Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Royaume ti Nzapa akomanse kua awe!

 CHAPITRE 11

Asarango ye ti ala aga nzoni: Ala ga nzoni-kue tongana ti Nzapa

Asarango ye ti ala aga nzoni: Ala ga nzoni-kue tongana ti Nzapa

KOTA TËNË TI CHAPITRE NI

Lege so Gbia ni afa na ye na azo ti lo ti kpe andia ti Nzapa

Tara ti bâ mo yeke lï na yanga-da ti kozo lacour ti kota temple ti Jéhovah ti yingo

1. Nyen la Ézéchiel abâ so asara si li ti e akpe kue?

KA TONGANA mara ti ye so asi lani na prophète Ézéchiel, so a sara angu mingi awe, asi na mo? Tara ti bâ ye so: Mo gue nduru na tere ti mbeni kota temple so tere ni aza zango, na mbeni ngangu ange ayeke kâ ti fa na mo pendere ndo ni so. Mo montê a-escalier mbasambala so ague na mo ti si na mbeni oko ti ayanga-da ota ni. Na ngoi so mo bâ ayanga-da ni, li ti mo akpe kue. Yongo ti ala na nduzu asi amètre 30, na mo bâ so asinziri ayeke na ayanga-da ni so. A sara apilier ni akpa apendere keke ti mburu.Ézéch. 40:1-4, 10, 14, 16, 22; 41:20.

2. (a) Prophétie ti temple ni so aduti fä ti nyen? (Bâ nga kete tënë.) (b) Nyen la e lingbi ti manda na ndo ti akota yanga-da ti temple ni?

2 A yeke prophétie ti temple ti yingo la. Ézéchiel afa anzene nzene tënë na ndo ti prophétie ni so na yâ ti chapitre 40 ti si na chapitre 48 ti buku ti lo. Temple ni so aduti fä ti aye so Jéhovah aleke ndali ti tâ vorongo. Aye ti tere ni oko na oko kue aye ti fa mbeni ye ndali ti vorongo ti e na alango ti nda ni so. * Ayanga-da ni so ayo na nduzu aye ti fa na e nyen? A ye ti fa na e so azo kue so alï na yâ ti tâ vorongo adoit ti sara ye alingbi na andia ti Nzapa. Même apilier so akpa keke ti mburu ni so nga kue aye ti sara tënë ti oko ye ni so, ndali ti so, ngoi na ngoi na yâ ti Bible, a yeke sara kua na akeke ti mburu ti sara na tënë ti ye so ayeke mbilimbili (Ps. 92:13). Ka ti asinziri ni? Aye ti fa polele so, azo so akpe encore andia ti Nzapa ni pëpe, a yeke ke na ala ti lï na yâ ti pendere ndo ni so, so ayeke gue na ala na yâ ti tâ vorongo.—Ézéch. 44:9.

3. Adisciple ti Christ abezoin ti tene a ngbâ lakue ti sukula ala ndali ti nyen?

3 Ye so Ézéchiel abâ so aga tâ tënë lani tongana nyen? Tongana ti so e bâ ni lani na Chapitre 2 ti buku so, Jéhovah asara kua lani na Christ ti sukula azo ti lo ti londo na ngu 1914 ti si na tongo nda ti ngu 1919. Kua ti sukulango azo ni angbâ gi kâ? Oko ape! Na yâ ti angu mingi so ahon, Christ aluti mingi na ndo ti nene ti batango ndia ti Jéhovah na ndo ti anzoni sarango ye. Ni la, lo bâ so adisciple ti lo abezoin ti tene a ngbâ lakue ti sukula ala. Ndali ti nyen? Ndali ti so, atâa so Christ abungbi adisciple ti lo ni lo zia ala nde na asarango ye ti sioni dunia so, Satan angbâ lakue ti gi ti kiri na ala na yâ ti sioni dunia ti lo ni. (Diko 2 Pierre 2:20-22.) Zia e bâ aye ota  so a sukula lani atâ Chrétien ndali ni. Kozoni, e yeke bâ ambeni changement ni so a sara, na pekoni e yeke bâ aye so a leke ti sara si congrégation angbâ nzoni. Nga na nda ni, e yeke bâ aye so a leke ti mû maboko na asewa.

Achangement so a sara na yâ ti angu mingi

4, 5. Mbeni kode wa la Satan ayeke sara na kua depuis? Na aye ti pekoni ayeke so wa?

