Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Nzoni tënë so alondo na Nzapa!

 Ye ti manda 10

Mo lingbi ti hinga tâ bungbi ti vorongo Nzapa tongana nyen?

Mo lingbi ti hinga tâ bungbi ti vorongo Nzapa tongana nyen?

“Ala sara hange na aprophète ti wataka.”MATTHIEU 7:15.

“Ala tene na lê ti azo atene ala hinga Nzapa, andâ na lege ti sarango ye ti ala, ala bere tënë ti lo awe.”TITE 1:16.

1. Tâ bungbi ti vorongo Nzapa ayeke gi oko?

Jésus afa lani na adisciple ti lo so tâ bungbi ti vorongo Nzapa ayeke gi oko. A yeke tongana mbeni lege so ague na zo na fini ti lakue lakue. Jésus atene: “Azo mingi pëpe si ayeke wara ni.” (Matthieu 7:14). Nzapa ayeda gi na bungbi so asara ye so Bible afa. Ye so atâ wavorongo Nzapa kue amä na bê na ni ayeke gi oko.Diko Jean 4:23, 24; 14:6; aÉphésien 4:4, 5.

2. Jésus atene nyen na ndo ti aChrétien ti wataka?

Jésus atene kozoni awe so aprophète ti wataka ayeke buba yâ ti vorongo Nzapa ti aChrétien. Na bango ni, ala kpa atâ wavorongo Nzapa. Ala tene so ala yeke aChrétien. Me mo yeke hinga ala gi na lege ti asarango ye ti ala. Na lege wa? Gi na yâ ti tâ bungbi ti vorongo Nzapa la ayeke wara atâ Chrétien so ayeke na anzoni lengo na anzoni sarango ye.Diko Matthieu 7:13-23.

3. Mo yeke hinga atâ Chrétien tongana nyen?

Bâ aye oku so a yeke hinga na ala:

  • Atâ Chrétien abâ Bible tongana Mbeti ti Nzapa. Ala yeke sara ngangu ti sara ye alingbi na awango ti yâ ni. Tongaso, tâ bungbi ti vorongo Nzapa ayeke nde na ati so aluti na ndo ti bibe ti azo (Matthieu 15:7-9). Atâ Chrétien ayeke sara ye alingbi na ye so ala fa.Diko Jean 17:17; 2 Timothée 3:16, 17.

  •   Atâ disciple ti Jésus ane iri ti Nzapa, Jéhovah. Jésus ane iri ti Nzapa, lo sara si azo ahinga ni. Lo mû maboko na azo ti hinga Nzapa na lo fa na ala ti sambela si iri ti Nzapa aga nzoni-kue (Matthieu 6:9). Na ndo so mo yeke dä so, bungbi ti vorongo Nzapa wa la ayeke fa iri ti Nzapa na azo?Diko Jean 17:26; aRomain 10:13, 14.

  • Atâ Chrétien ayeke fa tënë ti Royaume ti Nzapa. Nzapa atokua lani Jésus ti fa nzoni tënë ti Royaume. Royaume ti Nzapa ayeke gi oko ye so azo alingbi ti zia beku ti ala na ndo ni. Jésus asara tënë na ndo ni juska lo kui (Luc 4:43; 8:1; 23:42, 43). Lo tene so fade adisciple ti lo ayeke fa tënë ni. Tongana mbeni zo aga na mbage ti mo ti fa tënë ti Royaume ti Nzapa na mo, zo so ayeke na yâ ti bungbi ti vorongo Nzapa wa?Diko Matthieu 24:14.

  • Atâ disciple ti Jésus ayeke ti sioni dunia so pëpe. Mo yeke hinga ala na lege so ala yeke yôro tere ti ala pëpe na yâ ti poroso wala na yâ ti atënë ti kangbi so ayeke na popo ti azo (Jean 17:16; 18:36). Nga, ala yeke mû pëpe peko ti asioni sarango ye nga na abango ndo ti dunia so.Diko Jacques 4:4.

  • Atâ Chrétien ayeke na tâ ndoye na popo ti ala. Bible afa na ala ti ne azo ti amara kue. Atâa so abungbi ti vorongo nzapa ti wataka ayeke mû maboko ngangu na azo ti sara bira, atâ Chrétien ayeke sara ti ala tongaso pëpe (Michée 4:1-3). Ahon ti pensé gi na ala wani, ala yeke mû ngoi ti ala na aye ti ala ti mû maboko nga ti kpengba azo.Diko Jean 13:34, 35; 1 Jean 4:20.

4. Mo lingbi ti hinga tâ bungbi ti vorongo Nzapa?

Ti mo, bungbi ti vorongo Nzapa wa la afango ye ti lo kue aluti na ndo ti Bible? ane iri ti Nzapa? nga ayeke fa tënë ti Royaume ti Nzapa so ayeke gi oko ye so azo alingbi ti zia beku ti ala na ndo ni? Azo wa la ayeke fa ndoye na popo ti ala nga ake tënë ti bira?Diko 1 Jean 3:10-12.

TI HINGA AMBENI TËNË