aita ti hunda na azo ti sara abonema ti L’Âge d’Or nga na ti Tour ti Ba Ndo. A to nda ni na lango 1 ti février ngu 1940, a wa awakua ti Jéhovah oko oko kue ti tene, tongana ala kangbi apériodique ni, a yeke nzoni ala sû wungo ni na yâ ti rapport ti ala.

^ par. 16 Na ngoi ni so lani, acongrégation la ayeke voté a-ancien. Me, azo so ake kua ti fango tënë, acongrégation ni ayeke voté ala ape. Na Chapitre 12, e yeke bâ ande tongana nyen la a kaï kua ti votengo a-ancien na lege ti acongrégation.

^ par. 20 Jésus ahaka nga mara ti ye ni so na yâ ti tapande ti mbeni wadengo buze so ayeke tambela na nduzu ti gi perle ti nginza mingi. Na ngoi so wadengo buze ni awara perle ni, lo kä aye ti lo kue ti vo na ni (Mat. 13:45, 46). Aparabole use so afa nga na e so e lingbi ti wara tâ tënë ti Royaume na alege nde nde. Ambeni zo awara tâ tënë ti Royaume ni gi tongaso, ala la agi ni gingo ape; me ti ambeni, ala wani la agi ni. Me, atâa e wara tâ tënë ni na lege wa, e kue e yeke sara asacrifice, na bê ti e wani, ti mû lege na e ti zia Royaume ni na kozo ndo na yâ ti fini ti e.

TI HINGA AMBENI TËNË

Sara na Jéhovah kozo si angoi ti vundu asi

Apasa wa aita so ayeke mbakoro ayeke na ni ti fa tënë mingi?