4 Tënë ti nzoni sarango ye agbu ka bê ti awakua ti Jéhovah lakue. Ni la, ala wara lani afango lege polele na ndo ni. Zia e bâ ambeni tapande ni.

5 Lango-sioni. Jéhovah aleke ândö ti tene koli na wali so asara mariage awe la si alingbi ti bungbi koli na wali. Mawa ni ayeke so, pendere matabisi ni so alondo na Nzapa so, Satan aba yâ ni. Lo sara si azo asara kua na ni na lege ni pëpe nga lo mû ni ti handa na awakua ti Jéhovah, tongaso si songo ti ala na Nzapa abuba. Satan asara kua ândö na kode ni so na ngoi ti Balaam, na aye ti pekoni ayeke lani sioni mingi. Laso, lo sara kua na ni mingi ahon ti kozo.—Nom. 25:1-3, 9; Apoc. 2:14.

6. Tënë ti mungo yanga wa la a zia ni na yâ ti Tour ti Ba Ndo? Na a sara kusala na ni lani tongana nyen? (b) Nyen la asara si, a si na mbeni ngoi, a sara encore kua na tënë ti mungo yanga ni so ape? (Bâ nga kete tënë.)

6 Ti kanga lege na aye ti Satan ni so, a zia mbeni tënë ti mungo yanga na yâ ti Tour ti Ba Ndo ti lango 15 ti juin ngu 1908, na Anglais, so a tene: “Na ngoi kue nga na ndo kue, zo kue so ayeke koli wala wali ti mbi pëpe, mbi yeke sara ye na tere ti lo gi tongana ti so mbi yeke sara na lê ti azo kue.” * Atâa so a gbu azo lani na ngangu ape ti yeda na mungo yanga ni so, azo gbani ayeda ti sara ni nga ala yeda ti tene a zia iri ti ala na yâ ti Tour ti Ba Ndo ni. Ambeni ngu na pekoni, a ga ti bâ so, atâa so mungo yanga ni so amû maboko na azo mingi, ambeni zo ni amû ni aga gi mbeni senge ye, na ye ni so asara si a sara encore kua na ni ape. Me, ndia so andu nzoni sarango ye achangé ti lo ape.

7. Na ngu 1935, Tour ti Ba Ndo asara tënë na ndo ti kpale wa? Na tënë wa la Tour ti Ba Ndo ni atene polele?

7 Atara ti Satan ni akiri aga ngangu mingi. Tour ti Ba Ndo ti lango 1 ti mars ngu 1935, na Anglais, afa polele mbeni kpale so ayeke lani na popo ti awakua ti Nzapa. Ambeni zo ni apensé ti ala atene, so ala yeke mû mbage na kua ti fango tënë, ala peut ti doro andia ti Nzapa na hondengo ni senge, kpale ayeke dä ape. Ni la, Tour ti Ba Ndo ni atene polele, a tene: “A yeke nzoni zo oko oko kue ahinga so gi kua ti fango tënë oko la ayeke ye so a hunda na e ape. A-Témoin ti Jéhovah ayeke azo so ayeke sara kua na iri ti Jéhovah nga na Royaume ti lo, na ala yeke na kungba ti sara ye alingbi na iri ni so.” Na pekoni, article ni so amû wango polele na ndo ti mariage nga na bungbingo ti koli na wali, ti mû maboko na awakua ti Nzapa ti “kpe yongoro na lango-sioni.”—1 aCor. 6:18.

8. Tour ti Ba Ndo aluti lani mingi na ndo ti tâ nda ti tënë ti yanga ti Grec so andu tënë ti bungbingo ti koli na wali, so ayeke na lege ni pëpe, ngbanga ti nyen?

8 Na yâ ti ambeni ngu so ahon ade ti ninga ape, Tour ti Ba Ndo aluti mingi na ndo ti tâ nda ti tënë por·neiʹa, so aye ti sara tënë ti bungbingo ti koli na wali so ayeke na lege ni pëpe, so a sara kusala na ni na yâ ti Bible, na mbage so alondo na Matthieu ti si na Apocalypse. Tënë por·neiʹa ni aye ti sara gi tënë ti senge bungbingo ti koli na wali awe ape. Me, a ndu alege nde  nde kue ti bungbingo ti koli na wali so ayeke na lege ni ape, mbilimbili aye so a yeke sara na yâ ti ando so a yeke sara aye ti lango-sioni kirikiri dä. Ni la, a gi alege kue ti bata adisciple ti Christ yongoro na kota kpale ti tënë ti bungbingo ti koli na wali so amû yâ ti dunia ni kue laso.—Diko aÉphésien 4:17-19.

