Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Nzoni tënë so alondo na Nzapa!

 Ye ti manda 2

Tâ Nzapa ayeke zo wa?

Tâ Nzapa ayeke zo wa?

1. Ngbanga ti nyen a lingbi e voro Nzapa?

Tâ Nzapa ayeke lo so asara aye kue. Lo yeke na tongo nda ni pëpe nga lo yeke na kongo nda ni pëpe (Psaume 90:2). Nzoni tënë so ayeke na yâ ti Bible alondo na lo (1 Timothée 1:11). Teti so lo la lo sara si e yeke na fini, a lingbi e voro gi lo oko.Diko Apocalypse 4:11.

2. Nzapa ayeke tongana nyen?

Mbeni zo ade ti bâ Nzapa pëpe ndali ti so lo yeke Yingo, so ti tene lo yeke na mbeni fini so ayeke kota mingi ahon acréature so ayeke na ndo ti sese (Jean 1:18; 4:24). Atâa so kue, e lingbi ti hinga asarango ye ti tere ti Nzapa na lege ti aye so lo sara. Na tapande, alê ti keke na afleur so ayeke nde nde afa na e ndoye nga na ndara ti Nzapa. Kota ti dunia afa na e ngangu ti lo.Diko aRomain 1:20.

E lingbi même ti hinga ye mingi na ndo ti asarango ye ti tere ti Nzapa na dikongo Bible. Na tapande, Bible afa na e aye so Nzapa aye nga aye so lo ke, lege so lo yeke sara ye na azo nga tongana nyen lo yeke sara ye na yâ ti aye nde nde so asi.Diko Psaume 103:7-10.

3. Nzapa ayeke na iri?

Jésus atene: “Babâ ti e so mo yeke na yayu, zia a sara si iri ti mo aga nzoni-kue.” (Matthieu 6:9). Atâa so azo airi Nzapa na airi mingi, lo yeke gi na iri oko. A yeke di iri ti lo na alege nde nde na yâ ti ayanga ti kodoro oko oko kue. Na Sango, mingi ni a yeke di ni “Jéhovah.” Me ambeni zo adi ni “Yahve.”Diko Ésaïe 42:8, Tene ti Nzapa, Kozo Mbouki.

Na yâ ti aBible mingi a zi iri ti Nzapa na a zia na place ni Seigneur wala Nzapa. Me na ngoi so a sû Bible giriri, a yeke wara iri ti Nzapa na yâ ni nduru na 7000. Jésus asara si  azo ahinga iri ti Nzapa na ngoi so lo yeke fa lani ye na ala na ndo ti Nzapa. Diko Jean 17:26.

Tongana babâ so aye amolenge ti lo, Nzapa ayeke bi bê ti lo na apasi ti e

4. Jéhovah ayeke pensé nga na e la?

So azo mingi ayeke bâ pasi afa so Jéhovah ayeke Nzapa so ayeke pensé na e pëpe? Ambeni zo atene so Nzapa la ayeke tara e na lege ti apasi, me tënë so ayeke tâ tënë pëpe.Diko Jacques 1:13.

Nzapa ane e azo na lege so lo mû lege na e ti soro ye e wani. A nzere na e mingi ti mû liberté so e yeke na ni ti sara na Nzapa (Josué 24:15). Me pasi ayeke mingi ngbanga ti so azo mingi asoro ti sara ye ti sioni na amba ti ala. Bê ti Jéhovah ason ti bâ aye ti kirikiri tongaso.Diko Genèse 6:5, 6.

Jéhovah ayeke Nzapa so ayeke pensé na e. Lo ye si e duti nzoni na yâ ti fini ti e. Na yâ ti kete ngoi, lo yeke zi apasi nga na azo so ayeke na gunda ni. Me ti ku na ngoi ni so, lo hinga ngbanga ti nyen lo zia lege na pasi. Na yâ ti ye ti manda 8, e yeke bâ ande ndani so lo zia lege na pasi.Diko 2 Pierre 2:9; 3:7, 13.

5. Tongana nyen e lingbi ti ga nduru mingi na Nzapa?

Jéhovah ahunda na e ti ga nduru na lo na lege ti sambela. Lo yeke pensé na e oko oko kue (Psaume 65:3; 145:18). Lo yeke nduru ti pardone e. Lo yeke bâ angangu so e yeke sara ti zia ngia na bê ti lo, atâa so na ambeni ngoi e yeke tï. Tongaso, atâa so e yeke sara siokpari, e lingbi biani ti duti na nzoni songo na Nzapa.Diko Psaume 103:12-14; Jacques 4:8.

Teti so Jéhovah amû na e fini, a yeke nzoni e ye lo ahon tanga ti azo kue (Marc 12:30). Na ngoi so mo yeke fa ndoye ti mo na mbage ti Nzapa na mandango ye mingi na ndo ti lo nga na sarango ye so lo hunda na mo, mo yeke ga nduru mingi na lo.Diko 1 Timothée 2:4; 1 Jean 5:3.

TI HINGA AMBENI TËNË

Nzapa ayeke na iri?

Nzapa ayeke na atitre mingi so na popo ni, Lo ti Ngangu Ahon Kue, Lo so aleke aye kue, nga na Seigneur. Me a sara kua na tâ iri ti Nzapa ahon fani 7 000 na yâ ti Bible.