Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Nzoni tënë so alondo na Nzapa!

 Ye ti manda 11

Tongana nyen andia ti Nzapa ayeke sara nzoni na e?

Tongana nyen andia ti Nzapa ayeke sara nzoni na e?

Tongana nyen afango ye ti Bible alingbi ti pusu e ti sara sioni na e wani wala na mbeni zo pëpe?—PSAUME 36:10.

1. Ngbanga ti nyen e bezoin ti tene a fa lege na e?

Wasarango e ayeke na ndara mingi ahon e. Lo yeke bâ lege ti e tongana mbeni Babâ so aye amolenge ti lo. Nga, lo ye lani pëpe ti tene e duti yamba na lo (Jérémie 10:23). Legeoko tongana ti so mbeni kete molenge ayeke na bezoin ti tene babâ na mama ti lo afa lege na lo, e kue e yeke na bezoin ti tene Nzapa afa lege na e (Ésaïe 48:17, 18). Nzapa amû na e Bible tongana mbeni matabisi, na andia ti yâ ni ayeke fa lege na e.Diko 2 Timothée 3:16.

Andia ti Jéhovah afa na e laso lege ti dutingo na fini so ayeke nzoni mingi nga afa na e tongana nyen e lingbi ti wara ande fini ti lakue lakue. Teti so Nzapa la asara e, a yeke na lege ni ti tene e yeda na fango lege so lo yeke fa na e na e bâ ni na nene ni.Diko Psaume 19:8, 12; Apocalypse 4:11.

2. Bible ayeke fa lege na e tongana nyen?

Ambeni kota tâ tënë ti Bible afa na e ye so Nzapa aye e sara na yâ ti ambeni ye. E lingbi ti sara kua na ambeni ndia ni gi na yâ ti ambeni mbilimbili ye (Deutéronome 22:8). Na yâ ti mbeni ye so asi, gbungo li ayeke mû lege na e ti hinga tongana nyen ti sara ye alingbi na atâ tënë ti Bible (aProverbe 2:10-12). Na tapande, Bible afa so fini ayeke ye so Nzapa la amû na e. Tâ tënë so alingbi ti fa lege na e na place ti kua, na yanga-da nga na ngoi so e yeke voyagé. Ye so ayeke sara si e yeke kpe ti zia fini ti e wala fini ti ambeni zo na lê ti kpale.Diko Kusala 17:28.

3. Acommandement use so ayeke kota ahon atanga ni kue ayeke so wa?

Jésus asara lani tënë ti acommandement use so ayeke kota  mingi. Kozo commandement ni afa ndani so zo ayeke na fini: ti hinga Nzapa, ti ye lo nga ti sara na lo na bê kue. A yeke nzoni e bi bê ti e na kozo commandement so na yâ ti adesizion kue so e yeke mû (aProverbe 3:6). Azo so asara ye alingbi na commandement so aga kamarade ti Nzapa, ala yeke wara fini ti lakue lakue nga ala wara tâ ngia.Diko Matthieu 22:36-38.

Use commandement ni alingbi ti fa lege na e ti duti na siriri na yâ ti songo ti e na amba ti e (1 aCorinthien 13:4-7). Ti sara ye alingbi na use commandement so, a hunda ti tene e mû tapande ti sarango ye ti Nzapa na mbage ti azo.Diko Matthieu 7:12; 22:39, 40.

4. Tongana nyen andia ti Nzapa ayeke sara nzoni na e?

Afango ye ti Nzapa afa na asewa tongana nyen ndoye alingbi ti bungbi ala oko (aColossien 3:12-14). Mbeni tâ tënë so Bible afa asara nga si yâ ti sewa akangbi pëpe: a yeke nzoni yâ ti mariage abuba pëpe.Diko Genèse 2:24.

Ti sara ye alingbi na afango ye ti Bible alingbi ti sara si e wara ye ti nzoni na lege ti mitele nga e duti na siriri ti bê. Na tapande, mingi ni, azo ti mungo zo na kua aye ka awakua so abata afango ye ti Bible na ndo ti tënë ti sarango ye na nzi pëpe nga na sarango kua na goigoi pëpe (aProverbe 10:4, 26; aHébreu 13:18). Mbeti ti Nzapa afa nga na e ti zia bê ti e gi na ye so e yeke na bezoin ni na ti bâ songo ti e na Nzapa tongana ye so ayeke kota ahon aye ti mitele.Diko Matthieu 6:24, 25, 33; 1 Timothée 6:8-10.

Ti sara ye alingbi na afango ye ti Bible ayeke bata seni ti e (aProverbe 14:30; 22:24, 25). Na tapande, zo so asara ye alingbi na ndia ti Nzapa na ndo ti tënë ti nyongo sämba, lo yeke kpe akobela nga na andao so ayeke fâ azo so anyon sämba ahon ndo ni (aProverbe 23:20). Jéhovah amû lege na e ti nyon sämba me ahon ndo ni pëpe (Psaume 104:15; 1 aCorinthien 6:10). Andia ti Nzapa asara nzoni na e na fango na e ti duti na anzoni sarango ye nga na anzoni bibe (Psaume 119:97-100). Me, atâ Chrétien ayeke bata andia ti Nzapa gi ndali ti nzoni ti ala wani pëpe. Ala yeke bata ni ti mû gonda na Jéhovah.Diko Matthieu 5:14-16.

TI HINGA AMBENI TËNË

Hunda ti tene zo aga amanda Bible na mo

Hunda si a ga a manda Bible na mo na l’heure ti bê ti mo nga na ndo ti bê ti mo.