Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Royaume ti Nzapa akomanse kua awe!

 CHAPITRE 17

A fa kode ti sarango kua na awakua ti Royaume ni

A fa kode ti sarango kua na awakua ti Royaume ni

KOTA TËNË TI CHAPITRE NI

Tongana nyen la a-ekole ti bungbi ti Jéhovah aleke awakua ti Royaume ti sara kua ti ala

1-3. Jésus akono lani yâ ti kua ti fango tënë tongana nyen? Ye so aga na ahundango tënë wa?

TETI ngu use, Jésus afa tënë lani na yâ ti Galilée kue. (Diko Matthieu 9:35-38.) Lo gue na yâ ti agbata nga na akete kodoro mingi ti fa ye na yâ ti asynagogue nga ti fa nzoni tënë ti Royaume. Na ndo kue so lo fa tënë dä, azo mingi aga ti mä lo. Tongana ti so Jésus atene, “akobe ti fango ni ayeke mingi,” na a bezoin azo ti kua ni mingi.

2 Me, Jésus aleke aye ti kono yâ ti kusala ti fango tënë ni. Tongana nyen? Lo tokua abazengele 12 “ti fa tënë ti royaume ti Nzapa”. (Luc 9:1, 2). Abazengele ni aye peut-être lani ti hinga tongana nyen la ala yeke sara kua ni so. Kozo ti tene Jésus atokua ala, na ndoye, lo sara mbeni ye so Babâ ti lo ti yayu asara na lo ândo: lo fa kode ti sarango kua ni na ala.

3 Ahundango tënë mingi alondo: Kode ti kua wa la Jésus amanda lani na mbage ti Babâ ti lo? Lege ti sarango kua wa la Jésus afa lani na abazengele ti lo? Ka ti laso, eskê Gbia ti Royaume ni afa na adisciple ti lo lege ti sarango kua ti fango tënë ni? Lo sara ni tongana nyen?

“Mbi yeke tene gi aye so Babâ afa na mbi”

4. Babâ ti Jésus afa ye na lo lani na ngoi wa nga na ndo wa?

4 Jésus ayeda na lê ti azo so babâ ti lo afa ye na lo lani. Na ngoi so lo yeke fa tënë lani, lo tene: “Mbi yeke tene gi aye so Babâ afa na mbi.” (Jean 8:28). A fa ye lani na Jésus na ngoi wa nga na ndo wa? Fango ye ni so ato nda ni gi na peko ti so Nzapa asara lo, lo so lo yeke Kozo Molenge ti Nzapa (aCol. 1:15). Na tere ti Babâ ti lo na yayu kâ, Molenge ni ayeke mä nga ayeke bâ sarango ye ti “Maître” ti lo teti angu mingi mingi (És. 30:20). Ye ti pekoni ayeke so, Molenge ni ahinga ye mingi na ndo ti asarango ye ti tere ti Babâ ti lo, akusala ti lo nga aye so lo leke na bê ti lo ti sara.

5. Aye wa la Babâ ni afa lani na Molenge ni na ndo ti kua ti fango tënë so lo yeke sara ande na ndo ti sese?

5 A si na mbeni ngoi, Jéhovah afa ye na Molenge ti lo na ndo ti kusala so lo yeke sara ande na ndo ti sese. Bâ prophétie so afa songo so ayeke na popo ti Maître ni na kozo Molenge ti lo. (Diko Ésaïe 50:4, 5.) Prophétie ni atene so Jéhovah  azingo Molenge ti lo “na ndapre kue”. Tënë so aye ti fa tapande ti mbeni wafango ye so ayeke zingo élève ti lo hio na ndapre ti fa ye na lo. Mbeni mbeti so asara tënë na ndo ti Bible atene: “A yeke mo bâ mo tene Jéhovah . . . amû lo na ekole, tongana ti so a yeke sara na mbeni élève, na lo fa na lo ye so a lingbi lo fa nga tongana nyen.” Na “ekole” ti yayu so, Jéhovah afa lani na Molenge ti lo “ye so a lingbi [lo] fa na [lo] sara tënë ni.” (Jean 12:49). Babâ ni afa nga na Molenge ti lo tongana nyen la lo yeke fa ye ande. * Na ngoi so Jésus ayeke na ndo ti sese lani, lo sara kusala nzoni na kode so Nzapa afa na lo ti sara na kua ti lo nga ti fa na adisciple ti lo lege ti sara na kua ti ala.