9, 10. (a) Mbeni ye wa la Tour ti Ba Ndo ti ngu 1935 asara tënë na ndo ni? (b) Bible atene nyen na ndo ti nyongo sämba?

9 Nyongo sämba ahon ndo ni. Tour ti Ba Ndo ti lango 1 ti mars ngu 1935, na Anglais, asara tënë ti mbeni ye, a tene: “A bâ so ambeni zo ayeke gue ka na fango tënë wala ala yeke sara ambeni kua ti yâ ti bungbi na [sämba] na lê ti ala. Ti Bible, na angoi wa la a yeke nzoni ti nyon vin? A yeke tâ na lege ni ti nyon sämba ti tene abuba kua so e yeke sara na yâ ti bungbi ti Seigneur?”

10 Na yâ ti kiringo tënë ni, a sara tënë mingi na ndo ti ye so mbeti ti Nzapa atene na ndo ti sämba. Bible ake nyongo vin nga na ambeni sämba ni nde pëpe, me gango ngbâa ni la lo ke (Ps. 104:14, 15; 1 aCor. 6:9, 10). Na ndo ti sarango ambeni kua ti bungbi na sämba na lê, a dabe ti azo ti Nzapa na ndo ti mbaï ti amolenge ti Aaron, so lani Nzapa afâ ala ndali ti so ala mû mbeni wâ so ayeke nde na ti so a fa na ala ti zia na ndo ti gbalaka ti Nzapa. Kete na pekoni, mbaï ni afa ye so peut-être ague lani na amolenge ni ti sara ye ni so, ndali ti so Nzapa ake lani na aprêtre kue ti nyon sämba na ngoi so ala ye ti sara akua so ayeke nzoni-kue (Lév. 10:1, 2, 8-11). Ti sara ye alingbi na ndia ni so laso, a yeke nzoni adisciple ti Christ akpe ti sara akua so ayeke nzoni-kue na sämba na lê ti ala.

11. So lani awakua ti Nzapa agbu nda ti tënë ti nyongo sämba ahon ndo ni so nzoni, a ga na anzoni ye wa?

11 Na yâ ti angu so ahon ade ti ninga ape, adisciple ti Christ akiri agbu nda ti tënë ti nyongo sämba lakue nga na gango ngbâa ni so nzoni mingi. Kobe ti yingo so a mû tâ na ngoi so alingbi amû maboko na azo mingi ti hon ndo ti tënë ti nyongo sämba ahon ndo ni, nga a sara si ala wara lege ti fa lege na fini ti ala nzoni. A mû maboko na mingi ti ambeni zo ni ti kpe akpale ni so biaku biaku. Zo oko na popo ti ala aye encore pëpe si nyongo sämba ahon ndo ni abi nengo ti lo nga na ti asewa ti lo na sese, na mbilimbili ti buba pëpe pasa so ala yeke na ni ti voro Jéhovah na sioni oko ape.

“E pensé pëpe so a yeke mä lani fungo ti manga na tere ti Seigneur wala lo zia mbeni sioni ye na yanga ti lo.”—C. T. Russell

12. Bango ndo wa la adisciple ti Christ akomanse lani ti wara na ndo ti manga même kozo ti tene alango ti nda ni akomanse?

12 Tënë ti manga. Adisciple ti Christ akomanse ti bâ manga tongana sioni ye même kozo ti tene alango ti nda ni akomanse. A sara angu mingi awe, ita Charles Capen adabe ti lo na kozo tingbingo tere ti lo na Charles Taze Russell na yâ ti angu so aga nduru na ngu 1900. Na ngoi ni so, Capen ayeke na ngu 13, na lo na aita ti lo ti koli ota ayeke na ndo ti escalier ti mbeni da (Maison de la Bible), so ayeke na Allegheny, na Pennsylvanie. Tongana Russell aga ahon na tere ti ala, lo hunda ala, lo tene: “Ala la ayeke nyon manga so? Mbi yeke mä fungo ti manga.” Ala tene na lo so ala nyon manga ape. Kite ayeke dä pëpe so ala hinga lani pensé ti Ita Russell na ndo ti tënë so. Na yâ ti Tour ti Ba Ndo ti lango 1 ti août ngu 1895, na Anglais, Ita Russell  asara tënë na ndo ti 2 aCorinthien 7:1, lo tene: “Tongana mbeni Chrétien anyon manga, mbi hinga ape wala eskê a yeke mû gloire na Nzapa, wala a yeke sara nzoni na zo ni?.. . . E pensé pëpe so a yeke mä lani fungo ti manga na tere ti Seigneur wala lo zia mbeni sioni ye na yanga ti lo.”

