Lege ti wara ye ni

Soro mbeni yanga ti kodoro

Gue na gbe ti menu

Gue na li ti atënë ni

Gue na tënë ti yâ ni

aTémoin ti Jéhovah

Sango

Sewa ti mo alingbi ti duti na ngia

 MBAGE 1

Mä Nzapa si mariage ti mo aduti na ngia

Mä Nzapa si mariage ti mo aduti na ngia

“Na tongo nda ni, lo so asara ala, lo sara ala koli na wali.”Matthieu 19:4

Jéhovah * Nzapa la ayeke kozo zo so abungbi koli na wali na gbe ti mariage. Bible atene na e so lo sara kozo wali, na lo “ga na wali so na koli ni.” Tere ti Adam anzere sioni si lo tene: “So ayeke bio ti bio ti mbi, na mi ti mitele ti mbi.” (Genèse 2:22, 23). Laso nga, Jéhovah aye si azo so asara mariage aduti na ngia.

Tongana mo sara mariage pan, peut-être mo pensé so aye kue ayeke duti ande gi nzoni. Me ti tâ tënë ni, même koli na wali so aye tere mingi ayeke duti ande na akpale (1 aCorinthien 7:28). Na yâ ti brochure so, mo yeke wara ande awango ti Bible so, tongana mo mû pekoni, alingbi ti sara si mariage ti mo nga na sewa ti mo ayeke duti na ngia.Psaume 19:9-12.

 1 YEDA NA KUA SO JÉHOVAH AMÛ NA MO

YE SO BIBLE ATENE: Koli ayeke li ti sewa.aÉphésien 5:23.

Tongana mo yeke koli ti wali, Jéhovah aku ti tene mo bâ lege ti wali ti mo na nzoni bê (1 Pierre 3:7). Lo zia wali tongana zo ti mungo maboko na mo nga lo ye si mo sara ye na mbage ti wali ti mo na nengo lo nga na ndoye (Genèse 2:18). Yengo so mo ye na wali ti mo ayeke sara si mo yeke nduru ti zia na kozo ndo aye so ayeke sara nzoni na lo ahon ti mo wani.aÉphésien 5:25-29.

Tongana mo yeke wali ti koli, Jéhovah aku ti tene mo ne koli ti mo na gbe ti bê ti mo nga mo mû maboko na lo ti sara kua ti lo ti koli nzoni (1 aCorinthien 11:3; aÉphésien 5:33). Yeda na adesizion so lo yeke mû nga sara kua maboko na maboko na lo na bê ti mo kue (aColossien 3:18). Tongana mo sara tongaso, mo yeke nzere na lê ti lo nga na lê ti Jéhovah.1 Pierre 3:1-6.

YE SO MO LINGBI TI SARA:

  • Koli, hunda na wali ti mo ti fa na mo tongana nyen ti duti nzoni koli. Wali, sara nga tongaso. Ala mä mba nzoni nga ala gi ti sara ye nzoni ahon ti kozo

  • Kanga bê. A yeke hunda ande ngoi ti tene ala use kue ahinga tongana nyen la ala lingbi ti zia ngia na bê ti mba

2 PENSÉ BIANI NA YE SO AGBU BÊ TI KOLI WALA WALI TI MO

YE SO BIBLE ATENE: A yeke nzoni mo gi gi nzoni ti wali wala koli ti mo (aPhilippien 2:3, 4). Ye lo mingi, nga girisa ape so Jéhovah ahunda na awakua ti lo ti sara “ye na ngangu pëpe na azo kue”. (2 Timothée 2:24). “Tënë senge ti ambeni zo akpo tongana épée, me menga ti wandara asara si ye aga nzoni.” Ni la, soro atënë ti mo nzoni (aProverbe 12:18). Yingo ti Jéhovah ayeke mû maboko na mo ti sara tënë na nzoni bê nga na ndoye.aGalate 5:22, 23; aColossien 4:6.

YE SO MO LINGBI TI SARA:

  • Kozoni ti tene ala sara lisoro na ndo ti ambeni ngangu tënë, sambela ti tene mo duti kpô nga ti mä mba ti mo nzoni

  • Gbu li nzoni na ndo ti ye so mo yeke tene ande nga tongana nyen la mo yeke tene ni

 3 ALA MÄ TERE

YE SO BIBLE ATENE: Na ngoi so mo sara mariage, mo ga “mitele oko” na wali wala koli ti mo (Matthieu 19:5). Me atâa so kue, zo oko oko ayeke na asarango ye ti lo nga na apensé ti lo wani. Ni la, a hunda ti tene ala gi ti sara si apensé nga na atënë ti bê ti ala ague oko (aPhilippien 2:2). Mango tere ayeke kota ye mingi na yâ ti adesizion so ala yeke mû. Bible atene: “Ye so zo abi bê ti lo dä ti sara, a ga nzoni na lege ti wango.” (aProverbe 20:18). Zia si awango ti Bible afa lege na ala na yâ ti akota desizion so ala yeke mû.aProverbe 8:32, 33.

YE SO MO LINGBI TI SARA:

  • Tongana mo yeke fa ambeni tënë na wali wala koli ti mo, fa nga na lo apensé ti mo na ndo ni

  • Bâ wali wala koli ti mo kozo si mo mû yanga ti sara mbeni ye

^ par. 4 Jéhovah ayeke iri ti Nzapa na yâ ti Bible.

TI HINGA AMBENI TËNË

Akoli: Ala bata awali ti ala nzoni

Mbeni sewa alingbi ti duti na nginza, me ambeni ye so ayeke kota ye alingbi ti manke ala.