6, 7. (a) Kode ti sarango kua wa la Jésus afa na adisciple ti lo? Lo mû na ala aye ti sara kua wa? (b) Laso, Jésus asara kue ti tene adisciple ti lo awara mara ti fango ye wa?

6 Lege ti sarango kua wa la Jésus afa lani na abazengele ti lo, tongana ti so e tene na tongo nda ti chapitre so? Tongana ti so Matthieu chapitre 10 afa, lo fa na ala ambilimbili ye na ndo ti fango tënë ni. A yeke aye so: ndo so ala yeke fa tënë ni dä (versê 5, 6), tënë so ala yeke fa na azo (versê 7), nene ti zia bê ti ala kue na Jéhovah (versê 9, 10), lege so ala yeke sara tënë na azo ni (versê 11-13), ye so ala yeke sara tongana azo ake ti mä tënë ni (versê 14, 15) nga ye so ala yeke sara tongana a sara ye ti ngangu na ala (versê 16-23). * Ye so Jésus afa polele na abazengele ti lo amû na ala ye kue so ala yeke na bezoin ni ti mû li ni na yâ ti kua ti fango nzoni tënë na ngoi ti ala lani kâ.

7 Ka ti laso ayeke tongana nyen? Jésus, Gbia ti Royaume ti Nzapa, amû na adisciple ti lo mbeni kota kua so ahon atanga ni kue, kua ti fa “nzoni tënë ti royaume so na ndo ti sese kue so azo ayeke dä tongana mbeni tënë ti témoin ndali ti amara kue.” (Mat. 24:14). Eskê Gbia ti e afa na e lege ti sara kpengba kua so? Biani, lo fa ni na e! Na yayu kâ, Jésus asara kue si a fa na adisciple ti lo lege ti fa tënë na azo nga ti sara ambeni kua na yâ congrégation.

Fango kode ti kua na awakua ti ga awafango nzoni tënë

8, 9. (a) Kota raison so a sigigi na Ekole ti Kusala ti aChrétien ayeke nyen? (b) Tongana nyen ekole so amû maboko na mo ti fa tënë nzoni mingi?

8 A ninga awe la bungbi ti Jéhovah ayeke sara kua na akota bungbi nga na abungbi ti congrégation, tongana Bungbi ti Kusala, ti fa na awakua ti Nzapa kode ti fango na tënë. Ye oko, a to nda ni na angu so aga na peko ti ngu 1940, aita so ayeke mû li ni lani na kota ndokua ti e aleke ti fa kode ti sarango kua na lege ti a-ekole nde nde.

9 Ekole ti Kusala ti aChrétien. Tongana ti so e bâ na yâ ti chapitre so ahon, ekole so akomanse na ngu 1943. Eskê ekole ni so ayeke gi ti fa na a-élève ni ti mû anzoni diskur na ngoi ti abungbi ti congrégation awe? Ên-ën. Mbilimbili ye so a zia ekole so na sese ndali ni achangé ape. A yeke ti fa na awakua ti Nzapa lege ti sara kua nzoni na tënë ti yanga ti ala ti  sepela na Jéhovah na fango tënë (Ps. 150:6). Ekole ni amû na aita-koli nga na aita-wali so ayeke sara ekole so ye kue so ala yeke na bezoin ni ti duti anzoni wakua ti Royaume ni.

10, 11. Azo wa la alingbi ti sara Ekole ti Galaad? Aye so a fa na ekole so, ndani ayeke nyen?