13. Mbeni kota changement wa la asi na ngu 1973?

13 Na ngu 1935, Tour ti Ba Ndo airi manga atene “sioni kugbe”, nga a tene so zo kue so angbâ ti te kugbe ti manga wala ti nyon ni alingbi ti ngbâ na Béthel ape, ti ngbâ pionnier wala surveillant ape. Na ngu 1973, mbeni kota changement aga. Tour ti Ba Ndo ti lango 1 ti septembre, na Français, atene so Témoin ti Jéhovah so angbâ ti sara mbeni ye so alingbi ti fâ lo, ti buba tere ti lo wala ti sara sioni na zo, alingbi pëpe ti duti nzoni zo na yâ ti congrégation. Azo kue so ake ti zia lege ti manga, a yeke bi ala na gigi ti bungbi. * Ge, Christ akiri asara mbeni kota changement, lo kiri lo sukula adisciple ti lo.

14. Ndia ti Nzapa na ndo ti tënë ti mênë ayeke so wa? (b) A sara tongana nyen la si tënë ti ziango mênë na tere ti azo amû ndo kue?

14 Sioni sarango kusala na mênë. Lani na ngoi ti Noé, Nzapa atene so tengo mênë ayeke sioni. Lo kiri lo tene mara ti tënë ni so na yâ ti ndia so lo mû na Israël, nga na ngoi ti aChrétien lo tene na ala ti “gbanzi tere ti ala . . . na mênë”. (Kus. 15:20, 29; Gen. 9:4; Lév. 7:26). Me na ngoi ti e so, Satan awara mbeni lege ti pusu azo mingi ti ke ndia ti Nzapa so. Na yâ ti angu so aga nduru na ngu 1900, awanganga asigigi na kode ti ziango mênë na tere ti azo, nga na ngoi so a hinga mara ti agroupe ti mênë nde nde, kode ni so amû ndo mingi. A si na ngu 1937, a komanse ti mû amênë ti azo ti bata ni na yâ ti mbeni ndo ti batango amênë ni. Use Bira so Amû Sese Kue la asara si tënë ti ziango mênë na tere ti azo akiri ague na li ni mingi. Hio, kode ti ziango mênë na tere ti azo amû ndo kue.

15, 16. (a) A-Témoin ti Jéhovah abâ ziango mênë na tere ti azo tongana nyen? (b) Ambeni ye wa la a sigigi na ni ti mû maboko na adisciple ti Christ na ndo ti tënë ti mungo mênë nga na sioni sarango kusala na mênë? (c) Aye ti pekoni ayeke so wa?

15 Na tongo nda ti ngu 1944, Tour ti Ba Ndo atene so ziango mênë na tere ti zo ayeke mbeni lege ti tengo mênë la. Na ngu so aga na pekoni, a kiri a luti mingi na ndo ti tënë ni so nga a vuru lê ti tënë ni nzoni. A ga ti si na ngu 1951, a sigigi na mbeni molongo ti ahundango tënë nga na ambeni kiringo tënë ti mû maboko na awakua ti Nzapa ti luti na gbele awanganga. Na ndo ti dunia mobimba, adisciple ti Christ agbu ngangu na gbele hengo ndo, sarango ngangu nga na kangango lege. Me, Christ angbâ lakue ti gi ti sigigi na agbakuru so bungbi ti lo ayeke na bezoin ni. A sigigi na abrochure nga na a-article so na yâ ni mo yeke wara anzene nzene tënë dä nga so a gi ndani nzoni.

