Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Nzoni tënë so alondo na Nzapa!

 Ye ti manda 9

Sewa ti mo alingbi ti duti na ngia tongana nyen?

Sewa ti mo alingbi ti duti na ngia tongana nyen?

1. Ti tene sewa aduti na ngia, ngbanga ti nyen a hunda ti sara mariage si?

Nzoni tënë alondo na Jéhovah, Nzapa so ayeke na ngia, lo so aye si asewa aduti na ngia (1 Timothée 1:11). Lo la lo yeke na gunda ti mariage. Ti tene koli na wali asara mariage ayeke kota ye ndali ti nzoni ti sewa ni. Ye so asara si amolenge so ala yeke dü ayeke duti nzoni.

Bango ndo ti Nzapa na ndo ti mariage ayeke so wa? Lo ye si koli na wali amû tere na lê ti ndia nga ala ninga na yâ ti mariage ti ala (Luc 2:1, 4, 5). Lo ye si ala duti be-ta-zo na mba (aHébreu 13:4). Lo ke tënë ti divorce (Malachie 2:16). Me, lo yeda ti tene aChrétien asara divorce na akiri asara mbeni mariage gi tongana mbeni na popo ti ala agi mbeni wali nde wala koli nde.Diko Matthieu 19:3-6, 9.

2. A yeke nzoni koli na wali asara ye na mba tongana nyen?

Jéhovah aleke koli na wali ti mû maboko na mba (Genèse 2:18). Teti so na yâ ti sewa koli la ayeke mokonzi, a lingbi lo mû aye ti mitele na sewa ti lo ni nga lo fa tënë ti Nzapa na ala. A lingbi lo ye wali ti lo na bê ti lo oko. A lingbi koli na wali aye tere na ala ne mba. Teti so ala use kue ayeke na siokpari na tere ti ala, a lingbi ala manda ti pardone mba si ala duti na ngia na yâ ti mariage ti ala.Diko aÉphésien 4:31, 32; 5:22-25, 33; 1 Pierre 3:7.

3. Tongana ala yeke na ngia pëpe, a yeke nzoni ti ke tere?

Tongana mango tere ayeke na popo ti ala pëpe, ala sara kue ti sara ye na mba na ndoye (1 aCorinthien 13:4, 5).  Mbeti ti Nzapa atene pëpe so kangbingo tere la ayeke leke akpale so ayeke si ka na yâ ti mariage.Diko 1 aCorinthien 7:10-13.

4. Amolenge, Nzapa aye si ala duti tongana nyen?

Jéhovah aye si ala duti na ngia. A yeke na mbage ti lo si ala lingbi ti wara tâ nzoni wango ti duti na ngia na lâ ti maseka ti ala. Lo ye si ala manda ye na lege ti ndara so ababâ na amama ti ala ayeke na ni (aColossien 3:20). Jéhovah aye nga si ala wara ngia ti sara na lo, lo so lo yeke Wasarango ala, nga ti sara na Molenge ti lo.Diko Zo-ti-fa-tene 12:1-3; Matthieu 19:13-15; 21:15, 16.

5. Ala lingbi ti sara nyen ti tene amolenge ti ala aduti na ngia?

Ababâ na amama, a lingbi ala sara kua ngangu ti mû kobe na bongo na amolenge ti ala, nga ti mû na ala ndo ti lango (1 Timothée 5:8). Me ti tene amolenge ti ala aduti na ngia, a yeke nzoni ti fa na ala ti ye Nzapa na ti zia lege na lo ti fa ye na ala (aÉphésien 6:4). Yengo so ala yeke ye na Nzapa ayeke ndu bê ti amolenge ti ala mingi. Tongana fango ye so ala yeke fa na amolenge ti ala aluti na ndo ti Bible, a yeke sara si amolenge ni ayeke gbu li ti ala na ndo ti anzoni ye.Diko Deutéronome 6:4-7; aProverbe 22:6.

Tongana ala gonda amolenge ti ala ndali ti aye so ala sara, a yeke sara nzoni na ala mingi. Me a lingbi a se ala nga, tongaso si ala tï pëpe na yâ ti asarango ye so alingbi ti ga na ala vundu (aProverbe 22:15). Ye oko, zia si ala se amolenge ti ala ni na ngangu pëpe.Diko aColossien 3:21.

A-Témoin ti Jéhovah asigigi na gbâ ti ambeti na ndo ti sewa ti mû maboko na ababâ na amama nga na amolenge. Atënë ti yâ ni aluti na ndo ti Bible.Diko Psaume 19:8, 12.

TI HINGA AMBENI TËNË

Mä Nzapa si mariage ti mo aduti na ngia

Ti sara kua na ahundango tënë use ayeke mû maboko na mo ti sara si mariage ti mo aga nzoni.

Lege ti leke na akpale

Ala use kue alingbi ti soro ti tene mariage ti ala akpengba nga aduti na ngia wala ti tene mariage ni awoko nga ayeke na vundu.