10 Ekole ti Galaad. Ekole so a iri ni fadeso Ekole ti Galaad ti mandango Bible ti Société Watchtower akomanse na lundi lango 1 ti février ngu 1943. Lani, a sigigi na ekole so ti fa lege ti sarango kua na apionnier nga na ambeni ita, so asara kua ti ngoi kue, ti sara kua ti missionnaire na ambeni kodoro. Me, ngbene ye na octobre ngu 2011, azo so ayeke gue na ekole so ayeke aita so ayeke sara gi kua ti ngoi kue: apionnier spécial, asurveillant so ague na ndo nde nde na awali ti ala, aBéthelite nga na amissionnaire so ade ti sara ekole ni so ape.

11 Aye so a yeke fa na Ekole ti Galaad so, ndani ayeke nyen? Mbeni ita so afa ye a ninga na ekole so akiri na tënë ni: “A yeke ti sara si mandango Mbeti ti Nzapa ngangu akpengba mabe ti a-élève ni. A yeke nga ti mû maboko na ala ti gi ti duti na anzoni sarango ye so ayeke mû maboko na ala ti hon ndo ti akpale so ala yeke wara na yâ ti akua ti ala. Na mbage, mbeni kota ye ni ayeke ti zia na yâ ti bê ti a-élève ni kota nzara ti mû mbage na kusala ti fango nzoni tënë.”aÉph. 4:11.

12, 13. Nyen la Ekole ti Galaad asara na ndo ti kua ti fango tënë? Fa mbeni tapande ni.

12 Nyen la Ekole ti Galaad asara na ndo ti kua ti fango tënë? Ngbene ye na ngu 1943, aita ahon 8 500 amanda ye na ekole so, * nga amissionnaire so afa ye na ala na Galaad asara kua na yâ ti akodoro ahon 170. Amissionnaire asara kua nzoni na ye so ala manda, ala zia nzoni tapande ti azo so ayapu na yâ ti kua ti fango tënë nga ti fa lege ti sarango kua na ambeni zo ti sara tongana ala. Na yâ ti aye mingi, amissionnaire la amû li ni na yâ ti kua ni na ambeni ndo so awafango tënë ti Royaume ayeke mingi ape wala ayeke dä oko ape.

13 Bâ tapande ti Japon, so fango tënë ti acongrégation akaï na ngoi ti Use Bira. Na août ngu 1949, a wara awafango tënë ti kodoro ni ahon bale-oko ape na Japon. Ye oko, tongana ngu ni ayeke gue ti hunzi, amissionnaire 13 so amanda ye na Galaad afa tënë lani ngangu na Japon. Ambeni missionnaire mingi aga na ndo ni. Na tongo nda ni, amissionnaire ni ayeke sara kua lani mingi gi na yâ ti akota gbata; me na pekoni ala gue na yâ ti ambeni gbata nde. Ala wa azo so ala yeke fa ye na ala nga na ambeni ita ti mû kua ti pionnier. Ngangu kua ti ala so alë lengo mingi. Laso, a yeke wara na Japon awafango tënë ti Royaume ahon 216 000 so nduru na ndambo ni ayeke apionnier! *

14. A-Ekole ti bungbi ti e afa nyen polele? (Bâ nga encadré “ A-ekole so afa kode ti sarango kua na awakua ti Royaume ni.”)

14 Ambeni ekole ni. Ekole ti apionnier, Ekole ti aita-koli na awali ti ala nga Ekole ti aita-koli so ayeke kumbamba amû maboko na a-élève ni ti kpengba songo ti ala na Nzapa nga ti mû li ni na kusala ti fango nzoni tënë. * A-ekole so kue  ayeke mbeni kpengba ye so afa so Gbia ti e ayeke mû na adisciple ti lo aye kue so ala yeke na bezoin ni ti fa na tënë.2 Tim. 4:5.