16 Na ngu 1979, ambeni ancien akomanse ti gue na ahôpital ti tene ala mû maboko na awanganga ni si ala hinga ndani so aTémoin ti Jéhovah ake mênë, ti fa na ala aversê so andu ni nga ti sara tënë na ndo ti ambeni yorö so a lingbi ti mû ni na place ti mênë. Na ngu 1980, a fa na a-ancien ti agbata 39 na États-Unis tongana nyen ti sara kua ni so. Tongana angu ayeke hon, Bebungbi ayeda ti tene a zia na sese mbeni Komite so  abâ lege ti songo na ada-nganga na ndo ti dunia mobimba. Anzoni ye aga na pekoni? Laso, awanganga ngbangbo mingi, so na popo ni e yeke wara adocteur nga na azo ti sarango opération, ayeke sara kua maboko na maboko na aTémoin so tere ti ala ason. Ala yeke bâ na nene ni desizion so aTémoin ni amû ti tene a kaï kobela ti ala sân mênë. Ahôpital gbani gbani ayeke kaï kobela ti azo sân mênë, na même ambeni abâ so kode ni so ayeke pendere ahon atanga ni kue. Ti gbu li na ndo ti alege nde nde so Jésus ayeke bata na azo ti lo si Satan asara sioni na ala ape, a yeke pendere mingi.—Diko aÉphésien 5:25-27.

Ahôpital gbani gbani ayeke kaï kobela ti azo sân mênë, na même ambeni abâ so kode ni so ayeke pendere ahon atanga ni kue

17. Tongana nyen la e lingbi ti fa so e bâ na nene ni kode so Christ ayeke sukula na adisciple ti lo?

17 A yeke nzoni e hunda tere ti e wani, e tene, ‘So Christ ayeke sukula e adisciple ti lo ti tene e bata andia ti Jéhovah so, eskê mbi yeke bâ ni na nene ni? Tongana a yeke tongaso, zia e bata na li ti e so Satan ayeke gi lakue ti buba bango ndo ti e na ndo ti nzoni sarango ye tongaso si e hon yongoro na Jéhovah nga na Jésus. Ti mû lege na e ti hon ndo ti atara ti Satan ni, bungbi ti Jéhovah ayeke gboto mê ti e lakue nga ayeke dabe ti e na ndo ti asioni sarango ye so amû yâ ti dunia so laso. Zia e dengi mê na agbotongo mê ni nzoni nga e sara ye alingbi na awango ni so.—aProv. 19:20.

 Ye so a sara ti bata na congrégation si asioni sarango ye abuba ni ape

18. Prophétie ti Ézéchiel afa so a yeke sara nyen na azo so adoro andia ti Nzapa na mbana?

18 Use ye so a yeke sara ti sukula awakua ti Nzapa na ndo ti tënë ti anzoni sarango ye, a yeke ti tene a sara ambeni ye ti bata congrégation na saleté pëpe. Mawa ni ayeke so, ambeni zo so ayeda na andia ti Jéhovah na ndo ti anzoni sarango ye nga so amû tere ti ala na lo angbâ be-ta-zo pëpe. Bê ti ambeni achangé, nga na mbana, ala doro andia ni so. A lingbi a sara nyen na azo tongaso? Ye so Ézéchiel abâ na ndo ti temple ti yingo, so e sara tënë ni na tongo nda ti chapitre so, a yeke fa na e mbeni ye. Ayanga-da ni ayo na nduzu. A zia asinziri na ayanga-da ni oko na oko kue. A zia ala ti bata temple ni tongaso si zo so “a fâ bê ti lo na ganza pëpe”, so ti tene bê ti lo avuru ape, alingbi ti lï na yâ ti temple ni pëpe (Ézéch. 44:9). Ye so adabe ti e so azo so ayeke lani na pasa ti lï na yâ ti tâ vorongo ayeke gi ala so ayeke sara kue ti sara ye alingbi na andia ti Jéhovah na ndo ti anzoni sarango ye. Laso nga kue, a yeke azo kirikiri la ayeke na pasa ti bungbi na amba ti ala aChrétien na yâ ti tâ vorongo pëpe.

19, 20. (a) Tongana nyen la, yeke na yeke, Christ amû maboko na adisciple ti lo ti leke yâ ti akode ti bâ na tënë ti azo so asara siokpari? (b) Araison ota, so ndali ni a yeke bi na gigi ti bungbi mbeni zo so ake ti changé bê ti lo, ayeke so wa?

