Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Nzoni tënë so alondo na Nzapa!

 Ye ti manda 4

Jésus Christ ayeke zo wa?

Jésus Christ ayeke zo wa?

Asarango ye ti Jésus wa asara si zo alingbi ti ga nduru na lo?—MATTHIEU 11:29; MARC 10:13-16.

1. Fini ti Jésus ato nda ni tongana nyen?

Nzapa acréé Jésus kozo ti aye kue. Nde na tanga ti azo kue, Jésus ayeke lani na yayu tongana mbeni zo ti yingo kozoni si a dü lo na sese (Jean 8:23). Jésus amû maboko na Nzapa na yâ ti lekengo tanga ti aye kue. Lo yeke oko zo so Jéhovah asara lo na maboko ti lo wani, ni la a iri lo “oko” Molenge ti Nzapa (Jean 1:14). Jésus asara kusala tongana Watokua ti Nzapa, ni la a iri lo “Tënë ni”.Diko aProverbe 8:22, 23, 30; aColossien 1:15, 16.

2. Ngbanga ti nyen Jésus aga na ndo ti sese?

Nzapa atokua Molenge ti lo na sese na ziango fini ti lo na yâ ti Marie, mbeni wali Juif so ade ti hinga koli pëpe. A yeke ndali ni la Jésus ayeke pëpe na babâ na lege ti mitele (Luc 1:30-35). Jésus aga na ndo ti sese (1) ti fa tâ tënë na ndo ti Nzapa, (2) ti fa na e lege ti sara ye so Nzapa aye atâa e yeke na yâ ti akpale, nga (3) ti mû fini ti lo so alingbi kue tongana “ngere so a futa ti zi na azo”.Diko Matthieu 20:28.

3. Ngbanga ti nyen a lingbi a futa ngere ti zi na e?

Ti zi mbeni zo na lê ti kuâ, a lingbi ti hunda ti tene a futa mbeni ye si (Exode 21:29, 30). Na tongo nda ni, Nzapa aleke lani pëpe ti tene azo aga mbakoro na ala kui. E hinga ni tongana nyen? Nzapa atene lani na kozo koli, Adam, so tongana lo sara ye so Bible airi ni siokpari, lo yeke kui. Tongana Adam asara fade siokpari pëpe, ka lo yeke kui lâ oko pëpe (Genèse 2:16, 17; 5:5). Bible atene kuâ “alï” na yâ ti dunia na lege ti Adam. Ye so asara si ahale ti lo kue awara siokpari nga kuâ so  ayeke ye ti pekoni. A yeke ndali ni la e yeke na bezoin ti tene a futa mbeni ngere ti zi e na gbe ti kuâ so e wara na mbage ti Adam.Diko aRomain 5:12; 6:23.

Zo wa la alingbi ti futa ngere ti zi e na gbe ti kuâ? Tongana e kui, e futa siokpari ti e wani. Mbeni wasiokpari alingbi pëpe ti futa siokpari ti amba ti lo.Diko Psaume 49:8-10.

4. Jésus akui ngbanga ti nyen?

Jésus ayeke na siokpari tongana e pëpe. Tongaso lo yeke na bezoin pëpe ti kui ndali ti asiokpari ti lo: lâ oko lo sara mbeni siokpari pëpe. Me, Jésus akui ndali ti asiokpari ti azo. Nzapa atokua Molenge ti lo ti kui ndali ti e ti fa kota ndoye so lo yeke na ni na mbage ti azo. Jésus afa nga ndoye ti lo na mbage ti e na mango yanga ti Babâ ti lo nga na mungo fini ti lo ndali ti asiokpari ti e.Diko Jean 3:16; aRomain 5:18, 19.

5. Nyen la Jésus ayeke sara na ndembe so?

Na ngoi so lo yeke na sese, Jésus akaï akobela, lo zingo akuâ nga lo zi akpale ti ala. Na lege ti aye so, lo fa ye so lo yeke sara ande teti azo kue so amä yanga (Matthieu 15:30, 31; Jean 5:28). Na peko ti so Jésus akui, Nzapa azingo lo na kuâ tongana zo ti yingo (1 Pierre 3:18). Na pekoni, lo duti na tere ti Jéhovah Nzapa na mbage ti maboko ti lo ti koli, lo ku juska Jéhovah amû na lo ngangu ti komande tongana Gbia na ndo ti sese kue (aHébreu 10:12, 13). Jésus ayeke komande fadeso tongana Gbia na yayu, nga adisciple ti lo ayeke fa nzoni tënë so na ndo ti sese kue.Diko Daniel 7:13, 14; Matthieu 24:14.

Na yâ ti ngoi kete, Jésus ayeke mû ngangu ti lo ti Gbia ti ga ti hunzi apasi kue nga na azo so ayeke na gunda ni. Azo kue so afa so ala mä na bê na Jésus na mango yanga ti lo ayeke wara ande fini na yâ ti paradis na ndo ti sese.Diko Psaume 37:9-11.