Fango kode ti kua na aita-koli ti sara ambeni kua so ayeke nde

15. Aita-koli so ayeke mû li ni na yâ ti bungbi ti e aye ti mû peko ti Jésus na yâ ti ye wa?

15 Dabe ti mo na prophétie ti Ésaïe so atene Nzapa la ayeke fa ye na Jésus. Na “ekole” ti yayu so, Molenge ni amanda “lege ti sara tënë nzoni na zo so anze”. (És. 50:4). Jésus asara ye lani alingbi na fango ye so. Na ngoi so lo yeke lani na ndo ti sese, lo dë bê ti azo so “asara ngangu kua na kungba ane ala”. (Mat. 11:28-30). Aita-koli so ayeke mû li ni na yâ ti bungbi amû peko ti tapande ti Jésus so, ni la ala ye ti duti azo so ayeke dë bê ti aita ti ala ti koli na ti wali. Ndali ni, a sigigi na ekole nde nde ti mû maboko na aita-koli so alingbi ti sara kusala mingi ndali ti aita ti ala.

16, 17. A sigigi na Ekole ti Kusala ti Royaume ndali ti nyen? (Bâ nga kete tënë.)

16 Ekole ti kusala ti Royaume. Kozo klase ti ekole so ato nda ni na lango 9 ti mars ngu 1959, na South Lansing, New  York. A tisa lani asurveillant so ague na ndo nde nde nga na aserviteur ti congrégation ti sara ekole ti nze oko so. Na pekoni, a mû aplan ti aye so a fa na ekole ni, na Anglais, a kiri peko ni na ambeni yanga ti kodoro nde si ekole so akomanse ti fa lege ti sarango kua na aita-koli na ndo ti sese kue. *

Ita Lloyd Barry ayeke fa ye na Ekole ti Kusala ti Royaume na Japon, na ngu 1970

17 Annuaire 1962 des Témoins de Jéhovah, na Anglais, afa ndani so a sara ekole so: “Na yâ ti dunia so aye ti sarango ni ayeke mingi, a lingbi mbeni surveillant na yâ ti congrégation ti aTémoin ti Jéhovah aduti mbeni zo so ahinga ti leke yâ ti gigi ti lo nzoni si lo bâ lege ti azo kue na yâ ti congrégation nga lo sara nzoni na ala. Me na mbage, lo lingbi pëpe ti duti mbeni zo so ayeke zia sewa ti lo yamba ndali ti congrégation; a yeke nzoni apensé ti lo aduti nzoni. So pendere lege si azi na awakua ti congrégation na dunia kue ti bungbi ndo oko na Ekole ti Kusala ti Royaume ti wara akode so ayeke mû maboko na ala ande ti sara tâ gi ye so Bible atene a lingbi mbeni surveillant asara!”1 Tim. 3:1-7; Tite 1:5-9.

18. Tongana nyen la awakua ti Nzapa kue abâ nzoni na peko ti Ekole ti Kusala ti Royaume?

18 Awakua ti Nzapa kue awara nzoni na lege ti Ekole ti  Kusala ti Royaume. Tongana nyen? Tongana a-ancien nga na awakua ti mungo maboko asara ye alingbi na aye so ala manda na ekole so, ala yeke duti azo so adë bê ti aita ti ala, tongana Jésus. A yeke nzere na mo so mbeni ancien wala mbeni wakua ti mungo maboko atene na mo mbeni pendere tënë, adengi mê amä mo nga asara nzoni vizite na mo? (1 aThes. 5:11). Mara ti aita-koli tongaso ayeke sara biani nzoni na acongrégation ti ala!