19 Na ngu 1892, Tour ti Ba Ndo atene so “kungba ti e (aChrétien) ayeke ti bi na gigi ti bungbi azo kue, so ake ti yeda na lê ti azo wala na lê ti azo pëpe, so Christ afuta ngere [so alingbi] ndali ti azo kue.” (Diko 2 Jean 10.) Na ngu 1904, na yâ ti buku La Nouvelle Création a tene so azo so angbâ na asioni sarango ye ayeke duti tâ kota kpale ndali ti congrégation. Na ngoi ni kâ, azo ti yâ ti congrégation ni kue la ayeke bungbi ti bâ lege ti angangu tënë. Me, mara ti aye ni so asi lani mingi ape. Na ngu 1944, Tour ti Ba Ndo afa so a yeke gi aita-koli so ayeke na kungba na yâ ti congrégation la adoit ti bâ lege ti mara ti atënë tongaso. A ga ti si na ngu 1952, a zia na yâ ti Tour ti Ba Ndo ambeni ye so Bible afa ti leke na tënë ti mbeni siokpari so mbeni zo asara. A luti mingi na ndo ti tâ raison so ndali ni a yeke bi na gigi mbeni zo so achangé bê ti lo pëpe, raison ni ayeke ti bata congrégation si aduti na saleté pëpe.

20 Na yâ ti angu so aga na pekoni, Christ amû maboko na adisciple ti lo ti bâ yâ ti akode ti lekengo akota tënë so andu mbeni sioni sarango ye. A fa na a-ancien akode so amû maboko na ala ti bâ lege ti atënë tongaso ti lingbi na bango ndo ti Jéhovah, so ti tene ti fâ ngbanga ni mbilimbili nga ti hinga ti bâ mawa ti azo. Laso e bâ polele araison ota tongaso, so ndali ni a yeke bi na gigi ti bungbi, mbeni zo so ake ti changé bê ti lo: (1) a yeke ti sara si iri ti Jéhovah abuba pëpe, (2) ti bata congrégation si kota siokpari ni so abuba ni ape nga (3) ti gue na zo ni so asara sioni ye ni so ti changé bê ti lo, tongana lege ayeke dä.

21. Na lege wa la ye so a leke ti bi mbeni zo na gigi ti bungbi ayeke ga na nzoni ye na awakua ti Nzapa?

21 Mo bâ tongana nyen la ye so a leke ti bi mbeni zo na gigi ti bungbi ayeke ga na nzoni ye na adisciple ti Christ laso? Na  Israël ti ândö, mingi ni azo ti sioni ayeke asioni tapande ndali ti azo ni, na wungo ti ala ahon même ti azo so aye Jéhovah nga so ayeke sara lani aye so ayeke na lege ni. Ye so asara si mara ni abuba iri ti Jéhovah, na lo ke ala (Jér. 7:23-28). Me laso, Jéhovah ayeke bâ ndo na ndo ti mbeni bungbi ti azo so alondo na yâ ti amara nde nde si ayeke voro lo. Tongana a zi na popo ti e azo so angbâ na yâ ti asioni sarango ye ti ala, a yeke zia lege pëpe na ala ti ga aye ti bira so Satan ayeke sara na kua ti buba na yâ ti congrégation. Me, a yeke sara kue si ala ga na kpale mingi pëpe na ndo ti congrégation. Tongaso, e atanga ti aTémoin ti Jéhovah ni, e yeke nzere na lê ti Jéhovah. E girisa pëpe so Jéhovah amû lani zendo, atene: “Ye ti bira so azo asara ti ke mo na ni alingbi sara ye na mo pëpe.” (És. 54:17). Eskê e yeke ngbâ ande lakue ti mû maboko na a-ancien, so ayeke na kota kua ti bâ tënë ti aita so asara siokpari?

Aye so a sara ti gonda na lo so na lege ti lo asewa kue awara iri ti ala

22, 23. Ngbanga ti nyen la a lingbi e kiri singila na aita ti e so ayeke lani na yâ ti angu so aga na peko ti ngu 1900? Me ngbanga ti nyen la a hunda ti tene ala leke lani bango ndo ti ala na ndo ti tënë ti sewa?

22 Ota ye so a yeke sara ti ngbâ ti sukula adisciple ti Christ andu tënë ti mariage nga na sewa. Bango ndo ti e na ndo ti tënë ti sewa achangé na yâ ti ambeni ngu so ahon? En, a changé. Na tapande, tongana e diko aye na ndo ti awakua ti Nzapa ti yâ ti angu so aga na peko ti ngu 1900, li ti e ayeke kpe ti bâ so ala sara asacrifice mingi. Singila mingi ndali ti aye kue so ala sara ti zia akusala so ayeke nzoni-kue na kozo ndo na yâ ti fini ti ala. Me, e lingbi ti bâ nga so a hunda lani na ala ti leke bango ndo ti ala. Tongana nyen?

23 Lani, a si fani mingi so aita-koli ayeke sara kua ti fango tënë wala ti surveillant yongoro na sewa ti ala teti anze mingi. Na ndo ni, a yeke wa azo mingi ape ti sara mariage atâa so Bible asara ti lo tongaso ape, nga a yeke mû awango gi kete na ndo ti ye so akoli na awali alingbi ti sara ti kpengba songo ti ala. Oko ye ni so ayeke si nga na adisciple ti Christ laso? Ên-ën, laso a yeke tongaso ape.

Akua ti bungbi ayeke kota ahon kua ti bango lege ti sewa pëpe

24. Tongana nyen la Christ amû maboko na awakua ti Nzapa ti duti na nzoni bango ndo na ndo ti mariage nga na sewa?

24 Laso, akua ti bungbi ayeke kota ahon kua ti bango lege ti sewa pëpe. (Diko 1 Timothée 5:8.) Na ndo ni, Christ asara kue ti tene adisciple ti lo, na ndo ti sese ge, awara awango ti Bible so alingbi ti mû maboko na ala na ndo ti tënë ti mariage nga na ndo ti sewa (aÉph. 3:14, 15). Na ngu 1978, a sigigi na buku A sala gne ti ouara nguia na yâ famille? na Anglais. Angu 18 na pekoni, a sigigi na buku Lingu ti Tâ Ngia ti Sewa. Na ndo ti aso ni so kue, Tour ti Ba Ndo asigigi na gbâ ti a-article so alingbi ti mû maboko na akoli na awali so asara mariage awe ti sara ye alingbi na andia ti Bible na popo ti ala.

25-27. Na lege wa la bungbi ti Jéhovah afa so lo yeke bibe ti lo na ndo ti amolenge so ngu ti ala ayeke nde nde?

25 Ka ti amaseka? Na yâ ti angu mingi, a sigigi na aye mingi ti mû maboko na ala. Bungbi ti Jéhovah asigigi na gbâ ti anzoni ye ndali ti amolenge so ngu ti ala ayeke nde nde. Na tapande,  na ngu 1919 ti si na ngu 1921, na yâ ti L’Âge d’Or a sigigi na mbeni article so iri ni ayeke “Étude de la Bible pour les jeunes.” Na pekoni, na ngu 1920, a sigigi na brochure L’ABC de l’Âge d’Or, na Anglais, nga na ngu 1941, a sigigi na buku Enfants, na Anglais. Na yâ ti angu 1970, a sigigi na ambeni buku, na Anglais. A yeke abuku tongana Mango Yanga ti Kota Maître, La ti pendere ti mo—ouarango ye ti nzoni aho da nga na Mbeti ti ambaï ti yâ ti Bible. Na ngu 1982, a sigigi na ambeni molongo ti a-article so iri ni ayeke “Les jeunes s’interrogent” na yâ ti Réveillez-vous ! Na pekoni, na ngu 1989, a sigigi na buku Les jeunes s’interrogent — Réponses pratiques.

Ala yeke lani na ngia ti wara brochure Mbi manda Bible, na ngoi ti kota bungbi so na Allemagne

26 Laso, e yeke na buku Les jeunes s’interrogent avolume use kue, nga a ngbâ ti zia ambeni article ni na ndo ti site ti e jw.org. E yeke nga na buku Mä Kota Wafango ye. Na ndo ti site ti e, e yeke wara aye mingi so andu amaseka, acarte so asara tënë na ndo ti ambeni zo ti yâ ti Bible, aye ti mandango na Bible ndali ti akota zo nga na amolenge, ajeux, avidéo nga na abande dessinée so aluti na ndo ti Bible nga na aye ti mandango ni na amolenge  ti ngu ota ti kiri na ni na gbe ni. Lani na ngoi so Christ ayeke na sese ge, lo mû amolenge na yâ ti maboko ti lo, na aye so e yeke bâ laso afa na e so bango ndo ti Jésus na ndo ti amolenge achangé ape (Marc 10:13-16). Lo ye si amaseka so ayeke na popo ti e abâ tere ti ala so a ye ala nga so a yeke bâ lege ti ala nzoni na lege ti yingo.