19. Ambeni ekole wa Komite ti fango ye ayeke bâ lege ni? A leke a-ekole so ti sara nyen?

19 Ambeni ekole ni. Komite ti fango ye ti Bebungbi ayeke bâ ndo na ndo ti ambeni ekole so ayeke fa lege ti sarango kua na aita-koli so ayeke mû li ni na yâ ti bungbi ti e. A leke a-ekole so ti mû maboko na a-ancien ti acongrégation, asurveillant so ague na ndo nde nde nga na amembre ti Komite ti filiale ti sara gbâ ti akusala ti ala nzoni. Aye so aluti na ndo ti Bible, so a yeke fa na aita-koli so, ayeke sara si ala kpengba songo ti ala na Nzapa. Teti so ala yeke bata angasangbaga ti Jéhovah so lo bâ ala na nene ni mingi, ekole ni ayeke mû maboko na aita-koli ni so ti sara ye alingbi na awango ti Mbeti ti Nzapa na yâ ti akode so ala yeke sara na ye na mbage ti angasangbaga ni.1 Pi. 5:1-3.

Kozo klase ti Ekole ti mandango kode ti sarango kua so a sara na Malawi, na ngu 2007

20. Ngbanga ti nyen Jésus alingbi lani ti tene so “Jéhovah afa tënë” na e kue? Desizion ti mo ayeke ti sara nyen?

20 A yeke polele so Gbia so Nzapa asoro lo ayeke sara kue ti tene a fa lege ti sarango kua nzoni na adisciple ti lo. Afango ye so kue alondo na nduzu si aga: Jéhovah afa lege ti sarango kua na Molenge ti lo, nga Molenge ni afa ni na adisciple ti lo. Ni la, Jésus alingbi lani ti tene so e kue “Jéhovah afa tënë” na e (Jean 6:45; És. 54:13). Zia si e mû desizion ti bâ nzoni na peko ti kode ti kua so Gbia ti e ayeke fa ni na e. Nga, zia e dabe ti e na kota raison so a yeke fa na e lege ti sarango kua ti e: A yeke ti kpengba songo ti e na Nzapa si e lingbi ti sara kua ti e kue nzoni.

^ par. 5 E hinga tongana nyen so Babâ ni afa na Molenge ni lege ti fa ye? Bâ ye so: Angu mingi kozoni si a dü Jésus, Bible atene so lo yeke sara ande kusala na atapande (Ps. 78:2; Mat. 13:34, 35). A yeke polele so Jéhovah, so ayeke na gunda ti prophétie so, aleke kozoni awe ti tene Molenge ti lo ayeke fa ye na lege ti atapande, wala atoli.2 Tim. 3:16, 17.

^ par. 6 Ambeni nze na pekoni, Jésus “asoro ambeni nde bale-mbasambala na lo tokua ala use use” ti fa tënë. Lo fa nga na ala kode ti sarango kua ni.Luc 10:1-16.

^ par. 12 Ambeni élève ni asara Ekole ti Galaad ni ahon fani oko.

^ par. 13 Ti hinga ambeni tënë na ndo ti ye so amissionnaire so amanda ye na Galaad asara na ndo ti fango tënë na dunia kue, bâ chapitre 23 ti buku Les Témoins de Jéhovah, prédicateurs du Royaume de Dieu.

^ par. 14 A changé a-ekole use so na Ekole ti awafango nzoni tënë ti Royaume.

^ par. 16 Ti fadeso, a-ancien kue ayeke sara Ekole ti Kusala ti Royaume so ayeke ninga lango oko wala ahon ni nga so angu so akangbi popo ni ayeke nde nde. Ngbene ye na ngu 1984, awakua ti mungo maboko kue ayeke sara ekole so.

TI HINGA AMBENI TËNË

“Sara si lege so mo tambela dä aduti nzoni lege” tongaso si mo gue na li ni

Tongana nyen la mo lingbi ti zi aye so aye ti kanga lege na mo na ti si na aye so mo zia na gbele mo na lege ti yingo?

Mû maboko na amba ti mo ti sara kua na akode so ala yeke na ni

Tongana nyen la e lingbi ti mû maboko na aita-koli so ayeke amaseka nga na ala so awara batême fini fini ti sara kua na akode so ala yeke na ni?