27 Jésus aye nga si a bata amolenge si sioni awara ala ape. Teti so sarango ye ti azo ti dunia so ayeke buba gi bubango, tënë ti langongo na amolenge amû ndo kue. Ni la, bungbi ti Jéhovah asigigi na agbakuru, so akpengba pëpe, ti mû maboko na ababâ na amama ti bâ lege ti amolenge ti ala si mara ti sioni sarango ye ni so andu amolenge ni ape. *

28. (a) Tongana ti so prophétie ti temple ti Ézéchiel afa, nyen la a ku na mbage ti e tongana e ye ti voro tâ Nzapa? (b) Nyen la mo leke na bê ti mo ti ngbâ ti sara?

28 E londo ti bâ tongana nyen la Christ angbâ lakue ti sukula adisciple ti lo, lo yeke fa na ala ti sara ye alingbi na andia ti Jéhovah nga so lo yeke fa na ala ye so ala lingbi ti sara ti wara nzoni na lege ti andia ni so. Ye so apika bê mingi. Gbu li ti mo encore na ndo ti temple so Ézéchiel abâ ni. Dabe ti mo na ayanga-da ni so ayo na nduzu. Temple ni so aye pëpe ti sara tënë ti tâ ndo tongaso, me a yeke na lege ti yingo. Me, eskê e yeke bâ ni tongana tâ ye na lê ti e? E yeke lï na yâ ni pëpe gi na guengo na abungbi na Da ti Royaume, na dikongo Bible wala na fango tënë. Akua ni so ayeke aye so lê ti azo ayeke bâ. Mbeni zo ti handango lê ti azo alingbi ti sara aye ni so kue sân ti lï na yâ ti temple ti Jéhovah ni. Me, tongana e sara aye ni so nga na oko ngoi ni, e sara ye alingbi na andia so Jéhovah amû na ndo ti anzoni sarango ye, andâ e lï awe na yâ ti temple ni so, so ti tene aye kue so Jéhovah Nzapa aleke ndali ti vorongo lo, na e yeke sara kua dä. Zia e ngbâ lakue ti bâ kota pasa ni so na nene ni. Nga, zia e ngbâ lakue ti sara ngangu ti bata andia ti Jéhovah, so ayeke mbilimbili, tongaso si e fa dutingo nzoni-kue ti lo.

^ par. 2 Na ngu 1932, volume 2 ti buku Justification (1936 na Français) afa kozoni kue so aprophétie ti Bible so andu kiringo ti azo ti Nzapa na kodoro ti ala aga tâ tënë, na ngoi ti nda ni so, na ndo ti Israël ti yingo, me pëpe na ndo ti Israël ti mitele. Aprophétie ni so andu kiringo ti zia tâ vorongo na sese. Tour ti Ba Ndo ti lango 1 ti mars ngu 1999 afa so tënë ti temple so Ézéchiel abâ ni na yâ ti bango li ti lo so andu mara ti prophétie ni so, na kota mbage ni aga tâ tënë na yâ ti alango ti nda ni so.

^ par. 6 Na yâ ti mungo yanga ni so, a ke na mbeni koli nga na mbeni wali, so ade ti sara mariage ape wala so ala yeke afami ape, ti duti gi ala use na yâ ti mbeni chambre. Ala lingbi ti duti na yâ ti chambre ni gi tongana ala zi yanga-da ni kota. Na ngoi ni kâ, a yeke diko peko ti tënë ti mungo yanga ni so na li, lango oko oko, na ngoi ti kapa ti vorongo Nzapa na ndapre na Béthel.

^ par. 13 Tënë ti manga ni ge andu nyongo ni, tengo kugbe ni wala fango yaka ti manga ni.

^ par. 27 Na tapande, bâ chapitre 32 ti Mä Kota Wafango ye nga na lembeti 3-11 ti Réveillez-vous ! ti octobre ngu 2007.

TI HINGA AMBENI TËNË

Ngbanga ti nyen a lingbi e ga nzoni-kue?

Asi na mo awe ti mä yâ ti atënë so ayeke na yâ ti mbeti ti Lévitique ape nga nzara ti dikongo ni asigigi na yâ ti mo? Akota tënë so ayeke na yâ ti mbeti ti Lévitique a lingbi ti mû maboko na mo ti voro Nzapa na lege so ayeke nzoni-kue.